啟示錄 線上收聽:中文和合本 現代中文譯本修訂版 現代台語 台語聖經 台語(長老會傳播中心授權) 客語 現代客語 福州話 粵語和合本 希臘文(WH-NT) 下載檔案 關於語音聖經
7:1 Hit Cha̍p-sì Bān Sì Chheng-ê I-su-la-el Lâng Siū Hong-ìn
Jiân-āu góa khòaⁿ tio̍h sì-ê thiⁿ-sài khiā tī tē ê sì-kak-thâu, kā tē sì-bīn ê hong tòng teh, hō͘ hong bē chhoe-lâi tē, hái kah it-chhè ê chhiū-ba̍k.
7:2 Góa koh khòaⁿ tio̍h lēng-gōa chi̍t-ê thiⁿ-sài chhiú the̍h éng-oán oa̍h ê Siōng-tè ê ìn, tùi ji̍t chhut ê só͘-chāi khí-.lâi, tùi niá-siū koân-pèng thang siong-hāi tē kah hái ê hit sì-ê thiⁿ-sài tōa-siaⁿ hoah,
7:3 Kóng, " Goán iáu-bōe tī lán ê Siōng-tè ê lô͘-po̍k ê thâu-hia̍h khàm ìn chò kì-hō í-chêng, lín m̄ thang siong-hāi tē, hái kah chhiū-ba̍k. "
7:4 Góa ū thiaⁿ tio̍h I-su-la-el ê kiáⁿ-sun kok chi-cho̍k ê tiong-kan, siū khàm ìn ê jîn-sò͘ chóng-kiōng ū cha̍p-sì bān sì-chheng.
7:5 Sio̍k Iô-tah chi-cho̍k siū khàm ìn ê ū chi̍t-bān nn̄g-chheng, sio̍k Lū-biān chi-cho̍k ê ū chi̍t-bān nn̄g-chheng, sio̍k Ga̍t chi-cho̍k ê ū chi̍t-bān nn̄g-chheng,
7:6 Sio̍k A-sel chi-cho̍k ê ū chi̍t-bān nn̄g-chheng, sio̍k Ná-hu-tha-lím chi-cho̍k ê ū chi̍t-bān nn̄g-chheng, sio̍k Má-ná-se chi-cho̍k ê ū chi̍t-bān nn̄g-chheng,
7:7 Sio̍k Si-miān chi-cho̍k ê ū chi̍t-bān nn̄g-chheng, sio̍k Lē-bī chi-cho̍k ê ū chi̍t-bān nn̄g-chheng, sio̍k It-sa-kal chi-cho̍k ê ū chi̍t-bān nn̄g-chheng,
7:8 Sio̍k Che-bú-lông chi-cho̍k ê ū chi̍t-bān nn̄g-chheng, sio̍k Iô-sé-huh chi-cho̍k ê ū chi̍t-bān nn̄g-chheng, sio̍k Biān-iá-mín chi-cho̍k ê ū chi̍t-bān nn̄g-chheng.
7:9 Chi̍t-tōa-tīn Lâng kah Tē-chhit-ê Hong-ìn
Jiân-āu góa koh khòaⁿ tio̍h chi̍t-tōa-tīn lâng, sò͘-bo̍k bô lâng sǹg ē liáu. In tùi ta̍k kok, ta̍k cho̍k, ta̍k-khoán jîn-bîn, ta̍k chióng gí-giân lâi, in lóng khiā tī pó-chō ê bīn-chêng, sin chhēng pe̍h saⁿ, chhiú gia̍h chang chhiū-ki.
7:10 In tōa-siaⁿ hoah, goān chín-kiù kui hō͘ chē tī pó-chō ê Siōng-tè, mā kui hō͘ iûⁿ-ko!
7:11 Chèng thiⁿ-sài khiā tī pó-chō kah tiúⁿ-ló í-ki̍p sì chiah oa̍h-mi̍h ê sì-kho͘-ûi, phak lo̍h-khì pó-chō chêng kèng-pài Siōng-tè,
7:12 Kóng, " A-men! Goān oló, êng-kng, tì-hūi, kám-siā, chun-kùi, koân-lêng, khùi-la̍t, lóng kui hō͘ lán ê Siōng-tè, it-ti̍t kàu bān-sè-tāi bô chīn. A-men! "
7:13 Tiúⁿ-ló tiong-kan ū chi̍t-ê mn̄g góa kóng, " Chiahê chhēng pe̍h-saⁿ ê sī siáⁿ lâng? In sī tùi tó-ūi lâi? "
7:14 Góa ìn kóng, " Sin-seⁿ, lí chiah chai iáⁿ. " I kā góa kóng, " Chiahê sī keng-kòe hit-ê tōa chai-lān chhut-.lâi ê. In ēng iûⁿ-ko ê hoeh kā in ê saⁿ sé kah pe̍h-pe̍h-pe̍h.
7:15 In chiū ánne tī Siōng-tè ê pó-chō chêng, mê-ji̍t tī I ê sèng-tiān ho̍k-sāi I. Chē tī pó-chō ê hit ūi ē kah in tông-chāi lâi pó-siú in.
7:16 In bē koh iau, mā bē koh chhùi-ta, ji̍t-thâu kah it-chhè ê sio-joa̍h lóng bē kā in siong-hāi.
7:17 In-ūi chē tī pó-chō ê iûⁿ-ko beh chò in ê bo̍k-chiá, chhōa in lâi-kàu oa̍h-miā ê chúi-chôaⁿ. Siōng-tè ē tùi in ê ba̍k-chiu, chhit-tiāu in só͘-ū ê ba̍k-sái. "
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。