民數記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
14:1 I-su-la-el Lâng Bâi-oàn
Hōe-chiòng chiū chhut siaⁿ, tōa-siaⁿ hoah, hit mê jîn-bîn lóng thî-khàu.
14:2 I-su-la-el lâng ai-oàn Mô͘-se kah A-lông, hōe-chiòng tùi in kóng, " M̄ ta̍t tio̍h goán sí tī Ai-gi̍p tē! M̄ ta̍t tio̍h sí tī chit-ê khòng-iá!
14:3 Siōng-chú ná ē chhōa goán kàu chit só͘-chāi, hō͘ goán tó tī to hā? Goán ê bó͘ kah kiáⁿ ē siū lia̍h, goán tńg-khì Ai-gi̍p kám bô khah hó? "
14:4 In chò-hóe kóng, " Lán tio̍h siat-li̍p chi̍t-ê siú-léng, tńg-khì Ai-gi̍p! "
14:5 Mô͘-se kah A-lông chiū phak-lo̍h tī I-su-la-el choân hōe-chiòng ê bīn-chêng.
14:6 Thàm-khòaⁿ tē ê lâng ê tiong-kan, Nùn ê kiáⁿ Io-siú-ah kah E-hun-neh ê kiáⁿ Ka-le̍p, pi-siong kah thiah-li̍h in ê saⁿ,
14:7 Tùi I-su-la-el choân hōe-chiòng kóng, " Goán só͘ thàm-khòaⁿ ê tē sī ke̍k-hó ê tē,
14:8 Siōng-chú nā hoaⁿ-hí lán, chiū ē chhōa lán kàu hit-ê tē, kā tē siúⁿ-sù hō͘ lán; hit-ê tē sī lâu leng kah bi̍t ê tē.
14:9 Chóng-.sī, lín m̄ thang pōe-poān Siōng-chú, mā m̄-bián kiaⁿ hit só͘-chāi ê jîn-bîn, in-ūi in sī chò lán ê chia̍h-mi̍h; pēng-chhiáⁿ tì-ìm in ê í-keng lī-khui in, koh ū Siōng-chú kah lán tông-chāi, lán m̄-bián kiaⁿ in! "
14:10 Chóng-.sī, choân hōe-chiòng kóng, " Ēng chio̍h-thâu kā in tìm-sí! " Siōng-chú ê êng-kng tī hōe-bō͘ ǹg I-su-la-el lâng chhut-hiān.
14:11 Mô͘-se Ūi Jîn-bîn Kî-tó
Siōng-chú tùi Mô͘-se kóng, " Chit-ê jîn-bîn khòaⁿ-khin Góa ē kàu tang sî? Góa tī in tiong-kan kiâⁿ che it-chhè ê sîn-jiah, in iáu koh m̄-sìn Góa, beh kàu tang-sî?
14:12 Góa beh ēng un-e̍k lâi kā in phah, hō͘ in bē tàng sêng-chiap sán-gia̍p, hō͘ lí chiâⁿ-chò tōa kok, pí in khah kiông. "
14:13 Mô͘-se tùi Siōng-chú kóng, " Án-ne, Ai-gi̍p lâng ē thiaⁿ-.tio̍h, in-ūi Lí ēng Lí ê koân-lêng, chhōa chiahê jîn-bîn tùi in tiong-kan khí-.lâi.
14:14 In ē kā chiahê tāichì tùi tòa tī chit só͘-chāi ê lâng kóng. In í-keng thiaⁿ tio̍h Siōng-chú Lí tī chiahê jîn-bîn ê tiong-kan, in-ūi Siōng-chú Lí tng-bīn hō͘ lâng khòaⁿ-.tio̍h, koh-chài Lí ê hûn thêng tī in ê téng-bīn, Lí ji̍t-sî tī hûn-thiāu tiong, àm-sî tī hóe-thiāu tiong, tī in ê bīn-chêng kiâⁿ.
