民數記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
3:1 亞倫ê Kiáⁿ
上主tī西奈山對摩西講ê日，亞倫kah摩西ê世系親像下底：
3:2 亞倫ê kiáⁿ ê名是chiahê：大kiáⁿ名叫做拿答，koh有亞比戶、以利亞撒、以他瑪。
3:3 這是亞倫ê kiáⁿ ê名，lóng是受抹油做祭司ê，bat kā in行設立ê禮，來擔當祭司ê職份。
3:4 拿答kah亞比戶tī西奈ê曠野，tī上主ê面前，獻別種火祭ê時，就死tī上主ê面前，in mā無kiáⁿ兒。以利亞撒kah以他瑪tī in老父亞倫ê面前，擔當祭司ê職份。
3:5 利未人Hông派做祭司
上主吩咐摩西講：
3:6 「你hō͘利未ê支族行óa來，khiā tī祭司亞倫ê面前，thang kā伊服事。
3:7 In tio̍h守所吩咐亞倫ê，mā tio̍h tī會幕前守所吩咐會眾ê，來辦理會幕ê tāichì。
3:8 In tio̍h顧守會幕所有ê器具，mā tio̍h守所吩咐以色列人ê，來辦理會幕ê tāichì。
3:9 你tio̍h kā利未人hō͘亞倫kah伊hiahê kiáⁿ，in是tùi以色列人ê中間揀出來，全部hō͘伊ê。
3:10 你tio̍h分派亞倫kah伊hiahê kiáⁿ，in mā tio̍h守in祭司ê職責。近óa來ê出外人，一定hō͘伊死。」
3:11 上主吩咐摩西講：
3:12 「你看，我本身tùi以色列人ê中間取利未人，替以色列人所有頭胎ê大kiáⁿ，利未人tio̍h歸屬我。
3:13 因為一切ê大kiáⁿ lóng是我ê，我tī埃及地phah死所有ê大kiáⁿ hit日，to̍h kā以色列中所有ê大kiáⁿ，人kah chengseⁿ，lóng kā in分別做聖，歸tī我，in是做我ê。我是上主。」
3:14 利未人ê統計
上主tī西奈ê曠野吩咐摩西講：
3:15 「你tio̍h照利未人ê宗族kah家口，kā in點算。見若滿月以上ê chapo͘ gín-á，你lóng tio̍h點算。」
3:16 摩西就照上主ê話來kā in點算，照伊所接受ê命令。
3:17 利未chiahê kiáⁿ ê名，to̍h是革順、哥轄、米拉利。
3:18 革順ê kiáⁿ，照in ê家是立尼、示每。
3:19 哥轄ê kiáⁿ，照in ê家是暗南、以斯哈、希伯崙、烏薛。
3:20 米拉利ê kiáⁿ，照in ê家是抹利、母示。Chiahê照in ê宗族是利未人ê家口。
3:21 屬革順ê，有立尼族ê家kah示每族ê家，chiahê是革順族ê家。
3:22 In經過點算ê，tùi滿月以上，照in hiahê chapo͘ gín-á ê數額，in所經過點算ê人數，總共有七千五百名。
3:23 革順族hiahê家口，tio̍h紮營tī會幕後ê西pêng。
3:24 La̍h-i-le̍k ê kiáⁿ以利雅薩，做革順人宗族ê首領。
3:25 革順ê kiáⁿ孫，tī會幕中所tio̍h顧守ê，to̍h是會幕kah布棚，以及它ê蓋 kah會幕ê門簾；
3:26 院ê布帷kah院ê門簾，(院to̍h是圍會幕kah壇ê)，以及一切所用ê索。
3:27 屬哥轄ê，有暗南族ê家，以斯哈族ê家，希伯崙族ê家，烏薛族ê家，chiahê lóng是哥轄族ê家。
3:28 照chapo͘丁ê數額，tùi滿月以上守聖所ê責任ê，總共有八千六百名。
3:29 哥轄kiáⁿ孫hiahê家，tio̍h紮營tī會幕邊ê南pêng。
3:30 烏薛ê kiáⁿ以利撒反，做哥轄宗族家口ê首領。
3:31 In所tio̍h守ê是約櫃、桌、燈台，hiahê壇kah聖所內in所用ê器具，以及門簾kah所有做路用ê物。
3:32 祭司亞倫ê kiáⁿ以利亞撒，做利未人chiahê首領ê首領，tio̍h鑒察hiahê顧守聖所ê人。
3:33 屬米拉利ê，有抹利族ê家kah母示族ê家，chiahê是米拉利hiahê家口。
3:34 In經過點算ê，照in chapo͘丁ê數額；tùi滿月以上ê，總共有六千兩百名。
3:35 A-pí-hāi ê kiáⁿ So͘-lia̍t做米拉利宗族chiahê家ê首領，in tio̍h紮營tī會幕邊ê北pêng。
3:36 米拉利ê kiáⁿ孫定tio̍h ê職份是守會幕ê板，它ê門閂，它ê柱，它ê座kah所有ê器具，一切做路用ê物，
3:37 院四箍圍ê柱，它ê座，它所釘（tèng）ê釘kah索。
3:38 Tī會幕前ê東pêng，to̍h是tī布棚前ǹg日出ê所在，紮營ê是摩西kah亞倫，以及伊hiahê kiáⁿ。In守聖所ê責任，to̍h是替以色列kiáⁿ孫ê責任。別人若近óa來，一定tio̍h hō͘伊死。
3:39 見若經過點算ê利未人，to̍h是摩西kah亞倫照上主ê命令所算ê，照in ê家，tùi滿月以上ê chapo͘丁，總共有二萬二千名。
3:40 利未人代替大Kiáⁿ ê地位
上主kā摩西講：「你tio̍h tī以色列人ê中間點算，tùi滿月以上見若頭胎ê chapo͘丁，記in ê名額。
3:41 我是上主。你tio̍h kā我取利未人，替以色列人所有ê大kiáⁿ，mā取利未人ê chengseⁿ，替以色列人所有頭水生ê chengseⁿ。」
3:42 摩西就照上主所命令ê，經過點算以色列人所有ê大kiáⁿ。
3:43 照人名ê數額，tùi滿月以上，見若頭chiūⁿ生ê chapo͘丁經過點算ê，總共有二萬二千兩百七十三名。
3:44 上主吩咐摩西講：
3:45 「你tio̍h取利未人替以色列人所有頭chiūⁿ生ê，mā取利未人ê chengseⁿ替以色列ê chengseⁿ，利未人to̍h beh屬我。我是上主。
3:46 以色列人中頭chiūⁿ ê chapo͘丁，比利未人khah chē兩百七十三个，你beh kā伊贖出來。
3:47 to̍h tio̍h照人丁，照聖所ê舍客勒，ta̍k人取五舍客勒，(一舍客勒是二十季拉)
3:48 Hiahê加出來ê人額所贖回ê銀，tio̍h交帶亞倫kah伊ê kiáⁿ。
3:49 摩西to̍h對hiahê受利未人所贖出來ê人額，the̍h贖回ê銀。
3:50 Tùi以色列人頭chiūⁿ生ê所the̍h ê銀，照聖所ê舍客勒，有一千三百六十五舍客勒。
3:51 摩西照上主ê話，kā chiahê贖回ê銀，交帶亞倫kah伊ê kiáⁿ，tútú親像上主所命令摩西ê。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。