申命記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
12:1 唯一崇拜ê場所
「Lín tī世間一生ê日子，tī上主—lín祖先ê上帝所賞賜hō͘ lín做產業ê地，tio̍h執守來行ê律例kah法度，to̍h是chiahê：
12:2 Lín所beh趕走來承接ê列國，見若in服事in hiahê神明ê所在，無論tī高山，tī小山，tī所有青翠ê樹腳，lóng tio̍h kā in毀壞。
12:3 Lín mā tio̍h拆毀in ê祭壇，phah碎in雕刻ê柱，用火燒in ê亞舍拉，剉in所雕刻ê神明ê像，mā tio̍h tùi hit所在kā in ê名除滅。
12:4 「Lín m̄ thang親像ánne來服事上主—lín ê上帝。
12:5 總是，上主—lín ê上帝將來tùi lín眾支族中所beh揀選ê所在，thang tī hia安置祂ê名，to̍h是祂tòa ê所在，lín tio̍h去hia chhōe祂，
12:6 kā lín ê燒祭kah別種ê祭，十份取一份ê物，kah手裡ê舉祭，以及謝願ê祭，甘心獻ê祭，以及牛群、羊群中頭水生ê，lóng tio̍h帶到hia。
12:7 Τī hia，lín tī上主—lín ê上帝ê面前，為tio̍h lín ê手所做一切ê tāichì，得tio̍h上主—lín ê上帝賜福ê，lín kah lín ê家眷lóng tio̍h lim食歡喜。
12:8 「咱今á日tī chia所做ê tāichì，是ta̍k人照ánne行kakī 看做是tio̍h ê，lín將來m̄ thang ánne行。
12:9 因為lín現今iáu未來到上主—你ê上帝所賞賜hō͘你ê安息kah產業。
12:10 總是，lín過約旦河，得tio̍h tòa tī上主—lín ê上帝賞賜hō͘ lín承接ê地，koh hō͘ lín脫離四箍圍所有ê對敵，得tio̍h安息，來安穩tòa落去。
12:11 to̍h tio̍h有一个所在，是上主—lín ê上帝所揀來安置祂ê名ê，見若我所命令lín ê，to̍h是lín ê燒祭kah別種ê祭，十份取一份ê物kah手裡ê舉祭，以及你對上主所下願極好ê物，lóng tio̍h帶到hia。
12:12 Lín kah lín ê kiáⁿ兒、奴僕、女婢，lóng tio̍h歡喜tī上主—lín ê上帝ê面前；利未人tòa tī lín ê門內ê mā是ánne，因為in tī lín中間無份無業。
12:13 你tio̍h kakī 謹慎，m̄ thang tī你看kah意ê所在獻lín ê燒祭。
12:14 獨獨tī你chiahê支族中ê一个，上主所揀選ê所在，lín tī hia tio̍h獻你ê燒祭，koh tī hia行我一切所命令你ê。
12:15 「總是，你tī你ta̍k个門內，lóng thang照上主—你ê上帝所賞賜hō͘你ê福份，照你ê心所愛，thâichengseⁿ食肉；無論清氣ê人，á是無清氣ê人，lóng thang食，ná親像teh食羚羊kah鹿。
12:16 總是，血m̄ thang食，tio̍h piàⁿ tī地裡，親像teh piàⁿ水。
12:17 你ê五穀、酒、油ê十分之一，á是牛群、羊群中頭水生ê，á是你下願獻ê，甘心獻ê，á是手裡ê舉祭，lóng m̄ thang tī你ê門內食。
12:18 獨獨thang tī上主—你ê上帝ê面前食，to̍h是tī上主—你ê上帝所揀選ê所在，你kah你ê kiáⁿ、你ê chabó͘ kiáⁿ、奴僕、女婢，以及tòa tī你門內ê利未人，lóng tio̍h食；見若你ê手所做ê，tī上主—你ê上帝ê面前，thang歡喜。
12:19 你tio̍h kakī 謹慎，tī你ê所在，一世人m̄ thang放sak利未人。
12:20 「上主—你ê上帝照祂所應允你ê，開闊你ê境界ê時，你ê心ài食肉，所以，講：『我beh食肉』，to̍h thang照你ê心所愛ê來食肉。
12:21 上主—你ê上帝所揀選beh安置祂ê名ê所在，若離開你真遠，to̍h thang照我所命令你ê，kā上主賞賜hō͘你ê牛、羊取來thâi，thang照心所愛ê，tī你ê門內食。
12:22 你thang親像食羚羊kah鹿á ánne來食，清氣kah無清氣ê人平平thang食。
12:23 獨獨你tio̍h決意，m̄ thang食血，因為血是活命；你m̄ thang食肉，續食牠ê活命。
12:24 M̄-thang食血，tio̍h piàⁿ tī地裡，親像teh piàⁿ水。
12:25 M̄-thang食血，ánne，你行上主所看做是tio̍h ê tāichì，你kah你ê kiáⁿ孫to̍h ē得tio̍h福氣。
12:26 總是，你所有ê聖物kah你所下願ê，tio̍h帶到上主所揀選ê所在。
12:27 你ê燒祭，肉kah血，tio̍h獻tī上主—你ê上帝ê壇頂。你祭物ê血，tio̍h piàⁿ tī上主—你ê上帝ê壇；hitê肉，你thang食。
12:28 你tio̍h執守，聽thàn我命令你一切ê話，行上主—你ê上帝所看做好koh tio̍h ê tāichì。Án-ne，你kah你ê kiáⁿ孫to̍h ē tàng永遠得tio̍h福氣。」
12:29 對拜偶像ê警告
「上主—你ê上帝tùi你ê面前kā你除滅你所beh去承接ê國，你承接了後to̍htoa3 hitê地，
12:30 hit時，你tio̍h kakī 謹慎，m̄ thang tī in tùi lín ê面前除滅了後，soah陷落in ê羅網來tòe in，mā m̄ thang探聽in ê神明ê tāichì，講：『Chiahê國án怎服事in ê神明，我mā beh ánne行。』
12:31 你m̄ thang對上主—你ê上帝ánne行，因為in對in ê神明行上主一切所痛恨討厭ê tāichì，甚至kā in ê kiáⁿ兒用火燒，獻hō͘ in ê神明。
12:32 見若我所命令lín ê，lín lóng tio̍h執守來行，你m̄ thang加添，mā m̄ thang減少。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。