申命記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
1:1 Sū-giân
Mô͘-se tī Iol-tàn hô gōa, tī khòng-iá Só͘-hut tùi-bīn ê A-la̍h-bah, to̍h-sī tī Pa-lân, Tô-hut, La̍h-ban, Ha-che-lot, Tí-sat-hap ê tiong-kan, tùi I-su-la-el ê bîn-chiòng só͘ kóng ê ōe, kì tī ē-té:
1:2 Tùi Ho-lep keng-kòe Se-il soaⁿ ê lō͘ kàu Ka-te-su-pa-nî-a, ū cha̍p-it ji̍t ê lō͘-thêng.
1:3 Tī tē-sì-cha̍p nî ê cha̍p-it-goe̍h chhe-it, Mô͘-se chiàu Siōng-chú it-chhè só͘ bēng-lēng i ê, lóng kā I-su-la-el lâng kóng.
1:4 Hit sî, i í-keng phah-iâⁿ tòa tī He-si-bóng ê A-mô͘-lī ông Si-hông kah tòa tī E-tu-lé kah A-su-tha-lo͘t ê Ba-siáng ông O͘-k.
1:5 Mô͘-se tī Iol-tàn hô gōa ê Mô͘-ap tē, khai-sí thoân chit-ê lu̍t-hoat kóng,
1:6 " Siōng-chú — lán ê Siōng-tè tī Ho-lep hoan-hù lán kóng: Lín tòa tī chit-ê soaⁿ í-keng chin kú à,
1:7 tio̍h chhut-hoat oa̍t-tńg kàu A-mô͘-lī lâng ê soaⁿ-tē kah kīn-óa hia ê ta̍k só͘-chāi, tī A-la̍h-bah, tī soaⁿ-tē, tī pêng-goân, tī lâm-hong, iân hái it-tài, Ka-nân lâng ê tē kah Le-ba-nòng, koh kàu tōa hô, to̍h-sī Iu-hu-la-té tōa hô.
1:8 Taⁿ góa kā chit-ê tē pâi-lia̍t tī lín ê bīn-chêng, lín tio̍h ji̍p-khì tit tio̍h i lâi chò sán-gia̍p, to̍h-sī Siōng-chú tùi lín ê chó͘-sian, A-bu-la-hàm, Í-sak, Iâ-kop chiùchōa beh siúⁿ-sù hō͘ in kah in ê kiáⁿ-sun ê tē. "
1:9 Mô͘-se Chí-phài Sím-phòaⁿ-koaⁿ
( CAG 18: 13-27)
Mô͘-se tùi jîn-bîn kóng, " Hit sî, góa kā lín kóng, ' Lín ê chek-jīm, góa kakī chi̍t-ê tam-tng bē khí.
1:10 Siōng-chú — lín ê Siōng-tè hō͘ lín ke-thiⁿ chin chē, lí khòaⁿ, lín kin-á-ji̍t chhin-chhiūⁿ thiⁿ-téng ê chheⁿ hiah chē.
1:11 Goān Siōng-chú — lín chó͘-sian ê Siōng-tè, hō͘ lín pí hiān-kim ke chheng pōe chē, mā chiàu I só͘ èng-ín lín-.ê sù-hok hō͘ lín.
1:12 Lín ê tāng-tàⁿ, lín ê chek-jīm kah lín ê oan-ke, góa kakī chi̍t-ê lâng ná tam-tng ē khí?
1:13 Lín tio̍h chiàu ta̍k chi-cho̍k lâi kéng-soán ū tì-hūi, ū kiàn-sek koh ū bêng-bōng ê lâng, thang hō͘ góa lâi kā in siat-li̍p chò lín ê siú-léng. '
1:14 " Lín ìn góa kóng, ' Lí só͘ kóng ê sī hó, thang ánne lâi kiâⁿ. '
1:15 Lín ta̍k chi-cho̍k ê siú-léng, to̍h-sī ū tì-hūi kah ū bêng-bōng ê lâng, góa ē kā in siat-li̍p chò siú-léng, to̍h-sī iâⁿ-tiúⁿ, liân-tiúⁿ, pâi-tiúⁿ, pan-tiúⁿ kah koaⁿ-oân, chiàu lín ê chi-cho̍k, lâi koán-lí lín.
1:16 " Tong-sî, góa bēng-lēng lín ê sím-phòaⁿ-koaⁿ kóng, ' Lín tī lín hiaⁿ-tī tiong sím-phòaⁿ, nā ū lâng kah i ê hiaⁿ-tī, á-.sī kah in tiong-kan ê chhut-gōa lâng ū sio-kò, tio̍h chiàu kong-tō lâi phòaⁿ-toàn.