14:15 Taⁿ Lí nā thâi-sí chiahê jîn-bîn, chhin-chhiūⁿ thâi-sí chi̍t-ê lâng, hiahê thiaⁿ tio̍h Lí ê miâ-siaⁿ ê lia̍t kok ē gī-lūn kóng,
14:16 ' In-ūi Siōng-chú bē tàng chhōa chiahê jîn-bîn ji̍p-khì I tùi in chiùchōa èng-ín ê tē, só͘-í, tī khòng-iá kā in thâi-sí. '
14:17 Taⁿ kiû Chú hián-chhut tōa koân-lêng, chiàu Lí só͘ bat kóng ê, kóng,
14:18 ' Siōng-chú bô khoài siū-khì, koh ū hong-sēng ê chû-ài, sià-bián chōe-kò kòe-sit, choa̍t-tùi bô lia̍h ū chōe ê chò bô chōe, it-tēng kui-kiū i ê chōe, tùi pē kàu kiáⁿ, kàu saⁿ-sì tāi. '
14:19 Kiû Lí chiàu Lí ê tōa chû-ài sià-bián chiahê jîn-bîn ê chōe, chhin-chhiūⁿ Lí tùi Ai-gi̍p kàu taⁿ, tiāⁿtiāⁿ sià-bián in sio-siâng. "
14:20 Siōng-chú kóng, " Góa chiàu lí ê ōe ū sià-bián in.
14:21 Chóng-.sī, Góa kí Góa ê oa̍h-miā lâi kóng, choân tē ē chhiong-móa Siōng-chú ê êng-kng.
14:22 In-ūi chiahê lâng ū khòaⁿ tio̍h Góa ê êng-kng, í-ki̍p Góa só͘ kiâⁿ tī Ai-gi̍p kah khòng-iá ê sîn-jiah, iáu koh chhì-thàm Góa cha̍p pái, m̄ chun-thàn Góa ê ōe,
14:23 In choa̍t-tùi bē tit tio̍h khòaⁿ tio̍h Góa tùi in ê chó͘-sian só͘ chiùchōa èng-ín ê tē. Só͘-ū khòaⁿ-khin Góa ê lâng lóng bē tàng khòaⁿ-.tio̍h.
14:24 To̍k-to̍k Góa ê lô͘-po̍k Ka-le̍p, in-ūi i lēng-gōa ū chi̍t-ê sim-chì, oân-choân tòe Góa, Góa beh chhōa i ji̍p-khì i só͘ kiâⁿ kàu ê tē, i ê kiáⁿ-sun mā ē tit tio̍h hit-ê tē chò sán-gia̍p.
14:25 A-má-le̍k lâng kah Ka-nân lâng tòa tī soaⁿ-kok tiong, bîn-á-chài lín tio̍h oa̍t tò-tńg, tùi Âng-hái ê lō͘ khì khòng-iá. "
14:26 Siōng-chú Chhú-hoa̍t I-su-la-el Jîn-bîn
Siōng-chú hoan-hù Mô͘-se kah A-lông kóng,
14:27 " Chiahê pháiⁿ ê hōe-chiòng tùi Góa hoat-chhut oàn-giân, Góa tio̍h jím-nāi in kàu tang-sî? I-su-la-el lâng ai-oàn Góa ê oàn-giân, Góa lóng ū thiaⁿ tio̍h à.
14:28 Lí tio̍h kā in kóng, Siōng-chú kóng, ' Góa kí Góa ê oa̍h-miā lâi kóng: Lín hō͘ Góa thiaⁿ-.tio̍h ê ōe, Góa ē chiàu ánne kā lín khoán-thāi.
14:29 Lín ê sin-si ē tó tī chit-ê khòng-iá, kiàn-nā lín tiong-kan keng-kòe tiám-sǹg ê lâng, chiàu i ê sò͘-gia̍h, tùi jī-cha̍p hòe í-siōng, tùi Góa chhut oàn-giân ê,
14:30 it-tēng bē tàng ji̍p-khì Góa chiùchōa èng-ín lín tòa ê tē; to̍k-to̍k E-hun-neh ê kiáⁿ Ka-le̍p kah Nùn ê kiáⁿ Io-siú-ah, ē-tàng ji̍p-.khì.
