利未記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
25:1 安息年
(申15：1-11)上主tī西奈山吩咐摩西講：
25:2 「你tio̍h吩咐以色列人，kā in講：Lín到我賞賜hō͘ lín hitê地ê時，地to̍h tio̍h kā上主守安息。
25:3 六年tio̍h種作你ê田園，六年tio̍h修整你ê葡萄園，來收地ê出產。
25:4 到第七年，地tio̍h守大ê安息，to̍h是kā上主守ê安息，m̄ thang種作你ê田園，mā m̄ thang修整葡萄園。
25:5 連田裡kakī 發ê五穀，mā m̄ thang收割；園裡無經過修整ê葡萄樹，mā m̄ thang挽葡萄。Chit年是地ê安息年。
25:6 地tī安息年所出ê beh hō͘ lín做食物，它ê出產lóng beh hō͘你kah你ê奴僕，你ê女婢，你ê倩工，以及寄腳tī你hia ê出外人，
25:7 kah你ê chengseⁿ，以及tī你ê地ê走獸做食物。」
25:8 禧年
「你tio̍h為kakī 算安歇年七个，to̍h是七pái ê七年。Chit七pái ê安息年，對你是四十九年。
25:9 Hit年七月初十，你tio̍h四界pûn大聲ê哨角；tī贖罪ê日，tio̍h全地pûn哨角。
25:10 Lín tio̍h kā第五十年分別做聖，tī全地kā所有tòa tī hia ê人民宣布自由。Chit年beh做lín ê禧年，lín ta̍k人tio̍h tńg去伊kakī ê產業，ta̍k人tio̍h tńg去伊kakī ê本家。
25:11 第五十年beh做lín ê禧年，m̄ thang種作；地kakī 發ê m̄ thang收割；無修整ê葡萄樹mā m̄ thang挽葡萄。
25:12 因為這是禧年，lín tio̍h掠它做聖，lín thang食地裡kakī 出ê農產物。
25:13 「Chitê禧年，lín ta̍k人tio̍h tńg去kakī ê產業。
25:14 Lín賣物hō͘厝邊，á是tùi厝邊買物，lín m̄ thang相khek虧。
25:15 你tio̍h照禧年後ê年限，tùi厝邊買，伊mā tio̍h照收成ê年限賣hō͘ lín。
25:16 年限若chē，你tio̍h加添它ê價錢，年限若少，你tio̍h減少它ê價錢，因為伊是照收成ê數額來賣hō͘ lín。
25:17 Lín mā m̄ thang相khek虧，總是，tio̍h敬畏lín ê上帝，因為我是上主—lín ê上帝。」
25:18 安息年ê問題
「所以，lín tio̍h行我ê律例，遵守我ê法度來行，to̍h thang tī hitê地安然tòa落去。
25:19 地mā ē出它ê農產物，lín to̍hē tàng食飽，tī hitê地安然tòa落去。
25:20 Lín若講：『你看，chitê第七年阮無種作，mā無收成農產物，beh食啥物？』
25:21 我ētī第六年命令我ê福氣hō͘ lín，地to̍h ē生出三年ê農產物。
25:22 第八年lín tio̍h種作，mā tio̍h食地ê出產，to̍h是舊ê米糧，thèng候到第九年，hit年ê出產收成ê時，lín iáu koh teh食舊ê米糧。」
25:23 買賣土地ê規定
「地m̄ thang永遠賣斷，因為地是我ê；lín tī我ê面前是出外人，是寄腳ê。
25:24 Lín所得tio̍h做產業ê土地，tio̍h准人贖回。
25:25 「你ê兄弟若變sànchhiah，賣伊ê產業幾nā份，伊ê至親tio̍h來kā伊贖回你ê兄弟所賣ê。
25:26 若無人thang kā伊贖回，伊本身koh成做好額ê時，有夠額thang來贖回，
25:27 伊to̍htioh8算賣出地ê年限，kā所chhun落來ê還hitê買主，本身to̍h thang回復伊ê產業。
25:28 Hitê人若bē tàng為kakī 贖回，所賣ê地就猶原存tī買主ê手，一直到禧年；禧年若到，產業tio̍h交出來，hitê人to̍h thang回復伊ê產業。
25:29 「人若賣城內ê厝，賣了後一年to̍h thang贖回；tī一年內lóng有贖回ê權利。
