申命記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
11:1 上主真偉大
「所以，你tio̍h疼上主—你ê上帝，tiāⁿ-tiāⁿ 守祂所吩咐你tio̍h守ê，to̍h是祂ê律例、法度kah誡命。
11:2 Lín今á日tio̍h知，因為我m̄是kah lín ê kiáⁿ兒講，in m̄知，mā無看tio̍h上主—lín ê上帝ê教導kah威嚴，大權能ê手kah伸出ê手骨，
11:3 以及祂ê神跡，祂ê所做，見若tī埃及中tùi埃及王法老kah伊ê全地所行ê；
11:4 koh有祂án怎款待埃及ê軍兵，kah in ê馬，in ê車，in jiok lín ê時，上主án怎hō͘紅海ê水淹in，kā in滅亡到今á日，
11:5 祂koh再tī曠野án怎kā lín款待，到lín來chitê所在；
11:6 祂koh再án怎款待流便ê kiáⁿ孫以利押ê kiáⁿ大坍kah亞比蘭，地án怎tī以色列人ê中間開嘴kā in吞食，kah in ê家眷，以及in ê布棚，kah一切跟tòe in ê活物。
11:7 獨獨lín親目看tio̍h上主所做一切ê大事。」
11:8 應允地ê福澤
「所以，lín tio̍h遵守我今á日所命令lín ê一切誡命，hō͘ lín壯膽，ē tàng入去承接lín所beh過去承接ê地，
11:9 mā hō͘ lín ê日子久長tī上主所kah lín ê祖先chiùchōa beh賞賜hō͘ in kah in ê kiáⁿ孫ê地，to̍h是hit款流奶kah蜜ê地。
11:10 因為你beh入去承接ê地，m̄是親像lín出來ê埃及地，你tī hia掖種，用腳踏來灌ak，親像菜園。
11:11 總是，lín所beh入去承接ê地，to̍h是有山，有山谷，來承受天ê雨水ê地，
11:12 是上主—你ê上帝所照顧ê地，tùi年頭到年尾，上主—你ê上帝ê目chiu tiāⁿ-tiāⁿ teh看它。
11:13 「Lín若注意遵thàn我ê誡命，to̍h是我今á日所命令lín ê，疼上主—lín ê上帝，盡心、盡性服事祂，
11:14 我to̍h ē照時koh照你ê地所需要ê落雨，to̍h是以前ê雨，以後ê雨，hō͘你thang收成你ê五穀，你ê酒，你ê油，
11:15 mā hō͘你ê田野發草，thang飼你ê chengseⁿ，你mā ē得tio̍h飽足。
11:16 Lín tio̍h kakī 謹慎，免得lín ê心受迷惑，致使lín歪chhoa̍h，去服事別个神明，來kā伊敬拜。
11:17 致使上主對lín大受氣，hō͘天關密無落雨，地mā無出產，lín to̍h ētī上主所賞賜hō͘ lín ê súi地緊緊滅亡。
11:18 「所以，lín tio̍h用我chiahê話記tī lín ê心，lín ê腦，mā tio̍h縛tī lín ê手做記號，掛tī lín兩蕊目chiu ê中央做記念；
11:19 mā tio̍h用這教示lín ê kiáⁿ兒，無論你坐tī厝內á是行tī路裡，睏á是起來，lóng tio̍h講論；
11:20 koh tio̍h寫tī你ê厝ê門框 kah你ê門閂（chhòaⁿ），
11:21 hō͘ lín ê日子kah lín ê kiáⁿ孫ê日子，tī上主對lín ê祖先chiùchōa賞賜hō͘ in ê地，得tio̍h加添真chē，親像天蓋地ê日子hiah久。
11:22 「Lín若致意執守我所命令lín一切ê誡命，來照ánne行，疼上主—lín ê上帝，行祂一切ê路，kah祂結聯，
11:23 上主to̍h ētùi lín ê面前kā這所有ê國趕出去，lín mā ē得tio̍h比lín目前ê khah大koh khah強ê國。
11:24 見若lín ê腳掌所踏ê地，lóng ē歸hō͘ lín，tùi曠野kah黎巴嫩，tùi hitê河，to̍h是幼發拉底大河，到西pêng ê海，lóng beh做lín ê境界。
11:25 無一个人ē tàng khiā-tiâu tī lín ê面前；上主—lín ê上帝ē hō͘ lín所踏ê全地lóng驚lín，懍（lún）lín，照祂所對lín講ê。
11:26 「你看，我今á日kā祝福kah咒詛排tī lín ê面前。
11:27 Lín若遵thàn上主—lín ê上帝ê誡命，我今á日所命令lín ê to̍h是祝福。
11:28 Lín若m̄遵thàn上主—lín ê上帝ê誡命，歪chhoa̍h我今á日所命令lín ê路，去遵thàn別个神明，lín平時所m̄ bat ê，to̍h是咒詛。
11:29 將來上主—你ê上帝chhōa你到你所beh入去承接ê地，你tio̍h hē hitê祝福tī Ki-lī-sim山，hē hitê咒詛tī 以巴路山。
11:30 Chit兩 个山kám m̄是tī約旦河hit-pêng，日落ê路ê後面，tī tòa亞拉巴ê迦南人ê地，kah 吉甲相對，óa近Mó͘-leh橡樹？
11:31 因為lín beh過約旦河，入去承接上主—lín ê上帝所賞賜hō͘ lín做產業ê地，línē tī hia tòa。
11:32 Lín tio̍h執守來行我今á日tī lín ê面前所排列一切ê律例kah法度。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。