民數記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
18:1 Chè-si kah Lē-bī Lâng ê Chit-chek
Siōng-chú tùi A-lông kóng, " Lí kah lí chiahê kiáⁿ kah lí ê pún cho̍k, tio̍h chò-hóe tam-tng sèng-só͘ ê chōe; lí kah lí chiahê kiáⁿ mā tio̍h tam-tng lín chè-si-chit ê chōe.
18:2 Lí tio̍h chhōa lí ê hiaⁿ-tī Lē-bī ê chi-cho̍k, lí ê chó͘-sian ê chi-cho̍k, chìn-chêng lâi, hō͘ in kah lí liân-ha̍p lâi sū-hāu lí; m̄ koh, lí kah lí ê kiáⁿ, lóng tio̍h tī hoat-kūi ê hōe-bō͘ chêng.
18:3 In tio̍h chò lí ê chhe-ēng, mā tio̍h chò pò͘-pêⁿ ê chhe-ēng, to̍k-to̍k m̄ thang óa-kīn sèng-só͘ ê khì-kū kah tôaⁿ, bián-tit in kah lín lóng sí.
18:4 In tio̍h kah lí liân-ha̍p, mā tio̍h chò hōe-bō͘ ê chhe-ēng, liāu-lí pò͘-pêⁿ só͘-ū ê kang; chóng-.sī, gōa-bīn lâng m̄ thang óa-kīn lín.
18:5 Lín tio̍h chò sèng-só͘ ê chhe-ēng kah tôaⁿ ê chhe-ēng, bián-tit siū-khì koh kàu tī I-su-la-el lâng.
18:6 Lí khòaⁿ, Góa bat tùi I-su-la-el lâng ê tiong-kan kéng-soán lín ê hiaⁿ-tī Lē-bī lâng, lâi siúⁿ-sù hō͘ lín kah kui Siōng-chú, lâi liāu-lí hōe-bō͘ ê kang.
18:7 Só͘-í, lí kah lí ê kiáⁿ tio̍h chò-hóe siú chè-si ê chit, liāu-lí tôaⁿ kah tiùⁿ-lî lāi só͘-ū ê kang. Lín tio̍h ánne ho̍k-bū, Góa í-keng chhin-chhiūⁿ sàng mi̍h-kiāⁿ hō͘ lín lâi siúⁿ-sù hō͘ lí chè-si chit-chek ê kang. Kiàn-nā gōa-bīn lâng kīn-óa ê, it-tēng hō͘ i sí.
18:8 Chè-si Èng-tit ê Mi̍h
Siōng-chú koh kā A-lông kóng, " Lí khòaⁿ, Góa í-keng ēng hiàn hō͘ Góa ê kí-chè, to̍h-sī I-su-la-el lâng hun-pia̍t chò sèng ê mi̍h, kau lí lâi pó-siú; in-ūi lí siū boah iû, chiahê mi̍h kui lí kah lí ê kiáⁿ-sun, chò éng-oán ê hūn-gia̍h.
18:9 Bô keng-kòe hóe, chì-sèng ê mi̍h ê tiong-kan, sio̍k tī lí ê sī chiahê: kiàn-nā in ê lé-mi̍h, in ê sò͘-chè, in ê sio̍k-chōe-chè, in ê pó͘ kòe-si̍t chè, in só͘ hiàn hō͘ Góa ê, lóng chò chì-sèng, kui hō͘ lí kah lí ê kiáⁿ-sun.
18:10 Lí tio̍h khòaⁿ chiahê mi̍h chò chì-sèng lâi chia̍h, kiàn-nā chapo͘ teng lóng thang chia̍h, lí tio̍h lia̍h chit-ê mi̍h chò sèng.
18:11 " Chiahê mā sī lí ê, lé-mi̍h ê kí-chè í-ki̍p I-su-la-el lâng só͘ hiàn ê iô-chè, Góa lóng siúⁿ-sù hō͘ lí kah lí ê kiáⁿ-jî, chò éng-oán ê hūn-gia̍h; kiàn-nā tī lí chhù lāi chheng-khì ê lâng lóng thang chia̍h.
18:12 " Siōng hó ê iû, siōng hó ê chiú, siōng hó ê ngó͘-kok, to̍h-sī in khí-thâu se̍k hiàn hō͘ Siōng-chú ê, Góa lóng siúⁿ-sù hō͘ lí.
18:13 In ê tē khí-thâu se̍k ê mi̍h, só͘ hiàn hō͘ Siōng-chú ê, lóng kui hō͘ lí; lí chhù lāi chheng-khì ê lâng lóng thang chia̍h.
18:14 " I-su-la-el tiong só͘-ū hun-pia̍t chò sèng hiàn hō͘ Góa ê, lóng tio̍h kui hō͘ lí.
18:15 " Kiàn-nā ū jio̍k-thé thâu-chiūⁿ seⁿ ê, bô-lūn lâng á-.sī chengseⁿ, in só͘ hiàn hō͘ Siōng-chú ê, lóng kui tī lí; chóng-.sī, lâng thâu-chiūⁿ seⁿ ê lí tio̍h kā i sio̍k-hôe; bô chheng-khì ê chengseⁿ thâu-chiūⁿ seⁿ ê, lí mā tio̍h kā i sio̍k-hôe.
