民數記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
27:1 西羅非哈ê Cha-bó͘ kiáⁿ
屬約瑟ê kiáⁿ 瑪拿西ê族，有瑪拿西ê玄孫，瑪吉ê干á孫，基列ê孫，希弗ê kiáⁿ，西羅非哈 ê chabó͘ kiáⁿ，名叫做瑪拉、No-ah、曷拉、密迦、得撒。
27:2 In進前來，khiā tī會幕門口，tī摩西kah祭司亞倫、以利亞撒，以及眾首領，kah會眾ê面前，講：
27:3 「阮老父死tī曠野，伊m̄是tī可拉ê黨內，無kah in仝黨做伙攻擊上主；是tī kakī ê罪中死；伊mā無kiáⁿ。
27:4 Náē因為阮老父無kiáⁿ，to̍h kā伊ê名tùi伊ê族中除去？請tī阮老父ê兄弟中分產業hō͘阮。」
27:5 摩西to̍h kā in ê案件排列tī上主ê面前。
27:6 上主吩咐摩西講：
27:7 「西羅非哈ê chabó͘ kiáⁿ所講ê有情理，你一定tio̍h tī in老父ê兄弟中，分地hō͘ in做產業，tio̍h kā in老父ê產業歸hō͘ in。
27:8 你mā tio̍h吩咐以色列人講：「人若死無kiáⁿ，to̍h tio̍h kā伊ê產業歸hō͘伊ê chabó͘ kiáⁿ。
27:9 伊若無chabó͘ kiáⁿ，to̍h tio̍h kā伊ê產業hō͘伊ê兄弟。
27:10 伊若無兄弟，to̍h tio̍h kā伊ê產業hō͘伊ê老父ê兄弟。
27:11 伊ê老父若無兄弟，to̍h tio̍h kā伊ê產業hō͘伊ê族中至親ê，伊to̍h得tio̍h做產業。這beh做以色列人斷定tio̍h ê例；是照上主所吩咐摩西ê。
27:12 約書亞Hông揀選做摩西ê繼承人
(申31：1-8)
上主對摩西講：「你上chitê亞巴琳ê山，看我賞賜以色列人ê地。
27:13 看了後你mā ē死亡，親像你ê阿兄亞倫tńg去相siâng。
27:14 因為lín tī尋ê曠野，當會眾計較ê時，違背我ê話，無tī chhèng出水ê所在，會眾ê面前，遵我做聖。(Chitê水to̍h是tī尋ê曠野，加低斯ê米利巴ê水。)
27:15 摩西對上主講：
27:16 「賞賜活命hō͘見若有肉體ê上帝—上主ah，願祢設立一个人來治理會眾，
27:17 thang tī in ê面前出去，mā tī in ê面前入來，thang chhōa in出去，mā chhōa in入來，免得上主ê會眾親像無牧者ê羊群。」
27:18 上主對摩西講：「嫩ê kiáⁿ約書亞，伊ê心內有聖神，你chhōa伊來，tī伊ê頂面hōaⁿ手，
27:19 hō͘伊khiā tī祭司以利亞撒kah全會眾ê面前，用職任命令伊。
27:20 Koh kā你ê榮光分hō͘伊，hō͘以色列ê全會眾lóng遵thàn伊。
27:21 伊tio̍h khiā tī祭司以利亞撒ê面前，以利亞撒tio̍h照烏陵ê判斷，tī上主ê面前，替伊求問；伊kah以色列全會眾lóng tio̍h照伊ê命令來出，照伊ê命令來入。」
27:22 摩西就照上主所命令伊ê去做；伊chhōa約書亞來，hō͘伊khiā tī祭司以利亞撒kah全會眾ê面前，
27:23 tī伊ê頂面hōaⁿ手，用命令交託伊；是照上主託摩西所講ê話。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。