25:30 若一年滿無贖回chitê城內ê厝，to̍h定tio̍h永遠歸買主到萬世代，tī禧年mā m̄免還賣主。
25:31 獨獨厝tī無城牆ê田庄所在，tio̍h kā它看做kah田相siâng，thang贖回；到禧年，lóng tio̍h還賣主。
25:32 總是，利未人ê城，to̍h是in所得tio̍h做產業ê城hit中間ê厝，利未人thang不管時來贖回。
25:33 若有人tùi利未人贖回厝宅，所賣ê厝tī所得tio̍h做產業ê城，到禧年to̍h tio̍h交出來還賣主，因為利未人城內ê厝，是in tī以色列人中間ê產業。
25:34 總是，in ê城外郊野ê地m̄ thang賣，因為he是in永遠ê產業。」
25:35 借錢hō͘ Sàn-chhiah人ê規定
「你ê兄弟變sànchhiah來tòa tī你hia，你tio̍h kā伊補助，hō͘伊kah你做伙tòa，親像出外人kah寄腳ê。
25:36 M̄-thang the̍h伊ê利息，mā m̄ thang kā伊the̍h khah加；獨獨tio̍h敬畏你ê上帝，hō͘你ê兄弟kah你tòa。
25:37 你借伊錢m̄ thang kā伊the̍h利息，你借伊米糧mā m̄ thang kā伊the̍h khah加。
25:38 我是上主—lín ê上帝，bat chhōa lín出埃及地，為tio̍h beh賞賜hō͘ lín迦南地，mā beh做lín ê上帝。」
25:39 贖回奴隸ê規定
「你ê兄弟若變sànchhiah去tòa tī你hia，kā本身賣hō͘你，m̄ thang hō͘伊親像奴僕服事你。
25:40 伊tio̍h tī你hia親像做工人，kah寄腳ê相siâng，tio̍h服事你直到禧年。
25:41 Hit時，伊ē離開你出去，kah伊ê kiáⁿ兒做伙tńg去伊ê本家，回復伊祖先ê產業。
25:42 因為in是我ê奴僕，是我所chhōa出埃及地ê，m̄ thang kā in賣做奴僕。
25:43 M̄-thang嚴嚴kā伊管轄，總是，tio̍h敬畏你ê上帝。
25:44 關係你所beh ài ê奴僕kah女婢，thang tùi四箍圍ê國中間買來做奴僕kah女婢。
25:45 Koh hiahê寄腳tī lín中間ê出外人ê kiáⁿ兒，以及in kah lín tòa hiahê家眷，tī lín ê所在所生ê，lín mā thang tùi in中間買人來，in beh做lín ê家業。
25:46 Lín beh取in做產業，留hō͘ kiáⁿ孫做家業，línē永遠tùi in中間kā伊征服做奴僕；獨獨lín ê兄弟以色列人，lín m̄ thang嚴嚴相管轄。
25:47 「Tòa tī lín hia ê出外人á是寄腳ê若變好額，你ê兄弟tī in hia變sànchhiah，kā kakī 賣hō͘ lín中間ê出外人á是寄腳ê á是外人ê家族。
25:48 賣了後thang kā伊贖回，伊ê兄弟ê一个thang kā伊贖回。
25:49 叔伯á是叔伯ê kiáⁿ thang kā伊贖回，á是本家ê親人mā thang kā伊贖回。伊本身若成做好額，mā thang kakī 贖回。
25:50 伊tio̍h kah買主算賬，tùi賣kakī hit年起，算到禧年，所賣ê價錢tio̍h照年限ê chē少，tio̍h照做工人ê年限kah伊算。
25:51 若所chhun落來ê年iáu koh chē，to̍h tio̍h照hitê年限兌買伊ê價錢，伊tio̍h還伊贖回ê價錢。
25:52 若到禧年chhun無幾年，tio̍h kah伊算，照hitê年限tio̍h還伊贖回ê價錢。
25:53 伊tio̍h kah伊tòa，親像每年所倩ê做工人，買主m̄ thang嚴嚴kā伊管轄。
25:54 若無tī chiahê受贖，到禧年伊kah伊ê kiáⁿ兒lóng thang出去自由。
25:55 因為以色列人是我ê奴僕，是我chhōa出埃及地ê。我是上主—lín ê上帝。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。