利未記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
20:1 死刑ê規定
上主吩咐摩西講：
20:2 「你tio̍h koh對以色列人講：見若以色列人á是tī以色列中寄腳ê出外人，用kakī ê kiáⁿ兒獻hō͘摩洛ê，一定tio̍h hō͘伊死，hit地方ê人tio̍h用石頭kā伊tìm死。
20:3 我mā beh對hitê人變面，kā伊tùi人民中間剪除，因為伊用kiáⁿ兒獻hō͘摩洛，kā我ê聖所òe lahsap，褻瀆我ê聖名。
20:4 Hitê人用kiáⁿ兒獻hō͘摩洛，hit所在ê人若tèⁿ做無看tio̍h，mā無hō͘伊死，
20:5 我beh對hitê人kah伊ê家變面，kā伊kah所有tòe伊行邪淫ê，to̍h是kah摩洛行邪淫ê，lóng kā伊tùi人民中間剪除。
20:6 「人偏ǹg hō͘鬼附身ê kah行邪術ê，tòe in行邪淫，我beh對hitê人變面，kā伊tùi人民中間剪除。
20:7 所以，lín tio̍h kakī 聖潔來成聖，因為我是上主—lín ê上帝。
20:8 Lín tio̍h守我ê律例來做。我是hō͘ lín成聖ê上主。
20:9 「見若咒詛老父á是老母ê，一定tio̍h hō͘伊死；伊咒詛老父á是老母，伊ê罪tio̍h歸tī伊ê身上。
20:10 「Kah別人ê bó͘行姦淫，to̍h是kah伊厝邊ê bó͘行姦淫ê，姦夫kah淫婦一定tio̍h hō͘ in死。
20:11 人kah後母私通ê，to̍h是凌辱伊ê老父；in兩人一定tio̍h hō͘ in死，in ê罪歸tī in。
20:12 人kah新婦私通ê，一定tio̍h hō͘ in兩人lóng死；in行逆倫ê tāichì，in ê罪歸tī in。
20:13 人若親像kah chabó͘人交合相siâng去kah chapo͘人交合，in兩人行可惡ê tāichì；一定tio̍h hō͘ in死，in ê罪歸tī in。
20:14 人若娶bó͘續娶bó͘ ê老母，to̍h是極pháiⁿ ê tāichì，tio̍h用火kā chit三个人燒死，免得lín中間有chit款ê pháiⁿ行為。
20:15 人kah獸交合，伊一定tio̍h死，mā tio̍h kā hit隻獸thâi死。
20:16 Cha-bó͘人親近獸來kah牠交合，你tioh8thâi死hitê chabó͘人kah獸，一定tio̍h hō͘ in死，in ê罪歸tī in。
20:17 「人若牽伊ê姊妹，無論同父á是同母ê，伊看她ê下身，她看伊ê下身，這是見笑ê tāichì；in tio̍h tī伊ê人民ê目chiu 前hông剪除。伊有露現伊ê姊妹ê下身，tio̍h擔當伊ê罪。
20:18 Cha-bó͘人經期到，人若kah她同房，露現她ê下身，ánne，伊有露現chabó͘人ê血源，chabó͘人mā有露現伊ê血源，in兩 个tio̍h tùi in ê人民中間hông剪除。
20:19 「老母ê姊妹á是老父ê姊妹，m̄ thang露現in ê下身，ánne to̍h是凌辱骨肉ê親，in tio̍h擔當in kakī ê罪。
20:20 人若kah伊ê嬸姆私通，to̍h是凌辱伊ê叔伯；in tio̍h擔當in kakī ê罪，會一世人無kiáⁿ。
20:21 人娶兄弟ê bó͘，這是lahsap ê tāichì，伊有凌辱伊ê兄弟，in一定ē無kiáⁿ。
20:22 「所以，lín tio̍h守我一切ê律例kah我所有ê法度來行，免得我所chhōa lín去tòa ê地kā lín吐出去。
20:23 我tī lín ê面前所趕出ê人民，lín m̄ thang遵thàn in ê風俗，因為in行chiahê所有ê tāichì，所以，我討厭in。
20:24 總是，我bat對lín講：Lín會承接in ê地，我beh用hitê地賞賜hō͘ lín做產業，to̍h是流奶kah蜜ê地。我是上主—lín ê上帝，tùi 萬民ê中間kā lín分別出來。
20:25 所以，lín tio̍h分別清氣kah無清氣ê獸，清氣kah無清氣ê鳥隻；á是獸，á是禽，á是爬tī地裡所有ê活物，我所kā lín分別做無清氣ê，lín m̄ thang為tio̍h in致使kakī 做出thang討厭ê tāichì。
20:26 Lín tio̍h歸tī我來做聖，因為我是聖ê上主，tùi萬民ê中間kā lín分別出來，來歸tī我。
20:27 「有鬼附身á是行邪術ê，無論男女一定tio̍h hō͘伊死；人tio̍h用石頭kā in tìm死，in ê罪tio̍h歸tī in kakī 。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。