申命記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
1:1 序言
摩西tī約旦河外，tī曠野Só͘-hut對面ê亞拉巴，to̍h是tī巴蘭、Tô-hut、拉班、哈洗錄、Tí-sat-hap ê中間，對以色列ê民眾所講ê話，記tī下底。
1:2 Tùi何烈經過西珥山ê路到Ka-te-su-pa-nî-a，有十一日ê路程。
1:3 Tī第四十年ê十一月初一，摩西照上主一切所命令伊ê，lóng kā以色列人講。
1:4 Hit時，伊已經phah贏tòa tī希實本ê亞摩利王西宏，kah tòa tī 以得來kah亞斯他錄ê巴珊王噩。
1:5 摩西tī約旦河外ê摩押地，開始傳chitê律法講：
1:6 「上主—咱ê上帝tī何烈吩咐咱講：Lín tòa tī chitê山已經真久à，
1:7 tio̍h出發oa̍t-tńg到亞摩利人ê山地，kah近óa hia ê ta̍k所在，tī亞拉巴，tī山地，tī平原，tī南方，沿海一帶，迦南人ê地，kah黎巴嫩，koh到大河，to̍h是幼發拉底大河。
1:8 Taⁿ我kā chitê地排列tī lín ê面前，lín tio̍h入去得tio̍h它來做產業，to̍h是上主對lín ê祖先，亞伯拉罕、以撒、雅各chiùchōa beh賞賜hō͘ in kah in ê kiáⁿ孫ê地。」
1:9 摩西指派審判官
(出18：13-27)
摩西對人民講：「Hit時，我kā lín講：『Lín ê責任，我kakī 一个擔當bē起。
1:10 上主—lín ê上帝hō͘ lín加添真chē，你看，lín今á日親像天頂ê星hiah chē。
1:11 願上主—lín祖先ê上帝，hō͘ lín比現今加千倍chē，mā照祂所應允lín ·ê賜福hō͘ lín。
1:12 Lín ê重擔，lín ê責任，kah lín ê冤家，我kakī 一个人ná擔當會起？
1:13 Lín tio̍h照ta̍k支族來揀選有智慧、有見識koh有名望ê人，thang hō͘我來kā in設立做lín ê首領。』
1:14 「Lín應我講：『你所講ê是好，thang ánne來行。』
1:15 Lín ta̍k支族ê首領，to̍h是有智慧kah有名望ê人，我ē kā in設立做首領，to̍h是營長、連長、排長、班長kah官員，照lín ê支族，來管理lín。
1:16 「當時，我命令lín ê審判官講：：『Lín tī lín兄弟中審判，若有人kah伊ê兄弟，á是kah in中間ê出外人有相告，tio̍h照公道來判斷。
1:17 審判ê時，m̄ thang看人ê外貌，弱kah強tio̍h平平聽in ê話；m̄ thang驚人，因為審判屬tī上帝。Lín若有oh得解決ê tāichì，hō͘伊來到我chia，我to̍h kā伊判斷。』
1:18 Hit時，我ē kā lín所應該行ê tāichì lóng kā lín命令。」
1:19 Tī加低斯巴尼亞派人去探迦南地
(民13：1-33)
「咱照上主—咱ê上帝所命令咱ê，tùi 何烈出發，經過lín所看tio̍h hitê大koh thang驚ê曠野，tùi亞摩利人ê山地行路，咱to̍h來到加低斯巴尼亞。
1:20 我對lín講：『Lín已經來到上主—咱ê上帝賞賜hō͘咱ê亞摩利人ê山地。
1:21 你看，上主—lín ê上帝已經kā hitê地排列tī你ê面前，你tio̍h照上主—你ê祖先ê上帝所對你講ê，去hia來得tio̍h它做產業；m̄免驚，m̄ thang懍。』
1:22 「Hit時，lín lóng來見我，講：『咱tio̍h差人tāi先去，kā咱探看hitê地，kā咱回覆，看咱是tio̍h tùi啥物路行去，tùi啥物城入去。』
