創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
18:1 上帝應允亞伯拉罕生kiáⁿ
上主tī幔利ê橡樹hia，對亞伯拉罕出現。Hit時，日當熱，亞伯拉罕坐tī布棚門口，
18:2 gia̍h頭起來看，看tio̍h三个人tī對面teh khiā。伊一下看tio̍h，to̍h tùi布棚門口，走去kā in迎接，
18:3 仆tī地裡，講：「我ê主，我若tī祢ê面前得tio̍h恩典，求你m̄ thang離開祢ê奴僕做你去。
18:4 容允我the̍h淡薄á水hō͘ lín洗腳，請歇睏tī樹腳。
18:5 我koh the̍h淡薄á餅hō͘ lín做點心，然後chiah 進前去。Lín既然來到阮chia，請接受lín ê奴僕ê款待。」In講：「Τhang照你ê話去行。」
18:6 亞伯拉罕趕緊入去布棚，見tio̍h撒拉，講：「你趕緊用三人份ê好麵粉，nóa做餅。」
18:7 亞伯拉罕koh走到牛群ê所在，牽一隻chíⁿ koh好ê牛á來，交hō͘奴僕，伊to̍h趕緊去準備。
18:8 亞伯拉罕koh the̍h奶油kah奶，kah所準備ê牛á來，排tī in ê面前，kakī tī樹腳khiā tī in ê身邊，in to̍h食。
18:9 In問伊講：「你ê bó͘撒拉tī tó位？」伊應講：「Tī布棚內。」
18:10 In中間一个講：「時間到，我一定ēkoh來你chia；你ê bó͘撒拉會生一个kiáⁿ。」撒拉tī後面布棚門口ê所在teh聽。
18:11 亞伯拉罕kah撒拉ê年歲已經老，撒拉ê月經mā已經停。
18:12 撒拉心內笑講：「我已經衰lám，我ê主mā老ā，kám iáu有chit款ê歡喜？」
18:13 上主對亞伯拉罕講：「撒拉是án怎teh笑，講：『我已經老ā，kám真正iáu會生kiáⁿ？』
18:14 上主kám有做bē到ê tāichì？時間若到，明年ê chit時，我ēkoh來你chia，撒拉會生一个kiáⁿ。」
18:15 撒拉驚一下，m̄承認，講：「我無笑。」Hitê人講：「無影，你實在有笑。」
18:16 亞伯拉罕為所多瑪哀求
Hiahê人to̍h tùi hia起來，ǹg所多瑪去，亞伯拉罕mā kah in做伙行，beh送in一站。
18:17 上主講：「我所beh做ê tāichì，kám thang對亞伯拉罕掩蓋？
18:18 因為亞伯拉罕一定ē成做強大ê國，地chiūⁿ萬國ē因為伊來得tio̍h福氣。
18:19 我kah伊深交，是beh hō͘伊命令伊ê kiáⁿ kah伊ê家眷，hō͘ in久長守上主ê道理，秉公行義；thang hō͘上主指亞伯拉罕所應允ê話，lóng歸hō͘伊。」
18:20 上主講：「所多瑪kah蛾摩拉喝喊 ê聲真大，in ê罪惡實在重。
18:21 我taⁿ beh落去，看in所行ê，是m̄是有全部kah我所聽ê仝款；若無仝款，我mā ē知。」
18:22 Hiahê人tùi hia oa̍t-tńg身，ǹg所多瑪去；亞伯拉罕iáu khiā tī上主ê面前。
18:23 亞伯拉罕行óa來，講：「好人kah pháiⁿ人，祢kám lóng beh剿滅？
18:24 設使城內有五十個好人，祢kám猶原beh剿滅hit所在？Kám無beh為tio̍h城內chit五十個好人來kā in赦免？
18:25 願祢絕對無ánne行，kā好人kah pháiⁿ人做一下害死；致使好人kah pháiⁿ人相同。願祢絕對無ánne行；審判全地ê主kám無行公義？」
18:26 上主講：「我若tī所多瑪城內有tú tio̍h五十個好人，我to̍h為tio̍h in ê緣故來寬容hit所在。」
18:27 亞伯拉罕應講：「我雖然是火灰土沙粉，iáu koh敢對主講話。
18:28 設使chiahê五十個好人欠五個，祢kámē因為欠五個，來剿滅全城？」上主講：「我tī hia若tú tio̍h有四十五個，mā無beh剿滅。」
18:29 亞伯拉罕koh對祂講：「設使tī hia tú tio̍h四十個neh？」上主講：「為tio̍h chiahê四十個ê緣故，我mā無beh做chitê tāichì。」
18:30 亞伯拉罕koh講：「求主m̄ thang受氣，我beh koh講，設使tī hia若tú tio̍h三十個neh？」上主講：「我tī hia若tú tio̍h有三十個，我mā無beh做chitê tāichì。」
18:31 亞伯拉罕講：「我iáu koh敢對主講：設使tī hia有tú tio̍h二十個neh？」上主講：「為tio̍h chiahê二十個ê緣故，我mā無beh kā in剿滅。」
18:32 亞伯拉罕講：「求主m̄ thang受氣，我koh講一pái：設使tī hia 有tú tio̍h十個neh？」上主講：「為tio̍h chiahê十個ê緣故，我mā無beh kā in剿滅。」
18:33 上主kah亞伯拉罕講了後，to̍h chiūⁿ天去；亞伯拉罕mā tńg去伊ê所在。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。