申命記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
2:1 Tī曠野流浪
「然後，咱oa̍t倒tńg去出發，tùi紅海ê路去曠野，是照上主所kā我講ê。咱tī西珥山se̍h真chē日。
2:2 「上主吩咐我講：
2:3 『Lín se̍h chitê山真久à，lín tio̍h oa̍t tńg去ǹg北pêng去。
2:4 你tio̍h吩咐人民講：『以掃ê kiáⁿ孫lín ê兄弟tòa tī西珥，lín tio̍h經過in ê境界，in ē驚lín，所以，lín tio̍h不止謹慎。
2:5 M̄-thang kah in爭戰，in ê地我連一腳跡ê位都無beh hō͘ lín，因為我已經kā西珥山hō͘以掃做產業。
2:6 Lín tio̍h用銀tùi in買米糧來食，mā tio̍h用銀tùi in買水來lim。
2:7 「因為上主—你ê上帝tī你ê手所做一切ê工，kā你賜福。你行chitê大ê曠野，祂lóng知。Chit四十年中間，上主—你ê上帝kah你同在，你lóng無欠缺半項。』
2:8 「就ánne，咱離開咱ê兄弟以掃hiahê tòa tī西珥ê kiáⁿ孫，tùi亞拉巴ê路經過E-lot kah以旬迦別。咱to̍h oa̍t tńg去經過摩押曠野ê hit條路。
2:9 上主對我講：『M̄-thang攪擾摩押人，mā m̄ thang kah in交戰。In ê地我lóng無beh hō͘你做產業，因為我已經kā亞珥hō͘羅得ê kiáⁿ孫做產業。』
2:10 「（早前有E-mih人tòa tī hia，人民chē，大koh lò，親像亞納人。
2:11 In mā hō͘人算做利乏音人，kah亞納人相siâng；總是，摩押人kā伊稱做E-mih人。
2:12 早前，何利人mā tòa tī西珥，總是，以掃ê kiáⁿ孫續接伊，in tī in ê面前kā in剿滅，來tòa tī in ê所在，親像以色列tī上主賞賜hō͘ in做產業ê地所行ê。)
2:13 「Taⁿ lín tio̍h起來過Sat-lia̍t溪！就ánne，咱過Sat-lia̍t溪。
2:14 Tùi咱離開加低斯巴尼亞到過Sat-lia̍t溪ê日，總共三十八年，到hit代ê武士lóng死亡tī軍營中，照上主對in所chiùchōa ê。
2:15 Koh有上主ê手kā in攻擊，tùi軍營中kā in剿滅，直到in lóng死亡。
2:16 「武士tùi人民中lóng hông剿滅死亡以後，
2:17 上主吩咐我講：
2:18 『你今á日tio̍h tùi摩押ê境界亞珥經過，
2:19 行近亞捫人ê對面，m̄ thang攪擾in，mā m̄ thang kah in爭戰，因為亞捫人ê地我無hō͘ lín做產業，我已經有賞賜羅得ê kiáⁿ孫做產業。』
2:20 「（Hitê地mā算做是利乏音人ê地，早前利乏音人tòa tī hia，亞捫人稱in做Sàn-sòng-bêng。
2:21 Hiahê人民chē，大koh lò，親像亞納人，總是，上主tī亞捫人ê面前kā in剿滅，in to̍h得tio̍h in ê地，續接tòa tī hia。
2:22 親像祂為hiahê以掃tòa tī西珥ê kiáⁿ孫，tī in ê面前kā何利人消滅，in to̍h續接tī hia tòa in ê地到今á日。
2:23 Koh有A-ōe人tòa tī庄頭續到迦薩ê，tùi Ka-húi-thok出來ê Ka-húi-thok kā in消滅，來tòa tī in ê所在。）
2:24 「Taⁿ lín tio̍h起來，出發過去亞嫩ê山谷；你看，我已經kā亞摩利人希實本王西宏kah伊ê地，交tī你ê手頭，你tio̍h動手來得tio̍h伊ê地，去kah伊交戰。
2:25 Tùi今á日起，我beh hō͘天下萬民，聽tio̍h你ê名聲ê，驚lín，懍（lún）lín，koh因為你來痛苦kah phi̍h-phi̍h chhoah。
2:26 以色列人Phah贏希實本王
(民21：21-30)
「我to̍h tùi Ki-tí-bo̍k ê曠野，差使者去見希實本王西宏，用和平ê話講：
2:27 『求你容允我tùi你ê地經過，我ē行大路，無偏左，無偏右。
2:28 你the̍h我ê銀，賣米糧hō͘我食，the̍h我ê銀，賣水hō͘我lim，只要准我行路過去。
2:29 親像tòa tī西珥ê以掃ê kiáⁿ孫，kah tòa tī亞珥ê摩押人款待我相siâng，thèng候我過約旦河，入去上主—阮ê上帝所賞賜hō͘阮ê地。』
2:30 「總是，希實本王西宏m̄肯hō͘咱tùi伊hia經過，因為上主—你ê上帝hō͘伊ê性情固執koh心硬，是為tio̍h beh kā伊交付tī你ê手，親像今á日ánne。
2:31 「上主kā我講：『你看，tùi chit時起，我beh kā西宏kah伊ê地，交付tī你ê面前，你taⁿē得tio̍h伊ê地做產業。』
2:32 Hit時，西宏kah伊ê人民出來kā咱抵敵，tī雅雜交戰。
2:33 上主—咱ê上帝kā伊交付咱，咱就phah死伊kah伊ê kiáⁿ，以及伊ê人民。
2:34 「Hit當時，咱征服伊所有ê城，剿滅有人tòa ê城，連chabó͘人kah gín-á，無留kah一个。
2:35 總是，chengseⁿ kah所搶來ta̍k个城ê戰利品，lóng取來做kakī ê路用。
2:36 Tùi亞嫩山谷邊ê亞羅珥，以及山谷中ê城到tī基列，無kah一个城是堅固，hō͘咱kā它征服無tio̍h，因為上主—咱ê上帝lóng kā in交付hō͘咱。
2:37 只有亞捫人ê地，雅博河邊ê地kah山地chiahê城，kah上主—咱ê上帝所禁止咱去ê地，你lóng無óa近它。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。