申命記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
27:1 Tī石碑寫上主ê律法
摩西kah以色列chiahê長老命令人民講：「Lín tio̍h守我今á日所命令lín一切ê誡命。
27:2 Lín過約旦河，來到上主—你ê上帝所賞賜hō͘你ê地，hit日tio̍h khiā幾塊大石，用灰kā它抹。
27:3 你過去了後，tio̍h寫chitê律法kah一切ê話tī hit頂面，thang hō͘你入去上主—你ê上帝所賞賜hō͘你ê地，to̍h是流奶kah蜜ê地，照上主你祖先ê上帝所應允你ê。
27:4 Lín過約旦河了後，to̍h tio̍h tī以巴路山khiā我今á日所命令lín hiahê石，用灰kā它抹。
27:5 Tī hia tio̍h為上主—你ê上帝起一座壇，to̍h是石頭ê壇，tī hit頂面m̄ thang動tio̍h鐵器。
27:6 Τio̍h用無過phah ê石頭起上主—你ê上帝ê壇，tī hit頂面tio̍h獻燒祭hō͘上主—你ê上帝。
27:7 Koh tio̍h獻謝恩祭，mā tī hia食，tī上主—你ê上帝ê面前歡喜。
27:8 你tio̍h kā chitê律法一切ê話，tī hiahê石裡寫明。」
27:9 摩西kah祭司利未人，吩咐以色列人民講：「以色列人，lín tio̍h恬恬來聽，今á日你成做上主—你ê上帝ê子民。
27:10 所以，tio̍h遵thàn上主—你ê上帝ê話，行祂ê誡命律例，to̍h是我今á日所命令你ê。」
27:11 違背誡命Tio̍h受咒詛
當hit日，摩西命令人民講：
27:12 「Lín過約旦河了後，西緬、利未、偤大、以薩迦、約瑟、便雅憫，chiahê支族tio̍h khiā tī Ki-lī-sim山來祝福人民。
27:13 流便、迦得、亞設、西布倫、但、拿弗他利，chiahê支族，tio̍h khiā tī以巴路山來宣布咒詛。
27:14 利未人tio̍h大聲對以色列人民講：
27:15 「『見若人製造偶像，刻ê á是鑄ê，上主所討厭ê，to̍h是師傅ê手所做ê，chhāi tī偷偷á ê所在，hitê人tio̍h受咒詛！』「人民lóng tio̍h應講：『阿們！』
27:16 「『看輕老父á是老母ê，tio̍h受咒詛！』「人民lóng tio̍h講：『阿們！』
27:17 「『移徙厝邊ê界址ê，tio̍h受咒詛！』「人民lóng tio̍h講：『阿們！』
27:18 「『Hō͘ chheⁿmê ·ê行m̄ tio̍h路ê，tio̍h受咒詛！』「人民lóng tio̍h講：『阿們！』
27:19 「『審判來冤枉出外人kah孤兒、寡婦ê，tio̍h受咒詛！』「人民lóng tio̍h講：『阿們！』
27:20 「『kah老父ê後bó͘同房ê tio̍h受咒詛！因為伊有掀開伊ê老父ê衫á裾。』「人民lóng tio̍h講：『阿們！』
27:21 「『無論kah啥物獸交合ê，lóng tio̍h受咒詛！』「人民lóng tio̍h講：『阿們！』
27:22 「『人kah siâng父ê姊妹á是siâng母ê姊妹同房，hitê人tio̍h受咒詛！』「人民lóng tio̍h講：『阿們！』
27:23 「『Kah丈姆同房ê tio̍h受咒詛！』「人民lóng tio̍h講：『阿們！』
27:24 「『暗中phah死厝邊ê tio̍h受咒詛！』「人民lóng tio̍h講：『阿們！』
27:25 「『接受人ê烏紗來害死無罪ê人ê tio̍h受咒詛！』「人民lóng tio̍h講：『阿們！』
27:26 「『無堅守chiahê律法ê話來行ê tio̍h受咒詛！』「人民lóng tio̍h講：『阿們！』」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。