民數記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
4:1 哥轄宗族ê職責
上主吩咐摩西kah亞倫講：
4:2 「你tio̍h tùi利未人ê中間經過點算哥轄kiáⁿ孫ê總額，照in ê家口kah宗族。
4:3 Tùi三十歲以上到五十歲，見若入來當職tī會幕內做工ê，lóng tio̍h算。
4:4 「哥轄ê kiáⁿ孫tī會幕所做ê工，to̍h是辦理至聖ê物，記tī下底：
4:5 營隊出發ê時，亞倫kah伊ê kiáⁿ tio̍h入去剝遮閘ê帳簾，the̍h來遮蓋法櫃。
4:6 Koh用海狗皮蓋tī頂面，koh蓋純藍色ê布，然後chiah穿它ê槓。
4:7 「Koh用藍色ê布chhu tī排列餅ê桌，kā chiahê 盤、匙、碗kah灌奠ê杯排tī hit頂面，tī hia mā tio̍h有tiāⁿ-tiāⁿ 排設ê餅。
4:8 Tī hit頂面koh tio̍h罩朱紅色ê布，koh用海狗皮做kòa來蓋，chiah穿它ê槓。
4:9 「In tio̍h the̍h藍色布來蓋照光ê燈台kah伊ê盞，它ê剪，它ê盤，以及所有做它ê路用貯油ê器具。
4:10 Koh tio̍h kā燈台kah伊所有ê器具，包tī海狗皮ê蓋內，hē tī柴架頂。
4:11 「Tī金壇頂in tio̍h chhu藍色ê布，用海狗皮做kòa來蓋，chiah穿它ê槓。
4:12 Koh tio̍h the̍h所用來服事ê器具，to̍h是tī聖所用來服事ê，包tī藍色ê布，用海狗皮做kòa來蓋，hē tī柴架頂。
4:13 In tio̍h收壇頂ê火灰，用紫色ê布chhu tī hit頂面。
4:14 Koh tio̍h kā in做工所用一切ê器具排tī頂面，to̍h是火鼎、肉叉、托á、盤，一切屬tī壇ê器具，koh用海狗皮做kòa來罩，chiah穿它ê槓。
4:15 營隊beh出發ê時，亞倫kah伊ê kiáⁿ kā聖所kah聖所所有ê器具蓋了後，然後哥轄ê kiáⁿ孫tio̍h來扛。「總是，m̄ thang摸聖ê物，免得in死；會幕內chiahê物件lóng是哥轄ê kiáⁿ孫所tio̍h扛ê。
4:16 「祭司亞倫ê kiáⁿ以利亞撒所tio̍h顧守ê，是點燈ê油kah芳料，以及tiāⁿ-tiāⁿ 獻ê素祭kah抹ê油，mā tio̍h顧守全會幕kah hit中間所有ê，以及聖所kah聖所所有ê器具。」
4:17 上主吩咐摩西kah亞倫講：
4:18 「Lín m̄ thang kā哥轄人家族ê支族tùi利未人ê中間剪除去。
4:19 In óa近至聖ê物ê時，lín tio̍h kā in ánne設法，hō͘ in ē活，免得死。亞倫kah伊ê kiáⁿ tio̍h入去，派in ta̍k人所tio̍h做kah所tio̍h扛ê。
4:20 總是，in一時á都m̄ thang入去看聖所，免得inē死亡。」
4:21 革順宗族ê職責
上主吩咐摩西講：
4:22 「你tio̍h算革順kiáⁿ孫ê總額，照in ê宗族kah家口，
4:23 tùi三十歲以上到五十歲，見若入來當職tī會幕內做工ê lóng tio̍h算。
4:24 革順人chiahê家ê工程，所tio̍h辦理，所tio̍h扛ê，to̍h是chiahê：
4:25 In tio̍h扛會幕hiahê帳幅，以及會幕kah它ê蓋 kah tī hit頂面海狗皮做ê蓋，kah會幕ê門簾，
4:26 院ê布帷kah院門ê門簾，(院to̍h是圍會幕kah壇ê)，索á kah所用ê器具，無論做啥物路用ê，in lóng tio̍h辦理。
4:27 革順ê kiáⁿ孫tī in一切所扛ê物，所辦ê tāichì，lóng tio̍h照亞倫kah伊ê kiáⁿ孫所命令ê來辦，in所應該扛ê，lín tio̍h派in顧守。
4:28 這是革順kiáⁿ孫chiahê家，tī會幕內所做ê工，in所顧守ê，tio̍h tī祭司亞倫ê kiáⁿ以他瑪ê手下。」
4:29 米拉利宗族ê職責
「若是米拉利ê kiáⁿ孫，你tio̍h照in ê家口kah宗族，kā in點算。
4:30 Tùi三十歲以上到五十歲，見若入來當職tī會幕內做工ê，lóng tio̍h算。
4:31 In所擔當ê責任，照會幕chiahê工程，to̍h是會幕ê板kah它ê門閂，它ê柱，它ê座，
4:32 院四箍圍ê柱kah它ê座；所釘ê釘kah索á，以及一切所用ê器具。In擔當所扛ê器具，lín tio̍h照名kā in定tio̍h。
4:33 這是米拉利kiáⁿ孫chiahê家ê工，to̍h是in tī會幕內所做ê工，lóng tī祭司亞倫ê kiáⁿ以他瑪ê手下。」
4:34 利未支族人數ê統計
摩西kah亞倫以及會眾chiahê首領，kā哥轄ê kiáⁿ孫照in ê宗族kah家口，
4:35 tùi三十歲以上到五十歲，見若入來當職tī會幕內做工ê，lóng經過點算。
4:36 照in ê家口經過點算ê，總共有二千七百五十名。
4:37 這是哥轄族chiahê家經過點算ê，是所有tī會幕內做工ê，to̍h是摩西kah亞倫，照上主託摩西所命令點算ê。
4:38 革順ê kiáⁿ孫經過點算ê，照in ê家口kah宗族，
4:39 tùi三十歲以上到五十歲，見若入來當職tī會幕內做工ê，
4:40 其中經過點算ê，照in ê家口kah宗族，總共有二千六百三十名。
4:41 這是革順kiáⁿ孫chiahê家經過點算ê，是所有tī會幕內做工ê，to̍h是摩西kah亞倫照上主所命令來點算ê。
4:42 米拉利kiáⁿ孫chiahê家所經過點算ê，照in ê家口，in ê宗族，
4:43 tùi三十歲以上到五十歲，見若入來當職tī會幕內做工ê，
4:44 其中經過點算ê，照in ê家口，總共有三千兩百名。
4:45 這是米拉利kiáⁿ孫chiahê家經過點算ê，to̍h是摩西kah亞倫照上主託摩西所命令點算ê。
4:46 見若經過點算ê利未人，to̍h是摩西kah亞倫kah以色列chiahê首領，照in ê家口，in ê宗族，所點算ê，
4:47 tùi三十歲以上到五十歲，見若入來當職tī會幕內做扛物件ê工ê，
4:48 其中經過點算ê，總共有八千五百八十名。
4:49 In hō͘摩西點算，照上主所命令ê，ta̍k人照伊所辦ê tāichì，照伊所扛ê物件，in ánne hō͘伊點算，是照上主所命令摩西ê。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。