民數記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
1:1 I-su-la-el Tē-it pái Jîn-kháu Thóng-kè
I-su-la-el lâng chhut Ai-gi̍p tē í-āu, tē-jī nî, jī-goe̍h chhe-it, Siōng-chú tī Si-nái ê khòng-iá tī hōe-bō͘ tiong hoan-hù Mô͘-se, kóng,
1:2 " Lín tio̍h kā I-su-la-el choân hōe-chiòng ê chóng-sò͘, chiàu in ê ke-kháu chong-cho̍k, chiàu lâng-miâ ê sò͘-gia̍h, sǹg in chapo͘ ê jîn-teng.
1:3 Kiàn-nā I-su-la-el tiong, tùi jī-cha̍p hòe í-siōng, ē chhut-khì kau-chiàn ê, lí kah A-lông tio̍h chiàu in ê kun-tūi lâi tiám-sǹg.
1:4 Múi chi-cho̍k tiong tio̍h ū chi̍t-ê lâng, chò in ê cho̍k-tiúⁿ ê, lâi pang-chān lín. "
1:5 Kah lín khiā chò-tui ê lâng, in ê miâ-jī kì tī ē-té: Sio̍k Lū-biān ê, ū Si-ti-ul ê kiáⁿ E-li-chul;
1:6 sio̍k Si-miān ê, ū Chu-lí-sià-tāi ê kiáⁿ Si-lu-mi-el;
1:7 sio̍k Iô-tah ê, ū A-mí-ná-tap ê kiáⁿ Ná-sòng;
1:8 sio̍k It-sa-kal ê, ū Chau-al ê kiáⁿ Na-than-el;
1:9 sio̍k Che-bú-lông ê, ū Che-lông ê kiáⁿ E-lí-ap;
1:10 Iô-sé-huh ê kiáⁿ-sun sio̍k E-hu-laim ê, ū A-mi-hut ê kiáⁿ E-lí-sia-mah; sio̍k Má-ná-se ê, ū Pa-ta-chul ê kiáⁿ Gâ-má-li-el;
1:11 sio̍k Biān-iá-mín ê, ū Gi-tó-nih ê kiáⁿ, A-mí-tàn;
1:12 sio̍k Tàn ê, ū A-mí-siá-tái ê kiáⁿ, A-hí-e-chel;
1:13 sio̍k A-sel ê, ū Ok-lân ê kiáⁿ Pha-gi-el;
1:14 sio̍k Ga̍t ê, ū Tiu-el ê kiáⁿ E-lí-a-sa̍h;
1:15 sio̍k Ná-hu-tha-lím ê, ū E-nân ê kiáⁿ A-hi-la̍h;
1:16 Chiahê lóng sī tùi hōe tiong kéng-soán ê, ta̍k-ê chò in pún chi-cho̍k ê siú-léng, lóng sī I-su-la-el kun-tūi tiong ê thóng-léng.
1:17 Mô͘-se kah A-lông chiū chhōa hiahê siū kì miâ ê lâng,
1:18 tī jī-goe̍h chhe-it tiàu-chi̍p hōe-chiòng. In chiū chiàu in ê jîn-teng, tùi jī-cha̍p hòe í-siōng, chiàu in ê miâ-gia̍h, chiàu in ê ke-kháu chong-cho̍k, pâi-lia̍t in ê sè-hē.
1:19 Siōng-chú ánne bēng-lēng Mô͘-se, i chiū tī Si-nái ê khòng-iá tiám-sǹg jîn-kháu.
1:20 I-su-la-el ê tōa-kiáⁿ Lū-biān kiáⁿ-sun ê sè-hē, chiàu in ê ke-kháu, in ê chong-cho̍k, chiàu lâng-miâ ê sò͘-gia̍h, chiàu in ê jîn-teng, tùi jī-cha̍p hòe í-siōng ê chapo͘ ê, ē chhut-khì kau-chiàn ê:
1:21 Sio̍k Lū-biān ê chi-cho̍k keng-kòe tiám-sǹg ê, ū sì-bān la̍k-chheng gō͘-pah miâ.
1:22 Sio̍k Si-miān ê chi-cho̍k keng-kòe tiám-sǹg ê,
1:23 ū gō͘-bān káu-chheng saⁿ-pah miâ.
1:24 Sio̍k Ga̍t ê chi-cho̍k keng-kòe tiám-sǹg ê,
1:25 ū sì-bān gō͘-chheng la̍k-pah gō͘-cha̍p miâ.
