申命記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
23:1 Bē tàng參與上主聚會ê規定
「見若外腎受傷ê á是受閹割ê，m̄ thang入去上主ê會幕。
23:2 「私通來生ê kiáⁿ m̄ thang入去上主ê會幕，甚至到伊ê十代，mā m̄ thang去上主ê會幕。
23:3 「亞捫人á是摩押人，m̄ thang入去上主ê會幕，甚至到in ê十代，永遠bē tàng入去上主ê會幕。
23:4 因為lín出埃及ê時，in無用食物kah水tī路裡kā lín迎接，koh因為in kah lín對敵，倩米所波大米ê Pì-toat人，比珥ê kiáⁿ巴蘭，來kā lín咒詛。
23:5 總是，上主—你ê上帝m̄聽巴蘭，上主—你ê上帝hō͘ hitê咒詛變做祝福，因為上主—你ê上帝疼你。
23:6 你一世人到永遠m̄ thang kah in圖謀平安kah福氣。
23:7 「M̄-thang怨恨以東人，因為伊是你ê兄弟。M̄-thang怨恨埃及人，因為lín bat出外tī hia。
23:8 In所生ê kiáⁿ孫到第三代chiah thang入去上主ê會幕。」
23:9 「你ê軍隊出去攻擊你ê對敵，tī營房tio̍h kakī 禁戒一切ê pháiⁿ事。
23:10 Lín中間若有人，tī暗時所tú ·tio̍h ê來bak無清氣，伊to̍htioh8出去營外，m̄ thang入去營內。
23:11 到beh暗ê時，伊tio̍h用水洗，到日落chiah thang入去營內。
23:12 「你tī營外揀選一位thang出去到外面大便ê所在。
23:13 Τī你ê器具內tio̍h有托á，你tī外面大便ê時，tio̍h用它掘土，chiah oa̍t-tńg身來蓋你所放ê。
23:14 因為上主—你ê上帝四界行tī你ê營內，beh kā你拯救，kā你ê對敵交hō͘你，所以，你ê營房應該tio̍h有聖潔，免得祂看tio̍h你中間有污穢to̍h離開你。」
23:15 其他各種ê規定
「若有奴僕脫離伊ê主人，走到你hia，你m̄ thang kā伊交hō͘伊ê主人。
23:16 伊beh kah你tòa，tī伊所揀選你一个城門內ê所在來tòa tī你ê中間，to̍h是伊所歡喜ê，你m̄ thang kā伊欺負。
23:17 以色列ê女人中間m̄ thang有妓女；以色列ê男人中間m̄ thang有男性廟倡。
23:18 娼妓所得tio̍h ê錢á是男性廟倡ê工錢，你m̄ thang帶入去上主—你ê上帝ê殿來謝願，因為chit兩項lóng是上主—你ê上帝所討厭ê。
23:19 「你ê兄弟á是對你借錢á是借食物，借見若會生利息ê物，你lóng m̄ thang the̍h伊ê利息。
23:20 你借外族ê人，thang the̍h伊ê利息，總是，借你ê兄弟to̍h m̄ thang the̍h伊ê利息；thang hō͘上主—你ê上帝tī你所去beh得tio̍h做產業ê地，tī你ê手所做一切ê tāichì，kā你賜福。
23:21 「你對上主—你ê上帝下願，m̄ thang延chhiân你ê謝願，因為上主—你ê上帝一定ē對你討，你若無謝to̍h有罪。
23:22 你若無下願，to̍h無罪。
23:23 見若tùi你ê嘴所出ê，照你已經下願tī上主—你ê上帝來甘心獻ê，to̍h是你ê嘴所答應，你tio̍h執守來照ánne行。
23:24 「你入你ê厝邊ê葡萄園，thang chhut-chāi你食葡萄到飽，總是，m̄ thang貯tī你ê器具內。
23:25 你若入你ê厝邊iáu未割ê五穀中，thang用手摘它ê穗，總是，m̄ thang用鐮á割你ê厝邊ê五穀。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。