啟示錄 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
20:1 Sa-tán Siū Khún-pa̍k
Jiân-āu, góa koh khòaⁿ tio̍h chi̍t-ê thiⁿ-sài tùi thiⁿ-téng lo̍h-.lâi, chhiú the̍h bô-té chhim kheⁿ ê só-sî kah chi̍t tiâu tōa tiâu thih-liān.
20:2 I lia̍h hit chiah liông, to̍h-sī hit bóe lāu- chôa, mā sī kiò-chò Mô͘-kúi á-.sī Sa-tán ê, ēng thih-liān kā i pa̍k chi̍t chheng nî .
20:3 Thiⁿ-sài kā i hiat lo̍h-khì bô-té chhim kheⁿ, koaiⁿ khí-.lâi, koh ēng hong-ìn hong khí-.lâi, hō͘ i bē tàng koh bê-he̍k lia̍t kok, it-ti̍t kàu chi̍t chheng nî móa; chit-ê kî-hān liáu-āu, i it-tēng ē chiām-sî siū tháu-pàng.
20:4 Sèng-kiat ê Lâng kah Ki-tok Chò-hóe Thóng-tī
Góa koh khòaⁿ tio̍h kúi-nā-ê pó-chō, chē tī hit téng-bīn ê ū tit tio̍h sím-phòaⁿ ê koân-pèng; góa mā ū khòaⁿ tio̍h hiahê ūi I-é-su chò kiàn-chèng kah ūi tio̍h Siōng-tè ê tō hō͘ lâng chām-thâu ê lâng ê lêng-hûn. Chiahê lâng m̄ bat pài hit chiah béng-siù kah béng-siù ê chō-siōng, thâu-hia̍h á-.sī tī chhiú-.ni̍h mā bô siū i khàm ìn chò kì-hō. In lóng koh-oa̍h kah Ki-tok chò-hóe thóng-tī chi̍t chheng nî .
20:5 Che sī thâu chi̍t pái ê koh-oa̍h, kî-tha ê sí-lâng tio̍h kàu hit-ê chi̍t chheng nî kî-móa, chiah ē koh oa̍h.
20:6 Tī thâu chi̍t pái koh-oa̍h ū hūn ê lâng chin ū hok-khì, in sī sèng-kiat ê lâng. Tē-jī pái ê sí-bông bô koân kā in koán-hat, in ē chò Siōng-tè kah Ki-tok ê chè-si, mā ē kah Ki-tok chò-hóe thóng-tī chi̍t chheng nî .
20:7 Sa-tán Chiàn-pāi
Hitê chi̍t chheng nî kî-móa, Sa-tán ē siū tháu-pàng chhut-.lâi.
20:8 I ē chhut-khì bê-he̍k tē-chiūⁿ sì-hng ê lia̍t kok, to̍h-sī Ò͘-g kah Má-gok, kā in tiàu-chi̍p óa-lâi kau-chiàn; in ê jîn-sò͘ chē kah ná hái soa.
20:9 In chiū khí-lâi tī tē-chiūⁿ, móa sì-kè khì ûi-khùn sìn-tô͘ ê iâⁿ kah Siōng-tè só͘ thiàⁿ ê siâⁿ; chiū ū hóe tùi thiⁿ kàng lo̍h-lâi kā in siau-bia̍t.
20:10 Hiahê kā in bê-he̍k ê Mô͘-kúi hông hiat lo̍h-khì hóe kah liû-hông ê ô͘; hit chiah béng-siù kah ké sian-ti chá to̍h í-keng tī hia; in ē mê-ji̍t siū khó͘-to̍k, éng-oán bô soah.
20:11 Chòe-āu ê Sím-phòaⁿ
Sòa lo̍h-.lâi, góa koh khòaⁿ tio̍h chi̍t-ê pe̍h-sek ê tōa pó-chō kah chē tī hit téng-bīn hit ūi. Tē kah thiⁿ tùi I ê bīn-chêng tô-cháu, cháu kah bô khòaⁿ tio̍h iáⁿ-chiah.
20:12 Góa koh khòaⁿ tio̍h sí-.khì ê lâng, bô-lūn tōa-sè lóng khiā tī pó-chō chêng. Kì-lio̍k ê chheh lóng hian-khui, lēng-gōa chi̍t pún oa̍h-miā-chheh mā hian-khui. Sí khì ê lâng chiàu in ê hêng-ûi, kin-kì chiahê chheh só͘ kì-chài ê lâi siū sím-phòaⁿ.
20:13 Hái kā lāi-bīn ê sí-lâng kau chhut-.lâi, sí-bông kah im-hú mā kā lāi-bīn ê sí-lâng kau chhut-.lâi. Ta̍k lâng chiàu in ê hêng-ûi siū sím-phòaⁿ.
20:14 Jiân-āu, sí-bông kah im-hú mā siū hiat lo̍h-khì hóe-ô͘, chit-ê hóe-ô͘ to̍h-sī tē-jī pái ê sí.
20:15 Miâ bô kì-chài tī oa̍h-miā-chheh ê lâng, mā lóng siū hiat lo̍h-khì hóe-ô͘.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。