約書亞記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
8:1 征服艾城
上主對約書亞講：「M̄免驚，mā m̄ thang懍（lún）。你起來chhōa所有ê戰士去艾城，我已經kā艾城ê王kah伊ê人民、伊ê城、伊ê地，lóng交tī你ê手。
8:2 你款待艾城kah伊ê王，tio̍h親像早前款待耶利哥城kah伊ê王。總是，所搶來伊ê財物kah chengseⁿ，lín thang取做kakī ê。你tio̍h用兵埋伏tī城後。」
8:3 就ánne，約書亞kah所有ê戰士lóng起來，beh上去艾城。約書亞揀三萬大力ê勇士，暗時差in去，
8:4 kā in吩咐講：「Lín tio̍h埋伏兵來攻城，to̍h是tī城後，m̄ thang離開城siuⁿ遠，lóng tio̍h準備好勢。
8:5 我kah我所chhōa ê眾人beh近óa城，in親像頭一pái出來攻擊阮，hit時阮to̍h beh tī in ê面前逃走。
8:6 In beh出來jiok阮，到阮引誘in離開城；因為in ē講：『Chiahê人親像頭一pái tī阮ê面前逃走。』所以，阮beh tī in ê面前逃走；
8:7 hit時，lín to̍htioh8 tùi埋伏ê所在起來，攻取hitê城，因為上主—lín ê上帝ē kā hitê城交tī lín ê手。
8:8 Lín攻取城了後，to̍h tio̍h用火燒城，tio̍h照上主ê話行。你看，這是我所命令lín ê。」
8:9 約書亞差in，in to̍h去埋伏ê所在，tiàm tī伯特利kah艾城ê中間，to̍h是艾城ê西pêng。Hit暝，約書亞歇tī人民ê中間。
8:10 天光，約書亞早早起來，點算人民，伊kah以色列ê長老tī人民ê頭前去艾城。
8:11 人民，to̍h是kah伊tī ·leh ê戰士，lóng去近óa城ê頭前，tī艾城ê北pêng紮營。Τī伊kah艾城ê中間有一个山谷。
8:12 約書亞差不多有揀五千人，hō͘ in埋伏tī伯特利kah艾城ê中間，to̍h是tī城ê西pêng。
8:13 伊to̍hánne安置人民，to̍h是城北pêng ê軍隊，kah城西pêng埋伏ê兵。Chit暝，約書亞入去山谷中。
8:14 艾城ê王看tio̍h，城內hiahê人趕緊透早起來，照所定tio̍h ê時，出去到亞拉巴ê頭前，beh kah以色列人交戰，王kah眾人lóng出去；總是，in m̄知tī城後有兵埋伏，teh beh kā in攻擊。
8:15 約書亞kah以色列ê群眾tī in ê頭前假影thâi輸，tùi曠野ê路逃走。
8:16 城內ê眾人lóng聚集，jiok in；in jiok約書亞，就受引誘離開in ê城。
8:17 艾城kah伯特利城，所有ê人lóng出去jiok以色列人；城門放開開，去jiok以色列人。
8:18 上主對約書亞講：「你伸出手裡所gia̍h ê鎗來kí艾城，因為我beh kā它交tī你ê手。」約書亞to̍h伸出手裡所gia̍h ê鎗來kí hitê城。
8:19 伊一下伸手，埋伏ê兵to̍h tùi伊ê所在趕緊起來，走入去城內攻取hitê城，趕緊放火燒城。
8:20 艾城ê人oa̍t頭一下看，無想講，城內火煙chhèng上天，in to̍h走chia走hia，lóng無路thang逃走。Hiahê走去曠野ê人民就翻頭來攻擊jiok in。
8:21 約書亞kah以色列ê群眾看tio̍h埋伏ê兵已經攻取城，城內火煙chhèng上koân，to̍h oa̍t-tńg身thâi死艾城ê人。
8:22 埋伏ê兵mā出來kā in攻擊，in受圍困tī以色列人ê中間，前後lóng是以色列人。就ánne kā inthâi死，無kah一个留teh，mā無kah一个走去。
8:23 In就活掠艾城ê王，kā伊押去約書亞hia。
8:24 以色列人kā tòa tī艾城ê人民全部thâi死，tī田裡á是tī曠野jiok ·tio̍h ê所在，in lóng倒tī刀下，到滅亡。以色列人民to̍h倒tńg來艾城，用刀thâi城內ê人。
8:25 當hit日，thâi死ê男女，共一萬二千，to̍h是艾城ê全部人民。
8:26 約書亞無kiu伊伸出鎗ê手，一直到消滅全部艾城ê人民。
8:27 獨獨chengseⁿ kah所搶城內ê財物，以色列人lóng取來做kakī ê，照上主所命令約書亞ê話。
8:28 約書亞燒艾城，hō͘它永遠做土堆，荒廢到今á日。
8:29 In koh kā艾城ê王吊tī樹頂，到黃昏日落ê時，約書亞出命令，人to̍h tùi樹頂kā身屍收落來，hiat tī城門口，tī hit頂面疊一大堆ê石頭，到今á日iáu tī ·leh。
8:30 Tī以巴路山宣讀律法
Hit時，約書亞tī以巴路山，為上主—以色列ê上帝起一座壇。
8:31 是用自然ê石，hit頂面無動tio̍h鐵器來起壇，照上帝ê奴僕摩西所命令以色列人ê話，照摩西律法冊內所記ê。In tī chitê壇頂獻燒祭hō͘上主，mā獻謝恩ê祭。
8:32 約書亞tī hia用摩西ê律法抄寫tī石頂，to̍h是伊tī以色列人ê面前所寫ê。
8:33 以色列人民kah in ê長老、官長，以及審判官，lóng khiā tī約櫃ê雙pêng，tī扛上主約櫃ê祭司利未人ê面前，無論是本地人á是寄腳ê，一半tī Ki-lī-sim山ê頭前，一半tī以巴路山ê頭前，kā以色列人民祝福，照上帝ê奴僕摩西前所命令ê。
8:34 然後，約書亞讀律法所有ê話，祝福ê，咒詛ê，照所有記tī律法ê。
8:35 摩西所命令一切ê話，約書亞tī以色列ê全會眾kah chabó͘人、gín-á，以及in中間往來ê出外人ê面前，無kah一句無讀。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。