約書亞記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
6:1 I-é-lī-kho Siâⁿ ê Hām-lo̍h
I-é-lī-kho siâⁿ ê siâⁿ mn̂g, in-ūi I-su-la-el lâng ê iân-kò͘, chiū koaiⁿ tiâu-tiâu, bô lâng chhut-.lâi, mā bô lâng ji̍p-.khì.
6:2 Siōng-chú kā Io-siú-ah kóng, " Lí khòaⁿ, Góa ū kā I-é-lī-kho siâⁿ kah i ê ông, í-ki̍p i tōa la̍t ê ióng-sū, lóng kau tī lí ê chhiú-.ni̍h.
6:3 Lín só͘-ū ê chiàn-sū tio̍h se̍h chit-ê siâⁿ chi̍t pái, la̍k ji̍t lóng tio̍h ánne kiâⁿ.
6:4 Chhit-ê chè-si tio̍h gia̍h chhit ki iûⁿ-kak ê hō-tâng, kiâⁿ tī iok-kūi ê thâu-chêng, kàu tē-chhit ji̍t lín tio̍h se̍h siâⁿ chhit pái, chè-si mā tio̍h pûn hō-tâng.
6:5 In pûn iûⁿ-kak ê siaⁿ thoa tn̂g, lín thiaⁿ tio̍h hō-tâng ê siaⁿ, chèng lâng tio̍h tōa-siaⁿ hoah, siâⁿ chhiûⁿ chiū ē tó kah pêⁿ-pêⁿ, ta̍k lâng lóng tio̍h ti̍t-ti̍t chìn-chêng khì. "
6:6 Nùn ê kiáⁿ Io-siú-ah kiò chè-si lâi, kā in kóng, " Lín tio̍h kng iok-kūi, chè-si chhit lâng gia̍h chhit ki iûⁿ-kak ê hō-tâng tī Siōng-chú ê kūi chêng. "
6:7 I koh kā jîn-bîn kóng, " Lín tio̍h chìn-chêng khì se̍h siâⁿ, tòa kun-khì ê tio̍h kiâⁿ tī Siōng-chú ê kūi chêng. "
6:8 Io-siú-ah tùi jîn-bîn kóng soah, chhit-ê chè-si gia̍h chhit ki iûⁿ-kak ê hō-tâng, kiâⁿ tī Siōng-chú ê bīn-chêng, pûn hō-tâng, Siōng-chú ê iok-kūi tòe tī in ê āu-bīn.
6:9 Tòa kun-khì ê kiâⁿ tī pûn hō-tâng ê chè-si ê thâu-chêng, āu-tūi tòe iok-kūi kiâⁿ. Chè-si ná kiâⁿ ná pûn hō-tâng.
6:10 Io-siú-ah bēng-lēng jîn-bîn kóng, " Lín m̄ thang hoah, m̄ thang hō͘ lâng thiaⁿ tio̍h lín ê siaⁿ, liân chi̍t kù mā m̄ thang chhut chhùi, thèng-hāu góa hoan-hù lín hoah ê ji̍t, hit sî chiah thang hoah. "
6:11 Chiū ánne, i hō͘ Siōng-chú ê iok-kūi ûi siâⁿ se̍h chi̍t pái; in chiū tńg-lâi iâⁿ-pâng, tī iâⁿ lāi hioh-khùn.
6:12 Thiⁿ-kng, Io-siú-ah chá-chá-khí-.lâi, chè-si mā kng Siōng-chú ê iok-kūi.
6:13 Gia̍h chhit ki iûⁿ-kak ê hō-tâng ê chhit-ê chè-si, tī Siōng-chú ê kūi chêng ti̍t-ti̍t kiâⁿ, pûn hō-tâng; tòa kun-khì ê tī in ê thâu-chêng kiâⁿ, āu-tūi tòe Siōng-chú ê iok-kūi kiâⁿ, chè-si ná kiâⁿ ná pûn hō-tâng.
6:14 Tē-jī ji̍t, in se̍h siâⁿ chi̍t pái chiū tńg-lâi iâⁿ-pâng. La̍k ji̍t lóng sī ánne kiâⁿ.
6:15 Tē-chhit ji̍t phah-phú-kng ê sî, in chá-chá khí-.lâi, chiàu ánne se̍h siâⁿ chhit pái; chí ū chit ji̍t se̍h siâⁿ chhit pái.