1:17 Sím-phòaⁿ ê sî, m̄ thang khòaⁿ lâng ê gōa-māu, jio̍k kah kiông tio̍h pêⁿ-pêⁿ thiaⁿ in ê ōe; m̄ thang kiaⁿ lâng, in-ūi sím-phòaⁿ sio̍k tī Siōng-tè. Lín nā ū oh-tit kái-koat ê tāichì, hō͘ i lâi-kàu góa chia, góa chiū kā i phòaⁿ-toàn. '
1:18 Hit sî, góa ē kā lín só͘ eng-kai kiâⁿ ê tāichì lóng kā lín bēng-lēng. "
1:19 Tī Ka-té-si Bal-né-ah Phài Lâng Khì Thàm Ka-nân Tē
( BSK 13: 1-33)
" Lán chiàu Siōng-chú — lán ê Siōng-tè só͘ bēng-lēng lán ê, tùi Ho-lep chhut-hoat, keng-kòe lín só͘ khòaⁿ tio̍h hit-ê tōa koh thang kiaⁿ ê khòng-iá, tùi A-mô͘-lī lâng ê soaⁿ-tē kiâⁿ lō͘, lán chiū lâi-kàu Ka-té-si Bal-né-ah.
1:20 Góa tùi lín kóng, ' Lín í-keng lâi-kàu Siōng-chú — lán ê Siōng-tè siúⁿ-sù hō͘ lán ê A-mô͘-lī lâng ê soaⁿ-tē.
1:21 Lí khòaⁿ, Siōng-chú — lín ê Siōng-tè í-keng kā hit-ê tē pâi-lia̍t tī lí ê bīn-chêng, lí tio̍h chiàu Siōng-chú — lí ê chó͘-sian ê Siōng-tè só͘ tùi lí kóng ê, khì hia lâi tit tio̍h i chò sán-gia̍p; m̄-bián kiaⁿ, m̄ thang lún. '
1:22 " Hit sî, lín lóng lâi kìⁿ góa, kóng, ' Lán tio̍h chhe lâng tāi-seng khì, kā lán thàm-khòaⁿ hit-ê tē, kā lán hôe-hok, khòaⁿ lán sī tio̍h tùi siáⁿ-mi̍h lō͘ kiâⁿ-.khì, tùi siáⁿ-mi̍h siâⁿ ji̍p-.khì. '
1:23 " Che ōe góa khòaⁿ-chò sī hó, góa chiū tùi lín tiong-kan kéng-soán cha̍p-jī-ê lâng, múi chi-cho̍k chi̍t-ê lâng.
1:24 In chiū oa̍t tńg-sin chiūⁿ soaⁿ-tē khì, lâi-kàu E-si-kol ê soaⁿ-kok, thàm-khòaⁿ hit só͘-chāi.
1:25 In chhiú-.ni̍h the̍h hit só͘-chāi ê kóe-chí, tòa lâi-kàu lán hia, kā lán hôe-hok, kóng, ' Siōng-chú — lán ê Siōng-tè só͘ siúⁿ-sù hō͘ lán ê, sī hó ê thó͘-tē. '
1:26 " Chóng-.sī, lín m̄-khéng khì, ûi-pōe Siōng-chú — lín ê Siōng-tè ê kài-bēng,
1:27 koh tī lín ê pò͘-pêⁿ lāi ai-oàn kóng, ' In-ūi Siōng-chú oàn-hūn lán, só͘-í, chhōa lán chhut Ai-gi̍p tē, beh kā lán kau tī A-mô͘-lī lâng ê chhiú, lâi kā lán châu-bia̍t.
1:28 Lán beh kiâⁿ-khì tó-ūi? Lán ê hiaⁿ-tī hō͘ lán sit-chì, kóng, ' Hia ê jîn-bîn pí lán khah tōa koh khah lò, siâⁿ khoah-tōa koh kian-kò͘, koân kàu tú thiⁿ, goán koh tī hia khòaⁿ tio̍h A-lap cho̍k ê lâng. '
1:29 " Góa chiū tùi lín kóng, ' M̄-thang lún, m̄-bián kiaⁿ in.
1:30 Kiâⁿ tī lín ê bīn-chêng ê Siōng-chú — lín ê Siōng-tè, ē thè lín kau-chiàn, chhin-chhiūⁿ I tī Ai-gi̍p ūi tio̍h lín lâi kiâⁿ tī lín ba̍k-chiu chêng it-chhè ê tāichì.
