腓利門書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
1:1 Chhéng-an
Góa sī Páu-lô, ūi tio̍h Ki-tok I-é-su lâi chiâⁿ-chò siû-hoān. Góa kah lán ê hiaⁿ-tī Tî-mó͘-theh siá phoe hō͘ goán só͘ thiàⁿ ê tâng-kang Hui-lé-móng,
1:2 Ap-hui-a chí-mōe kah goán ê chiàn-iú A-khip-pò͘, í-ki̍p tī lín tau teh chū-hōe ê kàu-hōe.
1:3 Goān lán ê Thiⁿ-pē Siōng-tè kah Chú I-é-su Ki-tok sù lín un-tián kah pêng-an!
1:4 Páu-lô Ūi Hui-lé-móng Kî-tó
Góa múi-pái kî-tó ê sî lóng ū siàu-liām lí, koh tiāⁿtiāⁿ kám-siā Siōng-tè,
1:5 In-ūi góa thiaⁿ tio̍h lí tùi Siōng-tè ê chú-bîn ū thiàⁿ-sim, tùi Chú I-é-su ū sìn-sim.
1:6 Góa khún-kiû Siōng-tè, thong-kòe goán kah lín hun-hióng kiōng-tông ê sìn-gióng, hō͘ lán ē-tàng koh khah chhim-chhim thé-hōe kah Ki-tok kiat-liân só͘ tit tio̍h it-chhè ê chiok-hok.
1:7 Hiaⁿ-tī, lí ê thiàⁿ-sim hō͘ góa ū chin tōa ê hoaⁿ-hí kah kó͘-lē, só͘-ū ê sìn-tô͘ mā tùi lí tit tio̍h kek-lē.
1:8 Ūi O-ne-si-mô͘ Kî-kiû
Góa sûi-jiân ē-tàng khò Ki-tok, lâi hó-táⁿ bēng-lēng lí chò eng-kai chò ê tāichì,
1:9 To̍k-to̍k in-ūi sio-thiàⁿ ê iân-kò͘, góa lêng-khó kā lí chhéng-kiû. Góa í-keng nî lāu, chitmá iáu koh ūi tio̍h Ki-tok I-é-su teh siū koaiⁿ-kaⁿ.
1:10 Góa thè O-ne-si-mô͘ ǹg lí chhéng-kiû, i sī góa tī kòa thih-liān ê sî só͘ seⁿ ê.
1:11 I í-chêng tùi lí lóng bô lō͘-ēng, taⁿ tùi lí kah góa lóng ū lō͘-ēng.
1:12 Góa chhe-phài i koh tńg-khì lí hia. I sī góa ê sim-pak.
1:13 Góa pún-lâi siūⁿ beh kā i lâu tòa góa chia, thang tī góa ūi tio̍h hok-im teh kòa thih-liān ê sî, thè lí lâi ho̍k-sāi góa.
1:14 Chóng-.sī, góa ǹg-bāng it-chhè lóng sī chhut tī lí ê kam-sim lo̍k-ì, lóng bô bián-kióng, só͘-í, nā bô lí ê tông-ì, góa chi̍t hāng mā bô beh chò.
1:15 Kiám-chhái in-ūi ánne, O-ne-si-mô͘ chiām-sî lī-khui lí, sī beh hō͘ i koh tńg-khì kah lí éng-oán chò-hóe tòa.
1:16 I bô koh-chài chò lô͘-lē, i ê sin-hūn chhiau-kòe lô͘-lē, sī lán só͘ thiàⁿ ê hiaⁿ-tī. Tùi góa lâi kóng, i khak-si̍t sī ánne, tùi lí lâi kóng koh khah sī ánne. Chit-má i m̄ nā sī lí chhù lāi ê lâng, mā sī Chú lāi ê hiaⁿ-tī.
1:17 Só͘-í, lí nā siūⁿ kóng góa sī lí ê tâng-phōaⁿ, tio̍h chhin-chhiūⁿ chiap-la̍p góa ánne kā i chiap-la̍p.
1:18 I nā ū tùi-put-khí lí ê só͘-chāi á-.sī khiàm lí siáⁿ-mi̍h, lí thang lóng sǹg góa ê siàu.
1:19 Góa Páu-lô chhin-chhiú siá tī chia, góa ē hū-chek hêng; nā-sī koan-hē góa kiù lí ê lêng-hûn, góa bô pit-iàu kā lí kóng-khí lí só͘-khiàm góa ê chè.
1:20 Só͘-í, hiaⁿ-tī, in-ūi Chú ê iân-kò͘, góa pài-thok lí tàu-kha-chhiú chi̍t ē. Lán pêⁿ-pêⁿ sī Ki-tok-tô͘, kiû lí kái-tû góa ê cheng-sîn hū-tām.
1:21 Góa chhim-sìn lí ē thiaⁿ góa ê ōe, chiū siá phoe hō͘ lí. Kî-si̍t góa chai lí ē chò pí góa só͘ kóng ê koh khah chē.
1:22 Chhiáⁿ lí mā tio̍h chún-pī só͘-chāi hō͘ góa tòa, in-ūi góa ǹg-bāng Siōng-tè ē thiaⁿ lín ê kî-tó, hō͘ góa ē-tàng khì lín hia.
1:23 Kiat-bóe ê Chhéng-an
Ūi tio̍h Ki-tok I-é-su kah góa chò-hóe teh koaiⁿ-kaⁿ ê Ê-pa-hú-lah kā lí chhéng-an.
1:24 Góa ê tâng-kang Má-khó, A-lí-su-ta̍t-khó͘, Tê-má kah Lū-ka, mā beh kā lí chhéng-an.
1:25 Goān Chú I-é-su Ki-tok ê un-tián kah lín tông-chāi! A-men!
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。