申命記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
7:1 Siōng-chú ê Chú-bîn
( CAG 34：11-16)" Siōng-chú — lí ê Siōng-tè chhōa lí ji̍p-khì lí só͘ beh khì tit tio̍h ê tē, tùi lí ê bīn-chêng kóaⁿ-chhut chin chē pang-kok, to̍h-sī Hiat lâng, Gi-ga-sih lâng, A-mô͘-lī lâng, Ka-nân lâng, Pe-lí-ji lâng, Hi-bī lâng, I-é-bú-suh lâng, chóng-kiōng chhit kok, lóng pí lí khah tōa koh khah béng.
7:2 Siōng-chú — lí ê Siōng-tè kā in kau-hù lí, hō͘ lí phah-iâⁿ i, hit sî lí tio̍h kā in choân-pō͘ siau-bia̍t, m̄ thang kah in li̍p-iok, mā m̄ thang kā in liân-bín.
7:3 Mā m̄ thang kah in kiat-chhin, lí ê chabó͘ kiáⁿ m̄ thang kè hō͘ i ê kiáⁿ, mā m̄ thang hō͘ lí ê kiáⁿ chhōa i ê chabó͘ kiáⁿ.
7:4 In-ūi i ē hō͘ lí ê kiáⁿ oa̍t tńg-sin bô beh tòe góa, khì ho̍k-sāi pa̍t-ê sîn-bêng, tì-sú Siōng-chú tùi lín tōa siū-khì, kóaⁿ-kín kā lín siau-bia̍t.
7:5 Chóng-.sī, lín tio̍h ánne khoán-thāi in, thiah-húi in ê chè-tôaⁿ, phah-chhùi in tiau-khek ê thiāu, chhò in ê A-si-lah, ēng hóe sio in só͘ chng ê ngó͘-siōng.
7:6 In-ūi lín chò sèng-kiat ê jîn-bîn, kui tī Siōng-chú — lí ê Siōng-tè. Siōng-chú — lí ê Siōng-tè tùi tē-chiūⁿ bān-bîn tiong kéng-soán lí, te̍k-pia̍t chò I kakī ê chú-bîn.
7:7 " Siōng-chú thiàⁿ lín, kéng-soán lín, m̄-sī in-ūi lín ê lâng-gia̍h pí pa̍t kok khah chē, in-ūi lín ê lâng-gia̍h sī bān-kok tiong tē-it chió ê.
7:8 Sī in-ūi Siōng-chú thiàⁿ lín, koh in-ūi beh si̍t-hiān I tùi lín chó͘-sian só͘ chiùchōa ê, Siōng-chú chiah ēng tōa koân-lêng ê chhiú chhōa lín chhut-.lâi, tùi chò lô͘-lē ê ke kā lín kiù-sio̍k, thoat-lī Ai-gi̍p ông Hôa-láu ê chhiú.
7:9 Só͘-í, lí tio̍h chai Siōng-chú — lí ê Siōng-tè, I sī Siōng-tè, koh sī sìn-si̍t ê Siōng-tè, ūi tio̍h thiàⁿ I hiahê siú I kài-bēng ê lâng, si̍t-hêng I ê iok kah chû-ài, it-ti̍t kàu chheng-tāi.
7:10 Kiàn-nā oàn-hūn I ê lâng, I ē tng-bīn pò-èng lâi kā in siau-bia̍t. Oàn-hūn I ê lâng, I ē tng-bīn kā i pò-èng, bô beh iân-chhiân.
7:11 Só͘-í, lí tio̍h chip-siú góa kin-á-ji̍t só͘ bēng-lēng lí ê kài-bēng, lu̍t-lē kah hoat-tō͘, lâi chiàu ánne khì kiâⁿ. "
7:12 Chun-siú Kài-bēng Ē Bông-hok
( SBK 26: 1-14)
" Āu-lâi, lín nā thiaⁿ chiahê hoat-tō͘, chip-siú lâi chiàu ánne khì kiâⁿ, Siōng-chú — lí ê Siōng-tè in-ūi ánne ē kā lí si̍t-hêng I tùi lí ê chó͘-sian só͘ chiùchōa ê iok kah chû-ài.
7:13 I ē thiàⁿ lí, kā lí sù-hok, hō͘ lí heng-ōng, mā ē tī I tùi lí ê chó͘-sian chiùchōa siúⁿ-sù hō͘ lí ê tē, kā lí sù-hok lí ê thai só͘ seⁿ ê, lí ê tē só͘ chhut ê kah lí ê ngó͘-kok, lí ê chiú, lí ê iû, í-ki̍p lí ê gû kah lí ê iûⁿ-á-kiáⁿ.
