民數記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
1:1 以色列第一pái人口統計
以色列人出埃及地以後，第二年，二月初一，上主tī西奈ê曠野tī會幕中吩咐摩西，講：
1:2 「Lín tio̍h kā以色列全會眾ê總數，照in ê家口宗族，照人名ê數額，算in chapo͘ ê人丁。
1:3 見若以色列中，tùi二十歲以上，ē出去交戰ê，你kah亞倫tio̍h照in ê軍隊來點算。
1:4 每支族中tio̍h有一个人，做in ê族長ê，來幫贊lín。」
1:5 Kah lín khiā做堆ê人，in ê名字記tī下底：屬流便ê，有示丟珥ê kiáⁿ以利蓿；
1:6 屬西緬ê，有蘇利沙代ê kiáⁿ示路蔑；
1:7 屬偤大ê，有亞米拿達ê kiáⁿ拿順；
1:8 屬以薩迦ê，有蘇押 ê kiáⁿ拿坦業；
1:9 屬西布倫ê，有希倫ê kiáⁿ以利押；
1:10 約瑟ê kiáⁿ孫屬以法連ê，有亞米忽ê kiáⁿ以利沙瑪；屬瑪拿西ê，有比大蓿ê kiáⁿ迦瑪列；
1:11 屬便雅憫ê，有基多尼ê kiáⁿ，亞比但；
1:12 屬但ê，有亞米沙代ê kiáⁿ，亞希以謝；
1:13 屬亞設ê，有俄蘭ê kiáⁿ帕結；
1:14 屬迦得ê，有丟珥ê kiáⁿ以利雅薩；
1:15 屬拿弗他利ê，有以南ê kiáⁿ亞希拉；
1:16 Chiahê lóng是tùi會中揀選ê，ta̍k个做in本支族ê首領，lóng是以色列軍隊中ê統領。
1:17 摩西kah亞倫to̍h chhōa hiahê受記名ê人，
1:18 tī二月初一召集會眾。In就照in ê人丁，tùi二十歲以上，照in ê名額，照in ê家口宗族，排列in ê世系。
1:19 上主ánne命令摩西，伊to̍hti7西奈ê曠野點算人口。
1:20 以色列ê大kiáⁿ流便kiáⁿ孫ê世系，照in ê家口，in ê宗族，照人名ê數額，照in ê人丁，tùi二十歲以上ê chapo͘ ê，ē出去交戰ê：
1:21 屬流便ê支族經過點算ê，有四萬六千五百名。
1:22 屬西緬ê支族經過點算ê，
1:23 有五萬九千三百名。
1:24 屬迦得ê支族經過點算ê，
1:25 有四萬五千六百五十名。
1:26 屬偤大ê支族經過點算ê，
1:27 有七萬四千六百名。
1:28 屬以薩迦ê支族經過點算ê，
1:29 有五萬四千四百名。
1:30 屬西布倫ê支族經過點算ê，
1:31 有五萬七千四百名。
1:32 屬以法連ê支族經過點算ê，
1:33 有四萬khòng五百名。
1:34 屬瑪拿西ê支族經過點算ê，
1:35 有三萬二千兩百名。
1:36 屬便雅憫ê支族經過點算ê，
1:37 有三萬五千四百名。
1:38 屬但ê支族經過點算ê，
1:39 有六萬二千七百名。
1:40 屬亞設ê支族經過點算ê，
1:41 有四萬一千五百名。
1:42 屬拿弗他利ê支族經過點算ê，
1:43 有五萬三千四百名。
1:44 Chiahê lóng是經過點算ê，是摩西kah亞倫kah以色列十二個首領所算ê，in ta̍k个代表in ê宗族。
1:45 Án-ne，以色列人經過點算ê，照伊ê宗族，tùi二十歲以上，見若以色列中ē出去交戰ê人，
1:46 to̍h是一切經過點算ê，總共有六十萬三千五百五十名。
1:47 獨獨利未人照祖宗ê支族，無算在內。
1:48 因為上主bat吩咐摩西講：
1:49 「獨獨利未支族你m̄ thang點算，mā m̄ thang tī以色列中算in ê總額。
1:50 總是，tio̍h派利未人管理證據ê會幕kah其中所有ê器具，以及一切屬tī hit內面ê，in tio̍h扛會幕kah其中所有ê器具，mā tio̍h侍候會幕，tī它ê四箍圍紮營。
1:51 會幕beh出發ê時，利未人tio̍h kā它拆起來；會幕beh搭ê時，利未人tio̍h kā它khiā起來。以外ê人若近óa會幕，一定tio̍h死。
1:52 以色列人搭布棚，各照in ê軍隊，各歸in ê本營，各歸in ê大旗。
1:53 獨獨利未人tio̍h tī證據ê會幕四箍圍紮營，免得大受氣臨到tī以色列ê會眾；利未人mā tio̍h守證據ê會幕ê責任。」
1:54 以色列人to̍hánne行，見若上主所命令摩西ê，in to̍h照ánne行。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。