希伯來書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
7:1 麥基洗德祭司
Chitê麥基洗德是Sâ-liám王，mā是至koân上帝ê祭司。亞伯拉罕thâi贏列王tńg來ê時，麥基洗德有去kā伊迎接koh kā伊祝福。
7:2 亞伯拉罕有kā一切所得tio̍h ê十分之一hō͘伊。(麥基洗德chitê名ê意思是「正義ê王」，伊koh是Sâ-liám王，chitê名mā有「平安王」ê意思。)
7:3 無麥基洗德ê族譜thang知伊ê父母是啥物人，mā無伊出世kah死亡ê記載。伊kah上帝ê Kiáⁿ仝款，久長teh做祭司。
7:4 Lín看，chitê人有gōa-ni̍h偉大！連咱ê先祖亞伯拉罕都tio̍h kā所得tio̍h上等ê物抽十分之一獻hō͘伊。
7:5 Hiahê擔當祭司職ê利未ê kiáⁿ孫，雖然kah以色列人民lóng是亞伯拉罕ê kiáⁿ孫，平平是兄弟，iáu koh tio̍h奉命令，照律法tùi人民徵收in收入ê十分之一。
7:6 總是，麥基洗德m̄是屬利未ê世系，伊有tùi亞伯拉罕the̍h十分之一，koh kā得tio̍h上帝應允ê亞伯拉罕祝福。
7:7 序細受序大ê祝福是理所當然。
7:8 Hiahê徵收十分之一ê lóng是ē死ê人；m̄ koh，仝款有收十分之一ê麥基洗德，經典證實伊iáu活leh。
7:9 Án-ne，咱mā thang講：連kā人民徵收十分之一ê利未，mā bat通過亞伯拉罕來納十分之一。
7:10 因為麥基洗德迎接亞伯拉罕ê時，利未iáu未出世。
7:11 以色列人ê律法，是根據利未族ê祭司制度頒布。若tùi chitê制度ē tàng hō͘人得tio̍h完全，to̍h m̄免另外koh設立一个麥基洗德系統ê祭司，m̄是照亞倫系統來設立ê。
7:12 祭司制度既然有改變，律法mā tio̍h改變。
7:13 因為chiahê tāichì所指hit位，是屬tī別个支族，in m̄ bat有人tī祭壇前服事。
7:14 咱ê主明明是偤大支族ê kiáⁿ孫；關係chitê支族，摩西m̄ bat提起in有祭司ê職份。
7:15 另外一位親像麥基洗德ê祭司
Taⁿ我teh講ê tāichì koh khah明顯，因為另外一位親像麥基洗德ê祭司已經出現。
7:16 Chit位祭司m̄是根據人ê規則á是條例來設立，是照bē毀壞ê活命ê權能。
7:17 因為經典有ánne做證講：照麥基洗德ê排班順序，祢永遠做祭司。(註：詩110：4)
7:18 舊ê條例因為無力koh無路用，soah受廢除。
7:19 摩西ê律法無法度成全半項tāichì。另外一方面，koh khah好ê ǹg望已經準備好勢，hō͘咱thang通過祂來親近上帝。
7:20 Chit項tāichì mā有通過上帝ê chiùchōa來設立；利未系統祭司ê設立並無通過chiùchōa。
7:21 只有chitê耶穌受設立做祭司有經過chiùchōa。Kā祂設立ê上帝有對祂講：主既然chiùchōa，to̍h bē改變心意；祢永遠做祭司。(註：詩110：4)
7:22 to̍h是因為chitê差別，耶穌成做koh khah好ê約ê保證人。
7:23 另外koh有一个差別：利未系統做祭司ê人真chē，因為死亡ê阻擋，soah bē tàng久長做祭司。
7:24 只有耶穌m̄免kā祭司ê職交hō͘別人，因為祂永遠活leh。
7:25 所以，通過耶穌來到上帝ê面前ê人，祂不時都ē tàng kā in拯救，因為祂永遠活leh，來替in對上帝祈求。
7:26 Chit款ê大祭司tú合咱ê需要；祂是聖潔，無做pháiⁿ，無lahsap，tùi罪人中間分別出來，被高升到比天khah koân。
7:27 祂m̄免親像其他ê大祭司，tio̍h ta̍k日tāi先為tio̍h kakī ê罪獻祭，後來，chiah koh為tio̍h人民ê罪獻祭。祂獻本身做祭，一pái to̍h完成。
7:28 摩西ê律法設立無完全ê人做大祭司；m̄ koh有律法了後，上帝用chiùchōa來設立祂ê Kiáⁿ，hō͘祂永遠做完全ê大祭司。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。