利未記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
26:1 遵守誡命會蒙福
(申7：12-24；28：1-4)
上主講：「Lín m̄ thang為kakī 做啥物神佛，mā m̄ thang chhāi雕刻ê偶像á是柱像，mā m̄ thang tī lín ê地界安置啥物刻像ê石，kā伊跪拜，因為我是上主—lín ê上帝。
26:2 Lín tio̍h守我chiahê安息，敬拜我ê聖所。我是上主。
26:3 「Lín若遵thàn我ê律例，守我ê誡命來遵行，
26:4 我to̍hē kā lín落及時ê雨，地ē出它ê農產物，田野ê樹木會結果子。
26:5 Lín phah五穀會phah到挽葡萄ê時，挽葡萄會挽到掖種ê時，lín koh ē食lín ê米糧食到飽，tī lín ê土地安然tòa落去。
26:6 「我beh賞賜平安tī lín ê地，lín倒teh睏，無人kā lín phah驚。我beh tī lín ê地除去惡獸，刀劍mā bē經過lín ê地。
26:7 Línē kā對敵趕走，in beh tī lín ê面前倒tī刀下。
26:8 Lín五個人ē趕走一百個人，lín一百個人ē趕走一萬個人，對敵ē tī lín ê面前倒tī刀下。
26:9 我beh看顧lín，hō͘ lín seⁿ-thòaⁿ真chē，mā beh kah lín建立我ê約。
26:10 Lín會食khǹg真久ê舊五穀，koh為tio̍h新ê，kā舊ê搬出來。
26:11 我beh tī lín中間立我ê會幕，我ê心mā無討厭lín。
26:12 我beh行tī lín中間，我beh做lín ê上帝，lín beh做我ê子民。
26:13 我是上主—lín ê上帝，bat chhōa lín出埃及地，免得lín做in ê奴僕；我bat斬斷lín ê枷擔ê索，hō͘ lín挺身來行。」
26:14 違反誡命受處罰
(申28：15-68)
上主講：「Lín若m̄遵thàn我，m̄守我所有ê誡命，
26:15 lín若棄sak我ê律例，心內討厭我ê法度，致使無行我一切ê誡命，違背我ê約，
26:16 我to̍h beh ánne kā lín款待，我定tio̍h beh hō͘ lín驚惶、消瘦、熱病，目chiu phah-pháiⁿ，心憂傷。Lín會空空掖種，因為lín ê對敵ē kā種籽食掉。
26:17 我ē對lín變面，línē敗陣tī對敵ê面前，怨恨lín-êē kā lín管轄，無人teh kā lín jiok，lín mā tio̍h逃走。
26:18 「Lín因為chiahê tāichì若iáu koh m̄遵thàn我，我to̍h beh為tio̍h lín ê罪加添七倍kā lín責罰。
26:19 我beh斷絕lín有勢力ê驕傲，koh beh hō͘ lìn ê天親像鐵，lín ê地親像銅。
26:20 Lín出力勞苦會空空，因為lín ê地無出它ê農產物，地ê樹木mā無結它ê果子。
26:21 「Lín做tāichì若kah我反對，m̄肯遵thàn我，我to̍h beh照lín所做ê加添七倍降災禍hō͘ lín。
26:22 我beh差野獸到lín ê中間，咬食lín ê kiáⁿ兒，吞滅lín ê chengseⁿ，hō͘ lín ê人額減少，lín ê路拋荒。
26:23 「Lín因為chiahê iáu koh無受責督來歸向我，做tāichì反對我，
26:24 我mā beh做tāichì來反對lín，我本身beh因為lín ê罪，kā lín phah七倍重。
26:25 我koh beh hō͘刀劍臨到lín，報應lín背約ê罪；lín ē受圍困tī城內，我beh降瘟疫tī lín中間，mā beh kā lín交tī對敵ê手。
26:26 我beh斷絕lín所óa靠ê米糧，hit時beh有十個chabó͘人tī一个爐kā lín煏餅，秤lín ê額ê食物hō͘ lín，lín想beh食mā食bē飽。
26:27 「Lín因為這一切ê tāichì若iáu koh m̄遵thàn我，mā做tāichì反對我，
26:28 我to̍h ē發出大受氣，做tāichì來反對lín，我本身因為lín ê罪，kā lín責罰七倍重。
26:29 Koh lín會食lín ê kiáⁿ ê肉，lín ê chabó͘ kiáⁿ ê肉lín mā beh食。
26:30 我mā beh毀壞lín ê山頭壇，剉lín ê日頭像，kā lín ê身屍hiat tī lín ê偶像ê身上，我ê心mā ē討厭lín。
26:31 我beh hō͘ lín ê城拋荒，hō͘ lín chiahê聖所荒廢，我mā無beh koh鼻lín ê芳料ê芳味。
26:32 我beh hō͘地荒廢，lín ê對敵khiā tī hia êē因為ánne，tio̍h驚kah gāng去。
26:33 我beh kā lín tī列邦中phah四散，我mā beh拔刀jiok lín。Lín ê地會荒廢，lín ê城會拋荒。
26:34 「Lín tòa tī對敵ê地ê時，lín ê地拋荒beh享受伊ê安息；tī hit時，地beh歇睏，享受它ê安息。
26:35 地拋荒gōa久，to̍h ē得tio̍h hiah久ê安息，因為lín tòa tī hia ê日，lín chiahê安息ê期間它無得tio̍h安息。
26:36 「若是lín所chhun落來ê人，我beh hō͘ in tī對敵ê地，心驚kah暈去。樹葉hō͘風吹振動ê聲jiok in，in beh逃閃，ná親像teh逃閃刀劍，無人jiok伊，伊mā ē跋倒。
26:37 無人jiok ê時，mā親像tī刀劍ê頭前，in ē大家相kheh來跋倒。Lín tī對敵ê面前mā khiā bē tiâu。
26:38 Línē tī列邦中滅亡，對敵ê地ē kā lín吞食。
26:39 Lín所chhun落來ê人ētī對敵ê地，因為kakī ê罪來消滅，mā ē因為祖先ê罪kah in仝款消滅。
26:40 「In會承認kakī ê罪kah in祖先ê罪，to̍h是in所悖逆我ê罪，koh承認kakī 做tāichì來反對我，
26:41 所以，我做tāichì來反對in，chhōa in到對敵ê地。Hit時，in無受割禮ê心，若有謙卑，to̍h ē甘願受罪ê刑罰。
26:42 我beh記念我kah雅各所立ê約，我beh記念我kah以撒所立ê約；我kah亞伯拉罕所立ê約，我mā beh記念chitê地。
26:43 In tio̍h離開hitê地，tī它拋荒kah in無tī ·leh ê時，hō͘地得tio̍h享受它ê安息。而且in甘願受罪ê刑罰，因為in棄sak我ê法度，心內討厭我ê律例。
26:44 雖然ánne，in tī對敵ê地ê時，我iáu koh無kā in棄sak，mā無討厭in，來kā in全部消滅，致使違背我kah in所立ê約，因為我是上主—in ê上帝。
26:45 我mā beh為tio̍h in ê緣故，記念我kah in ê祖先所立ê約，to̍h是我tī異邦人ê面前chhōa in出埃及地ê，beh做in ê上帝ê。我是上主。」
26:46 Chiahê律例、法度、教示，to̍h是上主tī西奈山託摩西，tī祂本身kah以色列人ê中間所立ê。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。