18:16 Tī móa-goe̍h í-gōa só͘ tio̍h sio̍k-hôe ê, tio̍h chiàu lí só͘ kó͘ ê kè, chiàu sèng-só͘ ê si-khel, ēng gîn gō͘ si-khel kā i sio̍k-hôe; chi̍t si-khel sī jī-cha̍p ge-la̍h.
18:17 Chóng-.sī, thâu-chiūⁿ seⁿ ê gû, thâu-chiūⁿ seⁿ ê mî-iûⁿ, thâu-chiūⁿ seⁿ ê soaⁿ-iûⁿ, lí m̄ thang sio̍k-hôe; che sī sèng, tio̍h hiù i ê hoeh tī tôaⁿ-.ni̍h, tio̍h sio i ê iû chò hóe-chè, chò phang-phang ê chè hiàn hō͘ Siōng-chú.
18:18 Hiahê bah kui tī lí, chhin-chhiūⁿ só͘ iô ê heng kah chiàⁿ-thúi kui tī lí sio-siâng.
18:19 " Kiàn-nā sèng-mi̍h ê kí-chè, sī I-su-la-el lâng hiàn hō͘ Siōng-chú ê, Góa lóng siúⁿ-sù hō͘ lí kah lí ê kiáⁿ-jî, chò éng-oán tit tio̍h ê hūn-gia̍h; che sī hō͘ lí kah lí ê kiáⁿ-sun, tī Siōng-chú ê bīn-chêng, chò éng-oán bē hòe-bô ê iok.
18:20 Siōng-chú tùi A-lông kóng, " Lí tī in ê só͘-chāi m̄ thang ū sán-gia̍p, tī in ê tiong-kan mā m̄ thang ū hūn-gia̍h; tī I-su-la-el lâng tiong, Góa to̍h-sī lí ê hūn-gia̍h, sī lí ê sán-gia̍p. "
18:21 Lē-bī Lâng Èng-tit ê Mi̍h
Siōng-chú kóng, " Lí khòaⁿ, tī I-su-la-el tiong só͘ thiu ê cha̍p-hūn chi-it, Góa í-keng siúⁿ-sù Lē-bī ê kiáⁿ-sun chò sán-gia̍p; in-ūi in só͘ chò ê kang sī hōe-bō͘ ê kang, só͘-í, siúⁿ-sù hō͘ in, lâi pò-tap in ê lô-khó͘.
18:22 Tùi taⁿ í-āu, I-su-la-el lâng m̄ thang óa-kīn hōe-bō͘, bián-tit in tam-tng chōe lâi sí.
18:23 To̍k-to̍k Lē-bī lâng tio̍h chò hōe-bō͘ ê kang, tam-tng in ê chōe, che beh chò lín ta̍k sè-tāi éng-oán ê lē. In tī I-su-la-el lâng ê tiong-kan m̄ thang ū sán-gia̍p;
18:24 in-ūi I-su-la-el lâng só͘ thiu ê cha̍p-hūn chi-it, só͘ hiàn hō͘ Siōng-chú chò kí-chè ê, Góa í-keng siúⁿ-sù Lē-bī lâng chò sán-gia̍p, só͘-í, Góa tùi in kóng, ' In tī I-su-la-el lâng ê tiong-kan m̄ thang ū sán-gia̍p. '"
18:25 Lē-bī Lâng ê Cha̍p-hūn Chi-it
Siōng-chú hoan-hù Mô͘-se kóng,
18:26 " Lí tio̍h hoan-hù Lē-bī lâng, kā in kóng: Lín tùi I-su-la-el lâng ê tiong-kan thiu cha̍p-hūn chi-it, to̍h-sī Góa hō͘ lín chò sán-gia̍p ê; hit sî lín tio̍h tùi hit-ê cha̍p-hūn chi-it ê tiong-kan koh thiu cha̍p-hūn chi-it chò kí-chè, hiàn hō͘ Siōng-chú.
18:27 Lí ê kí-chè beh kā lín sǹg-chò tiūⁿ-tiâⁿ ê be̍h kah móa tī phû-tô khut ê chiú.
18:28 Án-ne, lín tùi I-su-la-el tiong só͘ tit tio̍h ê cha̍p-hūn chi-it, tio̍h tùi hit-ê hiàn kí-chè hiàn hō͘ Siōng-chú; lín tio̍h tùi hit-ê, ēng Siōng-chú ê kí-chè hō͘ chè-si A-lông.
18:29 Lín só͘ tit tio̍h it-chhè ê lé-mi̍h, tio̍h tùi hit tiong-kan, kā siōng hó ê, to̍h-sī hun-pia̍t chò sèng ê hūn-gia̍h, hiàn hiahê kí-chè hō͘ Siōng-chú.
18:30 Só͘-í, lí tio̍h tùi in kóng, Lín í-keng tùi hit tiong-kan kí-khí hit-ê chì hó ê, che to̍h-sī kā Lē-bī lâng sǹg-chò tiūⁿ-tiâⁿ ê ngó͘-kok, mā chhin-chhiūⁿ chiú-khut ê chiú.
18:31 Lín kah lín ê ka-koàn, ta̍k só͘-chāi lóng thang chia̍h; che sī lín ê kang-chîⁿ, sī pò-tap lín tī hōe-bō͘ lāi só͘ chò ê kang.
18:32 Lín í-keng tùi hit tiong-kan kí-khí hit-ê chì hó ê, chiū bô in-ūi ánne lâi hoān chōe; lín m̄ thang òe lahsap I-su-la-el lâng ê sèng-mi̍h, bián-tit lín sí-bông.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。