啟示錄 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
3:1 Siá hō͘ Sal-tí Kàu-hōe ê Phoe
" Lí tio̍h siá phoe hō͘ Sal-tí kàu-hōe ê sù-chiá, kóng, ū Siōng-tè ê chhit-ê lêng kah chhit lia̍p chheⁿ ê hit ūi ánne kóng, góa chai lí ê só͘ chò; bêng-gī-siōng lí sī teh oa̍h, kî-si̍t lí sī sí-.khì.
3:2 Lí tio̍h kéng-séng, tio̍h ka-kiông hiahê teh beh sí-.khì ê khùi-si á. In-ūi góa khòaⁿ tio̍h lí ê hêng-ûi, tī góa ê Siōng-tè ê bīn-chêng iáu-bōe oân-choân.
3:3 Só͘-í, lí tio̍h ē kì-tit lí só͘ niá-siū kah só͘ thiaⁿ-.tio̍h ê, koh tio̍h chip-siú, mā tio̍h hóe-kái; nā m̄ kéng-séng, góa ē chhin-chhiūⁿ chha̍t-á lâi lí hia, lí it-tēng m̄-chai góa tang-sî ē lâi-kàu lí hia.
3:4 Chóng-.sī, tī Sal-tí iáu ū chi̍t-kóa lâng kā in ê saⁿ-khò͘ pó-chhî kah chin chheng-khì; in ē chhēng pe̍h saⁿ kah góa chò-hóe sì-kè kiâⁿ, in-ūi in ē kham-tit.
3:5 Tek-sèng ê lâng mā ē ánne chhēng pe̍h saⁿ, góa choa̍t-tùi bē kā i ê miâ tùi oa̍h-miā-chheh chhat-siau; góa ē tī góa ê Thiⁿ-pē kah I hiahê thiⁿ-sài ê bīn-chêng, kong-khai sêng-jīn i ê miâ.
3:6 Ū hīⁿ-khang ê lâng, lóng tio̍h thiaⁿ Sèng Sîn kā chiahê kàu-hōe só͘ kóng ê ōe. "
3:7 Siá hō͘ Hui-la-té-hui-ah Kàu-hōe ê Phoe
" Lí tio̍h siá phoe hō͘ Hui-la-té-hui-ah kàu-hōe ê sù-chiá, kóng, sèng-kiat koh chin-si̍t, chiáng-koán Ta-bi̍t ê só-sî, khui chiū bô lâng ē-tàng koaiⁿ, koaiⁿ chiū bô lâng ē-tàng khui ê hit ūi ánne kóng,
3:8 Góa chai lí ê só͘ chò. Lí khòaⁿ, góa í-keng tī lí ê bīn-chêng kā lí khui chi̍t sìⁿ mn̂g, sī bô lâng ē-tàng koaiⁿ ê. Góa mā chai lí kantaⁿ ū tām-po̍h-á khùi-la̍t, khiok ū chun-siú góa ê tō-lí, m̄ bat hó͘ⁿ-jīn góa ê miâ.
3:9 Lí khòaⁿ, hiahê sio̍k Sa-tán ê hōe-tn̂g ê lâng, in chū-chheng sī Iô-tá-iah lâng, kî-si̍t m̄-sī, in sī teh kóng pe̍h-chha̍t; góa beh hō͘ in lâi phak tī lí ê kha chêng, koh hō͘ in chai góa thiàⁿ lí.
3:10 In-ūi lí ū chun-siú góa ê tō-lí, koh thun-lún kàu lō͘-bóe, só͘-í góa mā beh pó-siú lí thoat-lī hit-ê chhì-thàm ê sî-kî; chit-ê sî-kî teh beh lîm-kàu choân sè-kài, lâi khó-giām só͘-ū tòa tī tē-chiūⁿ ê lâng.
3:11 Góa liâmpiⁿ ē kàu, lí tio̍h chhî-siú só͘-ū ê tō-lí, chiah bián-tit ū lâng kā lí ê êng-koan chhiúⁿ-.khì.
3:12 Tek-sèng ê lâng, góa beh hō͘ i chiâⁿ-chò góa ê Siōng-tè sèng-tiān ê thiāu, éng-oán bē koh chhut-.khì; góa mā beh kā góa ê Siōng-tè ê miâ kah tùi thiⁿ-téng kàng-lo̍h ê Ê-lú-sa-lèm siâⁿ, í-ki̍p góa ê sin-miâ, lóng khek tī i ê sin chiūⁿ.
3:13 Ū hīⁿ-khang ê lâng lóng tio̍h thiaⁿ Sèng Sîn kā chiahê kàu-hōe só͘ kóng ê ōe. "
3:14 Siá hō͘ Lâu-tí-kiah Kàu-hōe ê Phoe
" Lí tio̍h siá phoe hō͘ Lâu-tí-kiah kàu-hōe ê sù-chiá, kā in kóng, chò A-men, chò tiong-sìn chin-si̍t ê kiàn-chèng chiá, chò Siōng-tè chhòng-chō ê goân-thâu hit ūi ánne kóng,
3:15 Góa chai lí ê só͘ chò, lí ê sìn-gióng bô sio bô léng. Góa khah ì-ài lí á-.sī sio á-.sī léng.
3:16 Lí kì-jiân sī lâ-lûn-sio, m̄-chiâⁿ sio koh m̄-chiâⁿ léng, góa beh kā lí tùi góa ê chhùi phùi chhut-.lâi.
3:17 In-ūi lí kóng, ' Góa sī hó-gia̍h lâng, í-keng hoat-châi, lóng bô khiàm-khoeh. ' Kî-si̍t lí m̄-chai kakī pi-chhám, khó-liân, sànchhiah, chheⁿmê koh thǹgpaktheh.
3:18 Góa khó͘-khǹg lí, nā beh hó-gia̍h tio̍h tùi góa bé kòe-hóe toàn-liān ê kim; koh bé pe̍h saⁿ lâi chhēng, thang hō͘ lí bē ū thǹgpaktheh ê kiàn-siàu; koh bé io̍h-ko lâi boah lí ê ba̍k-chiu, thang hō͘ lí ē khòaⁿ-kìⁿ.
3:19 Tùi góa só͘ thiàⁿ ê lâng, góa lóng kā in chek-pī kah koán-kà. Só͘-í, lín tio̍h jia̍t-sim, tio̍h hóe-kái.
3:20 Góa khiā tī mn̂g-kháu teh phah mn̂g, thiaⁿ tio̍h góa ê siaⁿ lâi khui mn̂g ê lâng, góa beh ji̍p-khì in tau kah i chò-hóe chia̍h pn̄g, i mā ē kah góa chò-hóe chia̍h.
3:21 Tek-sèng ê lâng, góa beh hō͘ i kah góa chò-hóe chē tī góa ê pó-chō, chhin-chhiūⁿ góa í-keng tek-sèng kah góa ê Thiⁿ-pē chò-hóe chē tī I ê pó-chō.
3:22 Ū hīⁿ-khang ê lâng, lóng tio̍h thiaⁿ Sèng Sîn kā chiahê kàu-hōe só͘ kóng ê ōe. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。