約書亞記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
6:1 耶利哥城ê陷落
耶利哥城ê城門，因為以色列人ê緣故，就關tiâu-tiâu，無人出來，mā無人入去。
6:2 上主kā約書亞講：「你看，我有kā耶利哥城kah伊ê王，以及伊大力ê勇士，lóng交tī你ê手裡。
6:3 Lín所有ê戰士tio̍h se̍h chitê城一pái，六日lóng tio̍h ánne行。
6:4 七个祭司tio̍h gia̍h七支羊角ê號筒，行tī約櫃ê頭前，到第七日lín tio̍h se̍h城七pái，祭司mā tio̍h pûn號筒。
6:5 In pûn羊角ê聲拖長，lín聽tio̍h號筒ê聲，眾人tio̍h大聲hoah，城牆to̍h ē倒kah平平，ta̍k人lóng tio̍h直直進前去。」
6:6 嫩ê kiáⁿ約書亞叫祭司來，kā in講：「Lín tio̍h扛約櫃，祭司七人gia̍h七支羊角ê號筒 tī上主ê櫃前。」
6:7 伊koh kā人民講：「Lín tio̍h進前去se̍h城，帶軍器ê tio̍h行tī上主ê櫃前。」
6:8 約書亞對人民講soah，七个祭司gia̍h七支羊角ê號筒，行tī上主ê面前，pûn號筒，上主ê約櫃tòe tī in ê後面。
6:9 帶軍器ê行tī pûn號筒ê祭司ê頭前，後隊tòe約櫃行。祭司ná行ná pûn號筒。
6:10 約書亞命令人民講：「Lín m̄ thang hoah，m̄ thang hō͘人聽tio̍h lín ê聲，連一句mā m̄ thang出嘴，thèng候我吩咐lín hoah ê日，hit時chiah thang hoah。」
6:11 就ánne，伊hō͘上主ê約櫃圍城se̍h一pái；in to̍htng2來營房，tī營內歇睏。
6:12 天光，約書亞早早起來，祭司mā扛上主ê約櫃。
6:13 Gia̍h七支羊角ê號筒ê七个祭司，tī上主ê櫃前直直行，pûn號筒；帶軍器ê tī in ê頭前行，後隊tòe上主ê約櫃行，祭司ná行ná pûn號筒。
6:14 第二日，in se̍h城一pai2to̍h tńg來營房。六日lóng是ánne行。
6:15 第七日phah-phú光ê時，in早早起來，照ánne se̍h城七pái；只有chit日se̍h城七pái。
6:16 到第七pái，祭司pûn號筒ê時，約書亞kā人民講：「Τio̍h hoah，因為上主kā城交hō͘ lín à。
6:17 Chitê城kah其中一切所有ê，lóng tio̍h分別歸hō͘上主；只有娼妓喇合，以及一切kah她tī厝內ê，thang活leh，因為她有隱密咱所差ê使者。
6:18 Lín tī應該滅ê物tio̍h kakī 謹慎，恐驚lín the̍h應該滅ê物，致使kakī mā變做應該滅ê，soah連累以色列全營mā變做應該滅ê，來害tio̍h伊。
6:19 只有金、銀kah銅、鐵ê器具，lóng tio̍h分別歸hō͘上主，收入去上主ê金庫。」
6:20 人民就hoah，祭司mā pûn號筒。人民聽tio̍h號筒ê聲，to̍h大聲hoah，城牆to̍h倒kah平平，人民就進前入城，ta̍k人直直去，就ánne征服hitê城。
6:21 Koh kā城內所有ê，無論男女老幼、牛、羊kah驢á，lóng用刀全部kā in滅掉。
6:22 約書亞kā偵探hitê地ê hit兩人講：「Lín入去hitê娼妓ê厝，照lín對她所chiùchōa ê，chhōa hitê chabó͘人kah一切屬tī她ê lóng tùi hia出來。」
6:23 Hiahê做偵探ê少年人to̍h入去，chhōa喇合kah她ê老父、老母、兄弟，以及一切屬tī她ê人出來，mā chhōa她ê親chiâⁿ出來，hō͘ in tòa tī以色列ê營外。
6:24 Into̍h用火燒hitê城kah其中一切所有ê；獨獨金、銀kah銅、鐵ê器具，lóng hē tī上主厝內ê金庫。
6:25 約書亞就保全娼妓喇合kah伊老父ê家眷，以及所有屬tī她ê人ê活命，因為她有隱密約書亞所差去探看耶利哥城ê使者。（她就tòa tī以色列中間，一直到今á日。）
6:26 當時，約書亞對群眾chiùchōa講：「見若起來起造chitê耶利哥城ê，tio̍h tī上主ê面前受咒詛。伊hē地基ê時，ē死大kiáⁿ；hē門ê時，ē死soah尾kiáⁿ。」
6:27 上主kah約書亞同在，伊ê名聲滿滿tī hit所在。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。