14:31 Chóng-.sī, lín ê gín'á, to̍h-sī lín só͘ kóng ē hông lia̍h-.khì ê, Góa ē chhōa in ji̍p-.khì, in chiū chai sī lín só͘ khì-sak hit-ê tē.
14:32 Nā-sī lín, lín ê sin-si ē tó tī chit-ê khòng-iá.
14:33 Lín ê kiáⁿ-jî ē tī khòng-iá phiau-liû sì-cha̍p nî, tam-tng lín îm-hēng ê chōe, it-ti̍t kàu lín ê sin-si tī khòng-iá siau-bia̍t.
14:34 Chiàu lín thàm-khòaⁿ hit-ê tē ê ji̍t-chí, kiōng sì-cha̍p kang, chi̍t ji̍t tú chi̍t nî, lín tio̍h tam-tng lín ê chōe sì-cha̍p nî, lín chiū ē chai Góa khì-sak lín.
14:35 Góa — Siōng-chú í-keng kóng, Góa beh ánne khoán-thāi che it-chhè chū-chi̍p lâi kah Góa tùi-te̍k ê pháiⁿ hōe-chiòng, in ē tī chit-ê khòng-iá siau-bia̍t, sí tī chia. "
14:36 Mô͘-se só͘ chhe khì thàm-khòaⁿ hit-ê tē ê lâng, tò tńg-lâi pò hit só͘-chāi ê pháiⁿ siau-sit, tì-sú choân hōe-chiòng tùi i ai-oàn.
14:37 Hiahê pò hit só͘-chāi pháiⁿ siau-sit ê lâng, lóng tú tio̍h un-e̍k, sí tī Siōng-chú ê bīn-chêng.
14:38 Thàm-khòaⁿ hit só͘-chāi ê lâng ê tiong-kan, chí ū Nùn ê kiáⁿ Io-siú-ah kah E-hun-neh ê kiáⁿ Ka-le̍p, iáu koh oa̍h-.leh.
14:39 Thâu Chi̍t Pái Chìn-ji̍p Ka-nân
( SBK 1: 41-46)
Mô͘-se kā chiahê ōe tùi I-su-la-el ê kûn-chiòng kóng, jîn-bîn chiū chin iu-būn.
14:40 In chá-chá khí-lâi chiūⁿ-khì soaⁿ téng, kóng, " Lí khòaⁿ, goán tī chia, goán beh chiūⁿ-khì Siōng-chú só͘ èng-ín ê tē, in-ūi goán ū hoān chōe. "
14:41 Mô͘-se kóng, " Lín ná ē ûi-pōe Siōng-chú ê bēng-lēng? Chit-ê tāichì kiâⁿ bē thong,
14:42 m̄ thang chiūⁿ-.khì, in-ūi Siōng-chú bô tī lín tiong-kan, khióng-kiaⁿ lín ē hō͘ tùi-te̍k phah-pāi.
14:43 In-ūi A-má-le̍k lâng kah Ka-nân lâng, lóng tī lín ê thâu-chêng, lín ē tó tī in ê to hā, in-ūi lín oa̍t thâu bô tòe Siōng-chú, só͘-í, Siōng-chú bô beh kah lín tông-chāi. "
14:44 Chóng-.sī, Siōng-chú ê iok-kūi kah Mô͘-se bô chhut iâⁿ, in ngē-ngē beh chiūⁿ-khì soaⁿ téng.
14:45 Chiū ánne, A-má-le̍k lâng kah Ka-nân lâng, tòa tī soaⁿ-.ni̍h ê, lóng lo̍h-lâi kā in kong-kek, kā in phah-pāi, kàu tī Hol-mah.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。