1:31 Koh chhin-chhiūⁿ I kiâⁿ tī khòng-iá, tī hia lí khòaⁿ tio̍h Siōng-chú — lí ê Siōng-tè tī lí só͘ kiâⁿ it-chhè ê lō͘ ū án-chóaⁿ āiⁿ lí, chhin-chhiūⁿ lâng teh āiⁿ i ê kiáⁿ, it-ti̍t kàu lín lâi-kàu tī chit-ê só͘-chāi. '
1:32 Chóng-.sī, lín tī chit-ê tāichì téng-bīn m̄-sìn Siōng-chú — lín ê Siōng-tè.
1:33 I tī lō͘-.ni̍h, tī lín ê thâu-chêng teh kiâⁿ, kā lín chhōe chat iâⁿ ê só͘-chāi; àm-sî ēng hóe, ji̍t-sî ēng hûn, chí-sī lín só͘ tio̍h kiâⁿ ê lō͘. "
1:34 Siōng-chú Chhú-hoa̍t I-su-la-el Lâng
( BSK 14: 20-45)
" Siōng-chú thiaⁿ tio̍h chiahê ōe ê siaⁿ chiū siū-khì, chiùchōa kóng,
1:35 ' Chit-ê pháiⁿ sè-tāi ê lâng choa̍t-tùi bô chi̍t-ê ē-tàng khòaⁿ tio̍h Góa chiùchōa beh siúⁿ-sù hō͘ lín chó͘-sian ê hó tē;
1:36 Chí-ū E-hun-neh ê kiáⁿ Ka-le̍p ē-tàng khòaⁿ-.tio̍h, Góa koh beh ēng i só͘ ta̍h tio̍h ê tē siúⁿ-sù hō͘ i kah i ê kiáⁿ-sun, in-ūi i ū choan-sim kin-tòe Siōng-chú. '
1:37 " Siōng-chú ūi tio̍h lín ê iân-kò͘ mā siū-khì góa, kóng, ' Lí mā bē tàng ji̍p-khì hit-ê só͘-chāi.
1:38 Kin-tòe lí ê, Nùn ê kiáⁿ Io-siú-ah, i ē-tàng ji̍p-khì hia; lí tio̍h ióng-chòng i ê sim-chì, in-ūi i beh hō͘ I-su-la-el lâng sêng-chiap hit-ê só͘-chāi.
1:39 " Koh ū lín ê gín'á, to̍h-sī lín só͘ kóng beh siū lia̍h ê kah kin-á-ji̍t lín hiahê bē hiáu hó-pháiⁿ ê kiáⁿ-jî, ē-tàng ji̍p-khì hia. Góa beh kā hit só͘-chāi hō͘ in, in ē tit tio̍h lâi chò sán-gia̍p.
1:40 Kóng tio̍h lín, lín tio̍h oa̍t tò tńg-lâi chhut-hoat, tùi Âng-hái ê lō͘ khì khòng-iá. '
1:41 " Hit sî, lín ìn góa kóng, ' Goán tek-chōe Siōng-chú, taⁿ goán beh chiàu Siōng-chú — goán ê Siōng-tè it-chhè só͘ bēng-lēng ê khì kau-chiàn. ' Tùi hit sî khí, lín ta̍k lâng chiū tòa kun-khì, sûi-piān ji̍p-khì soaⁿ-tē.
1:42 " Siōng-chú kā góa kóng, ' Lí tio̍h kā in kóng: M̄-thang khì, mā m̄ thang kau-chiàn, in-ūi Góa bô tī lín tiong-kan, khióng-kiaⁿ lín ē thâi-su tùi-te̍k. '
1:43 Góa chiū kā lín kóng, chóng-.sī, lín m̄-thiaⁿ, lín pōe-ge̍k Siōng-chú ê bēng-lēng, ngē-ngē beh khì soaⁿ-tē.
1:44 Tòa tī soaⁿ-.ni̍h ê A-mô͘-lī lâng chiū chhut-lâi kā lín kong-kek, chhin-chhiūⁿ phang teh jiok lín, tī Se-il thâi-iâⁿ lín, it-ti̍t kàu Hol-mah.
1:45 Lín chiū tò tńg-.lâi, tī Siōng-chú ê bīn-chêng thî-khàu; chóng-.sī, Siōng-chú m̄-thiaⁿ lín ê siaⁿ, mā m̄ àⁿ hīⁿ-khang ǹg lín.
1:46 Án-ne, lín chiū tòa tī Ka-té-si chin chē ji̍t. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。