1:26 Sio̍k Iô-tah ê chi-cho̍k keng-kòe tiám-sǹg ê,
1:27 ū chhit-bān sì-chheng la̍k-pah miâ.
1:28 Sio̍k It-sa-kal ê chi-cho̍k keng-kòe tiám-sǹg ê,
1:29 ū gō͘-bān sì-chheng sì-pah miâ.
1:30 Sio̍k Che-bú-lông ê chi-cho̍k keng-kòe tiám-sǹg ê,
1:31 ū gō͘-bān chhit-chheng sì-pah miâ.
1:32 Sio̍k E-hu-laim ê chi-cho̍k keng-kòe tiám-sǹg ê,
1:33 ū sì-bān khòng gō͘-pah miâ.
1:34 Sio̍k Má-ná-se ê chi-cho̍k keng-kòe tiám-sǹg ê,
1:35 ū saⁿ-bān nn̄g-chheng nn̄g-pah miâ.
1:36 Sio̍k Biān-iá-mín ê chi-cho̍k keng-kòe tiám-sǹg ê,
1:37 ū saⁿ-bān gō͘-chheng sì-pah miâ.
1:38 Sio̍k Tàn ê chi-cho̍k keng-kòe tiám-sǹg ê,
1:39 ū la̍k-bān nn̄g-chheng chhit-pah miâ.
1:40 Sio̍k A-sel ê chi-cho̍k keng-kòe tiám-sǹg ê,
1:41 ū sì-bān chi̍t-chheng gō͘-pah miâ.
1:42 Sio̍k Ná-hu-tha-lím ê chi-cho̍k keng-kòe tiám-sǹg ê,
1:43 ū gō͘-bān saⁿ-chheng sì-pah miâ.
1:44 Chiahê lóng sī keng-kòe tiám-sǹg ê, sī Mô͘-se kah A-lông kah I-su-la-el cha̍p-jī-ê siú-léng só͘ sǹg ê, in ta̍k-ê tāi-piáu in ê chong-cho̍k.
1:45 Án-ne, I-su-la-el lâng keng-kòe tiám-sǹg ê, chiàu i ê chong-cho̍k, tùi jī-cha̍p hòe í-siōng, kiàn-nā I-su-la-el tiong ē chhut-khì kau-chiàn ê lâng,
1:46 to̍h-sī it-chhè keng-kòe tiám-sǹg ê, chóng-kiōng ū la̍k-cha̍p-bān saⁿ-chheng gō͘-pah gō͘-cha̍p miâ.
1:47 To̍k-to̍k Lē-bī lâng chiàu chó͘-chong ê chi-cho̍k, bô sǹg chāi-lāi.
1:48 In-ūi Siōng-chú bat hoan-hù Mô͘-se kóng,
1:49 " To̍k-to̍k Lē-bī chi-cho̍k lí m̄ thang tiám-sǹg, mā m̄ thang tī I-su-la-el tiong sǹg in ê chóng-gia̍h.
1:50 Chóng-.sī, tio̍h phài Lē-bī lâng koán-lí chèng-kì ê hōe-bō͘ kah kî-tiong só͘-ū ê khì-kū, í-ki̍p it-chhè sio̍k tī hit lāi-bīn ê, in tio̍h kng hōe-bō͘ kah kî-tiong só͘-ū ê khì-kū, mā tio̍h sū-hāu hōe-bō͘, tī i ê sì-kho͘-ûi chat iâⁿ.
1:51 Hōe-bō͘ beh chhut-hoat ê sî, Lē-bī lâng tio̍h kā i thiah khí-.lâi; hōe-bō͘ beh tah ê sî, Lē-bī lâng tio̍h kā i khiā khí-.lâi. Í-gōa ê lâng nā kīn-óa hōe-bō͘, it-tēng tio̍h sí.
1:52 I-su-la-el lâng tah pò͘-pêⁿ, kok chiàu in ê kun-tūi, kok kui in ê pún-iâⁿ, kok kui in ê tōa kî.
1:53 To̍k-to̍k Lē-bī lâng tio̍h tī chèng-kì ê hōe-bō͘ sì-kho͘-ûi chat iâⁿ, bián-tit tōa siū-khì lîm-kàu tī I-su-la-el ê hōe-chiòng; Lē-bī lâng mā tio̍h siú chèng-kì ê hōe-bō͘ ê chek-jīm. "
1:54 I-su-la-el lâng chiū ánne kiâⁿ, kiàn-nā Siōng-chú só͘ bēng-lēng Mô͘-se ê, in chiū chiàu ánne kiâⁿ.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。