約書亞記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
1:1 Siōng-chú Bēng-lēng Io-siú-ah Khì Cheng-ho̍k Ka-nân Tē
Siōng-tè ê lô͘-po̍k Mô͘-se sí liáu-āu, Siōng-chú hoan-hù Nùn ê kiáⁿ Io-siú-ah, to̍h-sī kin-tòe Mô͘-se ê, kóng,
1:2 " Góa ê lô͘-po̍k Mô͘-se sí à, taⁿ lí tio̍h khí-.lâi kah chèng lâng kòe chit-ê Iol-tàn hô, khì Góa só͘ siúⁿ-sù I-su-la-el lâng ê tē.
1:3 Kiàn-nā lín ê kha-chiúⁿ só͘ ta̍h ê tē, Góa lóng siúⁿ-sù hō͘ lín, chiàu Góa tùi Mô͘-se só͘ kóng ê.
1:4 Τùi khòng-iá kah chit-ê Le-ba-nòng kàu tōa hô, to̍h-sī Iu-hu-la-té hô, Hiat lâng ê choân tē, koh kàu tōa hái, ǹg ji̍t lo̍h ê só͘-chāi, lóng beh chò lín ê kéng-kài.
1:5 Lí chi̍t-sì-lâng, it-tēng bô chi̍t-ê lâng ē khiā-tiâu tī lí ê bīn-chêng. Góa án-chóaⁿ kah Mô͘-se tông-chāi, mā beh ánne kah lí tông-chāi; Góa it-tēng bē lī-khui lí, mā bē pàng-sak lí.
1:6 Lí tio̍h ióng-kám chòng-táⁿ, in-ūi lí beh hō͘ chiahê jîn-bîn tit tio̍h hit-ê tē chò sán-gia̍p, to̍h-sī Góa tùi in ê chó͘-sian só͘ chiùchōa beh hō͘ in ê.
1:7 Chóng-.sī, lí tio̍h ióng-kám tōa-tōa chòng-táⁿ, chip-siú Góa ê lô͘-po̍k Mô͘-se só͘ bēng-lēng lí it-chhè ê lu̍t-hoat, lâi chiàu ánne kiâⁿ, m̄ thang lī-khui lâi phian chó phian iū, hō͘ lí bô-lūn khì-kàu tó-ūi, lóng tit tio̍h heng-thong.
1:8 Chit-ê lu̍t-hoat ê chheh m̄ thang lī-khui lí ê chhùi, it-tēng tio̍h mê-ji̍t su-siúⁿ, hō͘ lí chip-siú lâi kiâⁿ chit pún chheh lāi só͘ kì-chài it-chhè ê ōe. Án-ne, chiū ē hō͘ lí ê lō͘ pêⁿ-tháⁿ, lí mā tit tio̍h tōa heng-thong.
1:9 Góa kám bô bēng-lēng lí? Lí tio̍h ióng-kám chòng-táⁿ, m̄-bián kiaⁿ, mā m̄ thang lún, in-ūi lí bô-lūn khì-kàu tó-ūi, Siōng-chú — lí ê Siōng-tè lóng ē kah lí tông-chāi. "
1:10 Io-siú-ah Bēng-lēng Bîn-chiòng
Chiū ánne, Io-siú-ah bēng-lēng jîn-bîn ê koaⁿ-tiúⁿ, kóng,
1:11 " Lín tio̍h piàn kiâⁿ iâⁿ tiong, bēng-lēng jîn-bîn, kóng, ' Lín tio̍h chún-pī chia̍h-mi̍h, in-ūi saⁿ ji̍t lāi, lín beh kòe chit-ê Iol-tàn hô, ji̍p-khì tit tio̍h Siōng-chú — lín ê Siōng-tè só͘ beh hō͘ lín tit tio̍h ê tē. '"
1:12 Io-siú-ah hoan-hù Lū-biān lâng, Ga̍t lâng kah Má-ná-se pòaⁿ chi-cho̍k, kóng,
1:13 " Lín tio̍h ē kì-tit Siōng-tè ê lô͘-po̍k Mô͘-se só͘ bēng-lēng lín ê ōe, kóng, ' Siōng-chú — lín ê Siōng-tè í-keng hō͘ lín pêng-an, mā ē kā chit-ê tē siúⁿ-sù hō͘ lín. '
1:14 Lín ê bó͘, lín ê gín'á, lín ê chengseⁿ, lóng tio̍h tòa tī Iol-tàn hô chit pêng, Mô͘-se só͘ hō͘ lín ê tē; to̍k-to̍k lín tiong-kan só͘-ū tōa khùi-la̍t ê ióng-sū, lóng tio̍h tòa kun-khì, tī lín hiaⁿ-tī ê thâu-chêng kòe-.khì, kā in pang-chān;
1:15 Ti̍t kàu Siōng-chú hō͘ lín ê hiaⁿ-tī kah lín sio-siâng lóng tit tio̍h pêng-an, ti̍t-kàu in mā tit tio̍h Siōng-chú — lín ê Siōng-tè só͘ siúⁿ-sù hō͘ in ê tē, hit sî lín chiah thang tńg-khì lín só͘ tit tio̍h ê tē, kā i sêng-chiap lâi chò sán-gia̍p, to̍h-sī Siōng-tè ê lô͘-po̍k Mô͘-se só͘ hō͘ lín tī Iol-tàn hô chit pêng ǹg ji̍t chhut ê só͘-chāi. "
1:16 In ìn Io-siú-ah kóng, " Kiàn-nā lí só͘ bēng-lēng goán ê, goán beh kiâⁿ; lí só͘ chhe goán ê, goán lóng beh khì chò.
1:17 Goán í-chêng tī só͘-ū ê tāichì lóng ánne chun-thàn Mô͘-se, taⁿ mā beh ánne chun-thàn lí; to̍k-to̍k goān Siōng-chú — lí ê Siōng-tè kah lí tông-chāi, chhin-chhiūⁿ I í-chêng kah Mô͘-se tông-chāi.
1:18 Bô-lūn siáⁿ lâng ûi-pōe lí ê bēng-lēng, m̄-thiaⁿ lí ê ōe, chiàu lí it-chhè só͘ bēng-lēng ê, chiū beh hō͘ i sí. Chóng-.sī, lí tio̍h ióng-kám chòng-táⁿ! "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。