民數記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
10:1 銀ê鼓吹
上主吩咐摩西講：
10:2 「你tio̍h用銀phah兩支鼓吹，用phah ê法來做，hō͘你用來聚集會眾，mā thang叫ta̍k營出發。
10:3 Pûn鼓吹ê時，全會眾tio̍h到你hia，聚集tī會幕門口。
10:4 若kantaⁿ pûn一支，眾首領，to̍h是以色列ê族長，tio̍h聚集到你hia。
10:5 Pûn大聲ê時，東pêng所安ê營lóng tio̍h出發。
10:6 第二pái pûn大聲ê時，南pêng所安ê營tio̍h出發。In beh出發，一定tio̍h pûn大聲。
10:7 若beh聚集會眾，lín tio̍h pûn鼓吹，總是，m̄ thang pûn大聲。
10:8 亞倫ê kiáⁿ孫做祭司ê，tio̍h pûn hiahê鼓吹。「這beh做lín代代永遠ê例。
10:9 Lín tī本地kah欺壓lín ê對敵交戰，to̍h tio̍h用鼓吹pûn大聲，to̍h tī上主—lín ê上帝ê面前得tio̍h記念，mā beh得tio̍h救來脫離lín ê對敵。
10:10 Mā tī lín快樂ê日kah節期，kah每月ê初一，是tī lín獻燒祭kah謝恩祭ê時，mā tio̍h pûn鼓吹。這lóng beh tī lín ê上帝ê面前做記念，我是上主—lín ê上帝。」
10:11 以色列人出發
第二年ê二月二十，雲tùi證據ê會幕收tńg去。
10:12 以色列人to̍h照in ê路程出發，離開西奈ê曠野，雲停tī 巴蘭ê曠野。
10:13 這是in照上主託摩西所命令ê，頭一pái出發。
10:14 照in ê軍隊做頭出發ê，是偤大族ê營ê大旗，軍隊ê統領是亞米拿達ê kiáⁿ拿順。
10:15 以薩迦支族軍隊ê統領是蘇押ê kiáⁿ拿坦業。
10:16 西布倫ê支族軍隊ê統領是希倫ê kiáⁿ以利押。
10:17 會幕to̍h拆起來，扛會幕ê是革順ê kiáⁿ孫kah米拉利ê kiáⁿ孫，to̍h出發行。
10:18 照伊ê軍隊，流便營ê大旗出發，伊ê軍隊ê統領是示丟珥ê kiáⁿ以利蓿。
10:19 西緬支族軍隊ê統領是蘇利沙代ê kiáⁿ示路蔑。
10:20 迦得支族軍隊ê統領是丟珥ê kiáⁿ以利雅薩。
10:21 哥轄人扛聖物ê出發行，in iáu未到ê chìn前，hiahê人ē幕已經搭好。
10:22 照伊ê軍隊，以法連營ê大旗出發，伊ê軍隊ê統領是亞米忽ê kiáⁿ以利沙瑪。
10:23 瑪拿西支族軍隊ê統領是比大蓿ê kiáⁿ迦瑪列。
10:24 便雅憫支族軍隊ê統領是基多尼ê kiáⁿ亞比但。
10:25 做chiahê營ê路尾隊ê，是但ê營ê大旗，照伊ê軍隊出發；伊ê軍隊ê統領是亞米沙代ê kiáⁿ亞希以謝。
10:26 亞設支族軍隊ê統領是俄蘭ê kiáⁿ帕結。
10:27 拿弗他利支族軍隊ê統領是以南ê kiáⁿ亞希拉。
10:28 以色列人照軍隊ê排列出發，in ê隊伍to̍h是ánne：
10:29 摩西對伊ê外戚米甸人流珥ê kiáⁿ Hô-pa講：「阮beh去上主所bat講：『我kā它賞賜hō͘ lín ê地。』請你kah阮做伙來去，阮會好款待你，因為上主已經應允賜福氣hō͘以色列人。」
10:30 Hô-pa應講：「我m̄去，我beh tńg去我ê本地本族hia。」
10:31 摩西講：「求你m̄ thang離開阮，因為你知阮tī曠野tio̍h án怎紮營，你thang做阮ê目chiu 。
10:32 你若beh kah阮去，見若上主所hō͘阮ê福氣，阮mā一定ánne hō͘你。」
10:33 以色列人kah約櫃向前行
In離開上主ê山，出發行三日ê路程；上主ê約櫃tī頭前行三日ê路程，kā in chhōe安息ê所在。
10:34 In撤營出發，日時上主ê雲tī in ê頂面。
10:35 約櫃出發ê時，摩西to̍h講：「上主ah，求祢起來；願祢ê對敵四散，願怨恨祢ê人tī祢ê面前逃走！」
10:36 約櫃停ê時，伊to̍h講：「上主ah，求祢tńg來到以色列千千萬萬人ê中間！」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。