1:23 「這話我看做是好，我to̍h tùi lín中間揀選十二個人，每支族一个人。
1:24 Into̍h oa̍t-tńg身上山地去，來到以實各ê山谷，探看hit所在。
1:25 In手裡the̍h hit所在ê果子，帶來到咱hia，kā咱回覆，講：『上主—咱ê上帝所賞賜hō͘咱ê，是好ê土地。』
1:26 「總是，lín m̄肯去，違背上主—lín ê上帝ê誡命，
1:27 koh tī lín ê布棚內哀怨講：『因為上主怨恨咱，所以，chhōa咱出埃及地，beh kā咱交tī亞摩利人ê手，來kā咱剿滅。
1:28 咱beh行去tó位？咱ê兄弟hō͘咱失志，講：『Hia ê人民比咱khah大koh khah lò，城闊大koh堅固，高到抵天，阮koh tī hia看tio̍h亞納族ê人。』
1:29 「我to̍h對lín講：『M̄-thang懍（lún），m̄免驚in。
1:30 行tī lín ê面前ê上主—lín ê上帝，會替lín交戰，親像祂tī埃及為tio̍h lín來行tī lín目chiu 前一切ê tāichì。
1:31 Koh親像祂行tī曠野，tī hia你看tio̍h上主—你ê上帝tī你所行一切ê路有án怎偝（āiⁿ）你，親像人teh偝伊ê kiáⁿ，一直到lín來到tī chitê所在。』
1:32 總是，lín tī chitê tāichì頂面m̄信上主—lín ê上帝。
1:33 祂tī路裡，tī lín ê頭前teh行，kā lín chhōe紮營ê所在；暗時用火，日時用雲，指示lín所tio̍h行ê路。」
1:34 上主處罰以色列人
(民14：20-45)
「上主聽tio̍h chiahê話ê聲就受氣，chiùchōa講：
1:35 『Chitê pháiⁿ世代ê人絕對無一个ē tàng看tio̍h我chiùchōa beh賞賜hō͘ lín祖先ê好地；
1:36 只有耶孚尼ê kiáⁿ迦勒ē tàng看tio̍h，我koh beh用伊所踏tio̍h ê地賞賜hō͘伊kah伊ê kiáⁿ孫，因為伊有專心跟tòe上主。』
1:37 「上主為tio̍h lín ê緣故mā受氣我，講：『你mā bē tàng入去hitê所在。
1:38 跟tòe你ê，嫩ê kiáⁿ約書亞，伊ē tàng入去hia；你tio̍h勇壯伊ê心志，因為伊beh hō͘以色列人承接hitê所在。
1:39 「Koh有lín ê gín-á，to̍h是lín所講beh受掠ê，kah今á日lín hiahê bē曉好pháiⁿ ê kiáⁿ兒，ē tàng入去hia。我beh kā hit所在hō͘ in，inē得tio̍h來做產業。
1:40 講tio̍h lín，lín tio̍h oa̍t倒tńg來出發，tùi紅海ê路去曠野。』
1:41 「Hit時，lín應我講：『阮得罪上主，taⁿ阮beh照上主—阮ê上帝一切所命令ê去交戰。』Tùi hit時起，lín ta̍k人to̍h帶軍器，隨便入去山地。
1:42 「上主kā我講：『你tio̍h kā in講：M̄-thang去，mā m̄ thang交戰，因為我無tī lín中間，恐驚lín會thâi輸對敵。』
1:43 我to̍h kā lín講，總是，lín m̄聽，lín悖逆上主ê命令，硬硬beh去山地。
1:44 Tòa tī山裡ê亞摩利人to̍h出來kā lín攻擊，親像蜂teh jiok lín，tī西珥thâi贏lín，一直到何珥瑪。
1:45 Lin2to̍h倒tńg來，tī上主ê面前啼哭；總是，上主m̄聽lín ê聲，mā m̄ àⁿ耳孔ǹg lín。
1:46 Án-ne，lín to̍htoa3 tī加低斯真chē日。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。