民數記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
35:1 分配hō͘利未人ê城
上主tī摩押ê平原，約旦河邊，耶利哥城對面，吩咐摩西講：
35:2 「你命令以色列人，tio̍h tùi in所得tio̍h ê產業，用城hō͘利未人tòa，mā tio̍h用城四箍圍ê郊野hō͘利未人。
35:3 城beh hō͘ in tòa，郊野beh做in ê牛、羊、財物kah ta̍k種chengseⁿ ê路用。
35:4 Lín所hō͘利未人城外ê郊野，tùi城腳四箍圍量出一千肘。
35:5 你tī城外量，東pêng二千肘，南pêng二千肘，西pêng二千肘，北pêng二千肘，城tī中央；這是beh hō͘ in做城ê郊野。
35:6 Lín所hō͘利未人hiahê城，其中tio̍h有六個逃閃ê城；lín tio̍h ánne設立，hou7thâi死人ê thang逃走去hia；chiahê以外，tio̍h koh hō͘ in四十二個城。
35:7 Lín tio̍h hō͘利未人ê城，總共四十八個；城kah郊野，lóng tio̍h hō͘ in。
35:8 講tio̍h lín tùi以色列人ê產業中，所hō͘利未人ê城，tùi產業chē ê，取khah chē城，tùi產業少ê，取少；各照所承接ê產業撥出城來hō͘利未人。」
35:9 逃閃ê城
(申19：1-13；書20：1-9)
上主吩咐摩西講：
35:10 「你tio̍h吩咐以色列人，kā in講：Lín過約旦河，入去迦南地，
35:11 to̍h tio̍h撥出幾個城，hō͘ lín做逃閃ê城，hō͘失誤thâi死人ê兇手thang逃走去hia。
35:12 Chiahê城thang hō͘ lín閃避hitê報仇ê人，hō͘兇手無致到死，thèng候伊khiā tī會眾ê面前受審判。
35:13 Lín所撥出來ê城，tio̍h做lín六個逃閃ê城。
35:14 Tī約旦河外tio̍h撥出三个城，tī迦南地mā tio̍h撥出三个城，做逃閃ê城。
35:15 Chit六個城tio̍h hō͘以色列人kah in中間ê出外人，以及寄腳ê做逃閃ê路用，hō͘失誤thâi人ê thang走去hia。
35:16 「設使人用鐵器phah人致使死，伊to̍h是凶犯，凶犯一定tio̍h hō͘伊死。
35:17 伊ê手若用ē hō͘人死ê石頭tìm人，致使人死，伊to̍h是凶犯，凶犯一定tio̍h死。
35:18 伊ê手若用ē hō͘人死ê柴phah人，致使人死，伊to̍h是凶犯，凶犯一定tio̍h死。
35:19 報仇ê，本身tioh8thâi死hitê凶犯；一下tú tio̍h伊to̍htioh8 kā伊thâi死。
35:20 「人若怨恨hitê人來kā伊chhia倒，á是bih teh用物kā伊tìm，致使死，
35:21 kiámchhái因為拾恨用手phah人致使死，hitê phah人ê就一定tio̍h死，因為伊真正是凶犯，報仇ê tú tio̍h凶犯，to̍h kā伊thâi死。
35:22 「設使人無拾恨，忽然kā伊phah倒，á是無bih teh，用物kā伊tìm，
35:23 á是無看tio̍h ê時，用會phah死人ê石頭tìm tio̍h伊，來致使死，kah伊本無冤仇，mā無意思beh害伊，
35:24 會眾to̍h tio̍h照hiahê法度，tī phah死人ê kah報仇ê ê中間kā伊審判。
35:25 會眾tio̍h救hitê失誤thâi人ê脫離報人命ê ê手；會眾mā tio̍h hō͘伊倒tńg去伊所走入逃閃ê城，伊tio̍h tòa tī hit內面，thèng候到抹聖油ê大祭司死。
35:26 總是，失誤thâi死人ê，無論án怎，若出去伊所走入逃閃ê城ê境外，
35:27 報仇ê若tī逃閃ê城ê境外tú tio̍h伊，來thâi死hitê凶犯，報仇e5to̍h無thâi死人ê罪。
35:28 因為伊應該tio̍h tòa伊逃閃ê城，thèng候大祭司死；大祭司死了後，失誤thâi人ê chiah thang tńg去伊產業ê地。
35:29 這tī lín一切tòa ê所在beh做lín ta̍k世代ê律例。
35:30 「見若thâi死人，hitê凶犯tio̍h照幾nā个見證人ê話來hō͘伊死；若只有一个人做見證，to̍h m̄ thang hō͘人死。
35:31 thâi死人犯tio̍h死罪ê，lín m̄ thang收贖回性命ê價錢，一定tio̍h hō͘伊死。
35:32 Hitê走到逃閃ê城ê人，lín m̄ thang kā伊the̍h贖回ê價，hō͘伊tī祭司未死ê chìn前，koh來tòa本地。
35:33 Án-ne，lín to̍h無òe lahsap lín所tòa ê地，因為血是òe lahsap地ê；若有血流tī地裡，設使m̄是流hitêthâi人ê ê血，hitê地to̍h bē tàng清氣。
35:34 Lín m̄ thang òe lahsap lín所tòa ê地，to̍h是我tiàm tī hit中間ê地，因為我—上主tiàm tī以色列人ê中間。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。