創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
23:1 亞伯拉罕買墓地來埋葬撒拉
撒拉食到一百二十七歲，這是撒拉一生ê年歲。
23:2 撒拉死tī迦南地ê基列亞巴，to̍h是希伯崙；亞伯拉罕來，為tio̍h撒拉哀傷啼哭。
23:3 後來，亞伯拉罕tùi伊ê死人ê面前起來，kā赫人講：
23:4 「我tī lín中間是寄腳ê出外人，求lín tī chia hō͘我一个所在做墓地，thang埋葬我ê死人，hō͘我無koh看tio̍h她。」
23:5 赫人應亞伯拉罕，講：
23:6 「我ê主，請聽，你tī阮中間是有神威ê頭人，chhut-chāi你tī阮ê墓地內揀siōng好ê，來埋葬你ê死人。阮無一个人ēm̄允准你tī伊ê墓地內埋葬你ê死人。」
23:7 亞伯拉罕起來，對hit所在ê人，to̍h是赫族，àⁿ腰。
23:8 伊對in講：「Lín若有意思beh hō͘我埋葬我ê死人，hō͘我無koh看tio̍h她，to̍h請聽我講，替我求瑣轄ê kiáⁿ以弗崙，
23:9 kā伊ê田頭麥比拉ê穴hō͘我，伊thang照足額ê價數賣 hō͘我；hō͘我tī lín中間有所在thang做墓地。」
23:10 當時，以弗崙坐tī赫人ê中間，赫人以弗崙tī所有入伊ê城門ê赫人ê面前，應亞伯拉罕講：
23:11 「M̄免，我ê主，請聽我講。我beh送你hit坵田，連hit內面ê穴mā hō͘你，tī我同族ê人ê面前，我beh hō͘你thang去埋葬你ê死人。」
23:12 亞伯拉罕to̍h tī hit所在ê人民ê面前àⁿ腰，
23:13 tī hit所在人民ê面前，對以弗崙講：「你若肯，請聽我講。我beh kā田ê價錢hō͘你，你tio̍h收，hō͘我thang tī hia埋葬我ê死人。」
23:14 以弗崙應亞伯拉罕講：
23:15 「我ê主，請聽我講。Hit坵田值得銀四百舍客勒，tī你我ê中間，這beh算啥物？請做你去埋葬你ê死人。」
23:16 亞伯拉罕聽以弗崙ê話，照伊tī赫人ê面前所講ê，kā買賣通用ê銀，秤四百舍客勒hō͘以弗崙。
23:17 Tùi hit時起，以弗崙tī麥比拉kah幔利ê頭前ê hit坵田kah hit內面ê穴，以及田內kah四箍圍所有ê樹木，
23:18 tī赫族人kah所有入伊ê城門ê人ê面前，lóng定tio̍h歸hō͘亞伯拉罕做產業。
23:19 後來，亞伯拉罕kā伊ê bó͘撒拉埋葬tī迦南地幔利頭前ê麥比拉田裡ê穴，幔利to̍h是希伯崙。
23:20 就ánne，hit坵田kah田裡ê穴，tùi赫人定tio̍h歸hō͘亞伯拉罕做產業，來做墓地。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。