創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
19:1 所多瑪ê罪惡
日暗了後，hit兩 个使者來到所多瑪。羅得坐tī所多瑪ê城門裡，羅得看tio̍h in，to̍h起來kā in迎接，面ǹg地鞠躬，
19:2 講：「我ê主，請oat來奴僕ê厝歇暝、洗腳；明á早起起來，chiah行lín ê路。」In講：「M̄免，阮beh tī大街路過暝。」
19:3 羅得迫切請in，in chiah oa̍t-tńg身，oat入去伊ê厝；羅得為in準備宴席，煏無酵餅，in to̍h食。
19:4 In iáu未去睏，城內ê人，to̍h是所多瑪人，tùi少年到年老，四面來圍伊ê厝；
19:5 叫羅得講：「今暗到你chia ê人tī tó位？Hō͘ in出來，thang照阮所ài做ê。」
19:6 羅得出去到門外群眾hia，to̍h kā門關起來，
19:7 講：「兄弟，請lín m̄ thang做chit款pháiⁿ tāichì。
19:8 你看，我有兩 个chabó͘ kiáⁿ iáu是在室女；請容允我chhōa in 出來，chhut-chāi lín所ài來行；獨獨chit兩 个人，已經到我ê厝，lín m̄ thang對in做啥物。」
19:9 眾人講：「你退去！」Koh講：「Chitê人寄腳tī chia，續beh kā阮管轄？Taⁿ阮beh害你比害in khah傷重。」就挨kheh羅得，進前beh攻破伊ê門。
19:10 總是，hit兩 个人伸手，牽羅得入去厝內，kā門關起來。
19:11 In koh hō͘門外ê人，tùi細到大，目chiu 眩眩，lóng看bē tio̍h；chhōe到倦，mā chhōe無門。
19:12 羅得離開所多瑪
Hit兩人對羅得講：「你tī chia iáu有啥人？你ê kiáⁿ婿，á是kiáⁿ，á是chabó͘ kiáⁿ，以及城內一切屬你ê人，你tio̍h hō͘ in lóng離開chit所在，
19:13 阮beh剿滅chitê所在，因為chitê城犯罪ê聲tī上主ê面前真大，上主差阮來beh kā chitê城剿滅。」
19:14 羅得出去，對娶伊ê chabó͘ kiáⁿ ê kiáⁿ婿講：「Lín起來，離開chia，因為上主beh滅亡chitê城。」伊ê kiáⁿ婿掠做伊是teh講笑。
19:15 天光，使者催逼羅得講：「起來！Chhōa你ê bó͘，以及你tī chia兩 个chabó͘ kiáⁿ出去。若無，恐驚inē kah chitê城ê罪惡做伙受滅亡。」
19:16 羅得延chhiân無行動。Hit兩 个人，因為上主憐憫羅得，就牽伊ê手kah伊ê bó͘ ê手，kah伊兩 个chabó͘ kiáⁿ ê手，kā in chhōa出去，安置tī城外。
19:17 Chhōa in出去了後，其中一个使者講：「你tio̍h逃命，m̄ thang oa̍t頭看，mā m̄ thang tòa tī平原，tio̍h走去山裡。若無，恐驚línē受滅亡。」
19:18 羅得對in講：「我ê主ah，m̄ thang ánne做。
19:19 你看！你ê奴僕已經tī你ê面前得tio̍h恩典，你mā對我顯出極大ê仁慈，救我ê性命。我bē tàng走到山裡，恐驚chitê災禍會臨到我，我to̍h死。
19:20 你看！Chitê城近近，我thang逃走去hia，而且Chitê城mā是細ê。請容允我逃閃tī hia，來保全我ê活命；chitê城kám m̄是細ê？」
19:21 上主對伊講：「Chitê tāichì，我mā允准你；你所講ê城，我無beh kā她chhia倒。
19:22 你tio̍h趕緊走去hia，因為你iáu未到hia，我bē tàng做啥物。」因為ánne，hitê城名叫做瑣珥。
19:23 所多瑪kah蛾摩拉ê末日
羅得來到瑣珥，日頭已經出來。
19:24 Hit時，上主kā硫磺kah火，tùi天頂，tùi上主hia，降落tī所多瑪kah蛾摩拉，
19:25 kā hiahê城kah全平原，以及城內所有ê人民，連地面上生長ê lóng毀壞。
19:26 羅得ê bó͘ tī後面，一下oa̍t頭看，to̍h變做一支鹽柱。
19:27 亞伯拉罕透早起來，到伊前日khiā tī上主ê面前hit所在，
19:28 伊ǹg所多瑪kah蛾摩拉，以及平原ê全地看去，看tio̍h hit所在火煙chhèng koân，親像火爐ê煙。
19:29 當上帝剿滅平原chiahê城ê時，上帝數念亞伯拉罕；tútú tī chhia倒羅得所tòa ê城ê時，to̍h kā羅得tùi chhia倒ê中間救出去。
19:30 摩押人kah亞捫人ê祖先
羅得tiàm tī 瑣珥有驚惶，to̍h kah伊兩 个chabó͘ kiáⁿ tùi瑣珥上去tiàm tī山裡；伊kah兩 个chabó͘ kiáⁿ tiàm tī一个洞內。
19:31 大chabó͘ kiáⁿ對細漢chabó͘ kiáⁿ講：「咱ê老父老ā，地chiūⁿkoh無人kah咱做匹配，來行人道。
19:32 來，咱thang hō͘老父lim酒，kah伊做伙睏；ánne，咱好thang tùi伊留存kiáⁿ孫。」
19:33 Hit暝，in hō͘老父lim酒，大chabó͘ kiaN2to̍h入去kah老父做伙睏；她tang時去睏，tang時起來，老父lóng m̄知。
19:34 隔tńg工，大chabó͘ kiáⁿ kā細chabó͘ kiáⁿ講：「我昨暝kah老父做伙睏，今暗咱koh hō͘伊lim酒，你thang入去kah伊做伙睏。Án-ne，咱好thang tùi老父留存kiáⁿ孫。」
19:35 Hit暝，in koh hō͘老父lim酒，細chabó͘ kiáⁿ入去kah伊睏；伊tang時去睏，tang時起來，老父mā lóng m̄知。
19:36 Án-ne，羅得兩 个chabó͘ kiáⁿ lóng tùi in老父來懷孕。
19:37 大ê生kiáⁿ，kā伊號名叫做摩押，to̍h是現今摩押人ê祖先。
19:38 細漢ê mā生kiáⁿ，kā伊號名叫做Biān-am-mih，to̍h是現今亞捫人ê祖先。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。