利未記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
21:1 Chè-si Sèng-kiat ê Kui-tēng
Siōng-chú tùi Mô͘-se kóng, " Lí tio̍h hoan-hù A-lông ê kiáⁿ-sun chò chè-si ê, kóng: Ka-cho̍k tiong nā ū lâng sí, m̄ thang ūi tio̍h i lâi òe lahsap kakī.
21:2 Chóng-.sī, ūi tio̍h i kut-jio̍k ê chhin, to̍h-sī ūi tio̍h i ê lāu-bú, ūi tio̍h i ê lāu-pē, ūi tio̍h i ê kiáⁿ, ūi tio̍h i ê chabó͘ kiáⁿ, ūi tio̍h i ê hiaⁿ-tī,
21:3 í-ki̍p kah i chì-chhin chò chāi-sek-lí ê chí-mōe, to̍h thang ūi tio̍h i òe lahsap kakī.
21:4 I nā í-keng tī jîn-bîn tiong chò thâu, chiū m̄ thang sûi sio̍k lâi òe lahsap kakī.
21:5 " Thâu-khak m̄ thang thì kng-kng, chhùi-chhiu ê sì-kho͘-ûi m̄ thang khun, mā m̄ thang koah kakī ê bah.
21:6 Tio̍h kui in ê Siōng-tè lâi chiâⁿ-sèng, m̄ thang siat-to̍k in ê Siōng-tè ê miâ, in-ūi Siōng-chú ê hóe-chè sī in ê Siōng-tè ê chia̍h-mi̍h, sī in só͘ hiàn ê, só͘-í, in tio̍h chiâⁿ-chò sèng.
21:7 In m̄ thang chhōa ki-lí chò bó͘ á-.sī hông òe lahsap ê chabó͘ lâng chò bó͘, mā m̄ thang chhōa hō͘ tiōng-hu lî-chhut ê chabó͘ lâng chò bó͘, in-ūi in sī kui in ê Siōng-tè chò sèng.
21:8 Só͘-í, lí tio̍h kā i hun-pia̍t chò sèng, in-ūi i hiàn lí ê Siōng-tè ê chia̍h-mi̍h, lí tio̍h khòaⁿ i chò sèng, in-ūi hō͘ lín chiâⁿ-sèng ê Siōng-chú, to̍h-sī sèng ê.
21:9 Chè-si ê chabó͘ kiáⁿ nā kiâⁿ kan-îm, lêng-jio̍k kakī, to̍h-sī lêng-jio̍k i ê lāu-pē, tio̍h ēng hóe kā i sio sí.
21:10 " Tī hiaⁿ-tī tiong chò tōa-chè-si, ēng boah ê iû thîn tī i ê thâu-khak, koh siat-li̍p tam-tng sèng-chit, chhēng sèng-saⁿ ê, m̄ thang phah-sòaⁿ thâu-mn̂g, mā m̄ thang thiah-li̍h saⁿ.
21:11 M̄-thang óa-kīn si-thé, mā m̄ thang ūi tio̍h i ê lāu-pē á-.sī i ê lāu-bú lâi òe lahsap kakī.
21:12 M̄-thang lī-khui sèng-só͘, mā m̄ thang siat-to̍k Siōng-tè ê sèng-só͘, in-ūi i ê Siōng-tè ū boah iû ê bián-liû tī i ê thâu-khak. Góa sī Siōng-chú.
21:13 I tio̍h chhōa chāi-sek-lí chò bó͘.
21:14 Kóaⁿ-hū á-.sī hông lî ê chabó͘ lâng, á-.sī hông òe lahsap-ê, á-.sī chhiong-ki chiahê, lóng m̄ thang chhōa; to̍k-to̍k thang chhōa pún cho̍k ê chāi-sek-lí chò bó͘.
21:15 Tī i ê jîn-bîn tiong m̄ thang lêng-jio̍k i ê kiáⁿ-sun, in-ūi Góa sī hō͘ i chiâⁿ-sèng ê Siōng-chú. "
21:16 Siōng-chú hoan-hù Mô͘-se kóng,
21:17 " Lí tio̍h kā A-lông kóng: Lí ta̍k sè-tāi ê kiáⁿ-sun kiàn-nā ū phòa-siùⁿ ê, lóng m̄ thang kiâⁿ óa-lâi hiàn i ê Siōng-tè ê chia̍h-mi̍h.
21:18 In-ūi kiàn-nā ū phòa-siùⁿ ê lâng, bô-lūn sī chheⁿmê-.ê, pái-kha-.ê, nah-phīⁿ ê, ki-thé ki-hêng ê,
21:19 tn̄g-kha tn̄g-chhiú ê,
21:20 ún-ku ê, é-sè ê, Ba̍k-chiu ū mô͘-pēⁿ ê, seⁿ sián ê, seⁿ chhng ê, á-.sī sún-hoāi gōa-sin ê, lóng m̄ thang kīn óa-.lâi.
21:21 Chè-si A-lông ê kiáⁿ-sun, hoān-nā ū phòa-siùⁿ ê lóng m̄ thang kiâⁿ óa-lâi hiàn Siōng-chú ê hóe-chè. I ū phòa-siùⁿ, m̄ thang kiâⁿ óa-lâi hiàn i ê Siōng-tè ê chia̍h-mi̍h.
21:22 Siōng-tè ê chia̍h-mi̍h, bô-lūn sī chì-sèng ê, sī sèng ê, i lóng thang chia̍h.
21:23 Chóng-.sī, m̄ thang lâi-kàu tiùⁿ-lî, mā m̄ thang kīn-óa tôaⁿ chêng, in-ūi i ū phòa-siùⁿ, bián-tit siat-to̍k Góa hiahê sèng-só͘. In-ūi Góa sī hō͘ in chiâⁿ-sèng ê Siōng-chú. "
21:24 Mô͘-se chiū hoan-hù A-lông kah i hiahê kiáⁿ, í-ki̍p I-su-la-el jîn-bîn ánne kóng.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。