6:16 Kàu tē chhit pái, chè-si pûn hō-tâng ê sî, Io-siú-ah kā jîn-bîn kóng, " Τio̍h hoah, in-ūi Siōng-chú kā siâⁿ kau hō͘ lín à.
6:17 Chit-ê siâⁿ kah kî-tiong it-chhè só͘-ū ê, lóng tio̍h hun-pia̍t kui hō͘ Siōng-chú; chí ū chhiong-ki La-ha̍t, í-ki̍p it-chhè kah i tī chhù lāi ê, thang oa̍h-.leh, in-ūi i ū ún-ba̍t lán só͘ chhe ê sù-chiá.
6:18 Lín tī eng-kai bia̍t ê mi̍h tio̍h kakī kín-sīn, khióng-kiaⁿ lín the̍h eng-kai bia̍t ê mi̍h, tì-sú kakī mā piàn-chò eng-kai bia̍t ê, soah liân-lūi I-su-la-el choân-iâⁿ mā piàn-chò eng-kai bia̍t ê, lâi hāi tio̍h i.
6:19 Chí-ū kim, gîn kah tâng thih ê khì-kū, lóng tio̍h hun-pia̍t kui hō͘ Siōng-chú, siu ji̍p-khì Siōng-chú ê kim-khò͘. "
6:20 Jîn-bîn chiū hoah, chè-si mā pûn hō-tâng. Jîn-bîn thiaⁿ tio̍h hō-tâng ê siaⁿ, chiū tōa-siaⁿ hoah, siâⁿ chhiûⁿ chiū tó kah pêⁿ-pêⁿ, jîn-bîn chiū chìn-chêng ji̍p siâⁿ, ta̍k lâng ti̍t-ti̍t khì, chiū ánne cheng-ho̍k hit-ê siâⁿ.
6:21 Koh kā siâⁿ lāi só͘-ū ê, bô-lūn lâm-lí ló-iù, gû, iûⁿ kah lî-á, lóng ēng to choân-pō͘ kā in bia̍t-tiāu.
6:22 Io-siú-ah kā cheng-thàm hit-ê tē ê hit nn̄g lâng kóng, " Lín ji̍p-khì hit-ê chhiong-ki ê chhù, chiàu lín tùi i só͘ chiùchōa ê, chhōa hit-ê chabó͘ lâng kah it-chhè sio̍k tī i ê lóng tùi hia chhut-.lâi. "
6:23 Hiahê chò cheng-thàm ê siàu-liân lâng chiū ji̍p-.khì, chhōa La-ha̍t kah i ê lāu-pē, lāu-bú, hiaⁿ-tī, í-ki̍p it-chhè sio̍k tī i ê lâng chhut-.lâi, mā chhōa i ê chhin-chiâⁿ chhut-.lâi, hō͘ in tòa tī I-su-la-el ê iâⁿ gōa.
6:24 In chiū ēng hóe sio hit-ê siâⁿ kah kî-tiong it-chhè só͘-ū ê; to̍k-to̍k kim, gîn kah tâng, thih ê khì-kū, lóng hē tī Siōng-chú chhù lāi ê kim-khò͘.
6:25 Io-siú-ah chiū pó-choân chhiong-ki La-ha̍t kah i lāu-pē ê ka-koàn, í-ki̍p só͘-ū sio̍k tī i ê lâng ê oa̍h-miā, in-ūi i ū ún-ba̍t Io-siú-ah só͘ chhe khì thàm-khòaⁿ I-é-lī-kho siâⁿ ê sù-chiá. （ I chiū tòa tī I-su-la-el tiong-kan, it-ti̍t kàu kin-á-ji̍t. ）
6:26 Tong-sî, Io-siú-ah tùi kûn-chiòng chiùchōa kóng, " Kiàn-nā khí-lâi khí-chō chit-ê I-é-lī-kho siâⁿ ê, tio̍h tī Siōng-chú ê bīn-chêng siū chiù-chó͘. I hē tē-ki ê sî, ē sí tōa-kiáⁿ; hē mn̂g ê sî, ē sí soah-bóe kiáⁿ. "
6:27 Siōng-chú kah Io-siú-ah tông-chāi, i ê miâ-siaⁿ móa-móa tī hit só͘-chāi.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。