7:14 Lí ē tit tio̍h sù-hok iâⁿ-kòe bān-bîn, lín tiong-kan ê lâm-lí bô kah chi̍t-ê bē seⁿ-thòaⁿ, lín tiong-kan ê chengseⁿ bô kah chi̍t chiah bē seⁿ-thòaⁿ.
7:15 Siōng-chú ē hō͘ só͘-ū ê pēⁿ-chèng lī-khui lí, lí só͘ chai ê Ai-gi̍p ta̍k chióng ê pháiⁿ chèng-thâu, I bô hō͘ lí tú tio̍h chi̍t hāng, sī ē hō͘ só͘-ū oàn-hūn lí ê lâng tú-.tio̍h.
7:16 Siōng-chú — lí ê Siōng-tè só͘ beh kau-hù lí ê jîn-bîn, lí tio̍h lóng kā in siau-bia̍t, lí ê ba̍k-chiu m̄ thang khó-liân in, lí mā m̄ thang ho̍k-sāi in ê sîn-bêng, in-ūi che ē phò-hoāi lí ê lô-bāng.
7:17 " Lí nā sim-lāi siūⁿ kóng, chiahê kok pí góa khah tōa, góa ná ē-tàng kā in kóaⁿ-tio̍k?
7:18 Lí m̄-bián kiaⁿ in, it-tēng tio̍h ē kì-tit Siōng-chú — lí ê Siōng-tè ǹg Hôa-láu kah Ai-gi̍p choân tē só͘ kiâⁿ ê tāichì,
7:19 to̍h-sī lí chhin-ba̍k khòaⁿ-.tio̍h ê tōa chhì-liān, sîn-jiah, kî-sū kah tōa koân-lêng ê chhiú, kah chhun chhut-.lâi ê chhiú-kut, lóng sī Siōng-chú — lí ê Siōng-tè só͘ ēng lâi chhōa lí chhut Ai-gi̍p ê. Siōng-chú — lí ê Siōng-tè mā ē ánne kiâⁿ tī lí só͘ kiaⁿ ê só͘-ū jîn-bîn sin chiūⁿ.
7:20 Siōng-chú — lí ê Siōng-tè koh ē chhe tōa-chiah phang poe kàu in tiong-kan, it-ti̍t kàu in só͘ chhun lo̍h-lâi teh siám-bih-.ê tī lí ê bīn-chêng siau-bia̍t.
7:21 Lí m̄-bián kiaⁿ in, in-ūi Siōng-chú — lí ê Siōng-tè tī lín tiong-kan, I sī tōa koh thang kiaⁿ ê Siōng-tè.
7:22 Siōng-chú — lí ê Siōng-tè ē tī lí ê bīn-chêng chiām-chiām tû-bia̍t chiahê kok, lí m̄ thang kóaⁿ-kín kā i bia̍t-tiāu kàu chīn, khióng-kiaⁿ iá-siù ke-thiⁿ chin chē lâi hāi lí.
7:23 Siōng-chú — lí ê Siōng-tè ē kā in kau-hù lí, hō͘ in tōa kiaⁿ jiáu-loān, it-ti̍t kàu in bia̍t-bông ûi-chí.
7:24 I koh ē kā in hiahê ông kau tī lí ê chhiú, lí ē kā in ê miâ tī thian-hā lâi tû-bia̍t, it-tēng bô chi̍t-ê lâng ē khiā tī lí ê bīn-chêng, it-ti̍t kàu lí kā in bia̍t-bông ûi-chí.
7:25 In só͘ tiau-khek in ê sîn-bêng ê siōng, lín tio̍h ēng hóe kā i sio; lí m̄ thang tham i sin chiūⁿ ê kim-gîn, mā m̄ thang kā i the̍h-lâi piàn-chò kakī ê, khióng-kiaⁿ lí ē ūi tio̍h chit-ê lâi hām-lo̍h lô-bāng, in-ūi che sī Siōng-chú — lí ê Siōng-tè só͘ thó-ià ê.
7:26 Kiàn-nā thang thó-ià ê mi̍h, lí m̄ thang tòa ji̍p-khì lí ê chhù lāi, khióng-kiaⁿ lí kah hiahê mi̍h sio-siâng mā chiâⁿ-chò thang chiù-chó͘ ê. Lí tio̍h hui-siông thòng-hūn, hui-siông thó-ià, in-ūi he sī thang chiù-chó͘ ê. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。