創世記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
14:1 A-bú-lâm Chhiúⁿ-kiù Ló-toh
Tng Am-la-hoel chò Sī-nal ông, A-lio̍k chò E-la-sal ông, Ke-tah-láu-mel chò Ê-lám ông, Ti-tal chò Go-im ông ê sî,
14:2 In lâi kong-kek So͘-tóm ông Be-la̍h, Am-mo͘-la̍h ông Bil-siah, At-mah ông Si-nap, Che-bó-ím ông Se-me-bel, í-ki̍p Be-la̍h ông ( Be-la̍h to̍h-sī Cho-al ).
14:3 In lóng chū-chi̍p tī Si-tím ê soaⁿ-kok; Si-tím soaⁿ-kok to̍h-sī Iâm-hái.
14:4 In ho̍k-sāi Ke-tah-láu-mel cha̍p-jī nî, kàu cha̍p-saⁿ nî pōe-poān.
14:5 Cha̍p-sì nî, Ke-tah-láu-mel kah chiahê liân-bêng ê ông lóng lâi, tī A-si-ta-lot-kal-naim thâi-iâⁿ Le-hoa-im lâng, tī Ham thâi-iâⁿ Chu-ji lâng, tī Sia-beh-ki-lia̍h-thaim-têng thâi-iâⁿ E-mih lâng,
14:6 Tī Hô-lī lâng ê Se-il soaⁿ thâi-iâⁿ Hô-lī lâng, it-ti̍t kàu kīn tī khòng-iá ê El-pa-lân.
14:7 In tò-tńg kàu Eng-mi-si-pat, to̍h-sī Ka-té-si, kong-kek A-má-le̍k choân tē kah tòa tī Ha-cha-chóng-tha-mal ê A-mô͘-lī lâng.
14:8 Tùi hit sî khí, So͘-tóm ông, Am-mo͘-la̍h ông, At-mah ông, Che-bó-ím ông, Be-la̍h ông, ( Be-la̍h to̍h-sī Cho-al ), lóng chhut-lâi tī Si-tím ê soaⁿ-kok pâi tīn kah in kau-chiàn,
14:9 Chiū-sī kah Ê-lám ông Ke-tah-láu-mel, Go-im ông Ti-tal, Sī-nal ông Am-la-hoel, E-la-sal ông A-lio̍k kau-chiàn; sì-ê ông tùi-te̍k gō͘-ê ông.
14:10 Si-tím soaⁿ-kok lóng sī chio̍h-iû kheⁿ, So͘-tóm kah Am-mo͘-la̍h chiahê ông tô-cháu, poa̍h tī hia, kî-tha ê cháu chiūⁿ soaⁿ.
14:11 In chiū kā So͘-tóm kah Am-mo͘-la̍h ê châi-bu̍t, í-ki̍p in ê kan-niûⁿ lóng chhiúⁿ-.khì.
14:12 In koh kā A-bú-lâm ê ti̍t-á Ló-toh kah i ê châi-bu̍t chhiúⁿ-.khì; hit sî, Ló-toh tòa tī So͘-tóm.
14:13 Ū chi̍t-ê tô-cháu ê lâng, lâi kā Hi-bú-lâi lâng A-bú-lâm kóng; hit sî, A-bú-lâm tòa tī A-mô͘-lī lâng Mam-lē ê siōng chhiū hit só͘-chāi, Mam-lē, E-si-kol kah A-nel lóng sī hiaⁿ-tī, ū kah A-bú-lâm liân-bêng.
14:14 A-bú-lâm thiaⁿ tio̍h i ê ti̍t-á hō͘ lâng lia̍h-.khì, chiū chhōa seⁿ-thòaⁿ tī i ê ke-.ni̍h cheng-liān ê chòng-teng saⁿ-pah cha̍p-peh lâng, jiok kàu Tàn.
14:15 I kah i ê lô͘-po̍k thàu-mê hun tūi, kā in kong-kek; it-ti̍t jiok kàu Ta-má-su-ko tò pêng ê Hô-pa,
14:16 kā it-chhè ê châi-bu̍t chhiúⁿ tò tńg-.lâi, liân i ê ti̍t-á Ló-toh kah i ê châi-bu̍t, í-ki̍p hū-lí, jîn-bîn mā lóng chhiúⁿ tò tńg-.lâi.
14:17 Mal-ki-che-tek Chiok-hok A-bú-lâm
A-bú-lâm thâi-iâⁿ Ke-tah-láu-mel í-ki̍p kah i chò-tīn hiahê ông tńg-.lâi ê sî, So͘-tóm ông chhut-.lâi, kàu Sa-bí ê soaⁿ-kok kā i gêng-chiap; Sa-bí ê soaⁿ-kok to̍h-sī ông ê soaⁿ-kok.
14:18 Mā ū Sa-lèm ông Mal-ki-che-tek tòa piáⁿ kah chiú chhut-.lâi, i sī chì-koân Siōng-tè ê chè-si.
14:19 I kā A-bú-lâm chiok-hok, kóng, " Goān thiⁿ-tē ê Chú, chì-koân Siōng-tè sù-hok hō͘ A-bú-lâm!
14:20 Chì-koân Siōng-tè kā tùi-te̍k kau tī lí ê chhiú, eng-kai oló I. " A-bú-lâm kā só͘-ū só͘ tit tio̍h ê, cha̍p hūn the̍h chi̍t hūn hō͘ Mal-ki-che-tek.
14:21 So͘-tóm ông kā A-bú-lâm kóng, " Kā lâng kui góa, mi̍h lóng hō͘ lí. "
14:22 A-bú-lâm kā So͘-tóm ông kóng, " Góa ū kí thiⁿ-tē ê Chú — chì-koân Siōng-tè Siōng-chú lâi chiùchōa,
14:23 Só͘-ū lí ê mi̍h, to̍h-sī chi̍t tiâu sòaⁿ, chi̍t tiâu ôe-tòa, góa lóng m̄-the̍h, bián-tit lí kóng, ' Góa hō͘ A-bú-lâm hó-gia̍h. '
14:24 Chí-ū siàu-liân lâng só͘ chia̍h ê, í-ki̍p kah góa tâng kiâⁿ ê lâng A-nel, E-si-kol, Mam-lē só͘ èng-tit ê hūn-gia̍h, thang chhut-chāi in the̍h. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。