哥林多前書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
15:1 基督ê Koh活
兄弟姊妹，我beh kā lín提醒，我以前傳hō͘ lín ê福音，lín有領受，mā有óa靠這來做信仰ê基礎。
15:2 Lín若堅守我傳hō͘ lín ê福音道理，lín ê信仰koh m̄是空空，lín to̍h ē靠chitê福音來得救。
15:3 我已經kā我所領受siōng重要ê信息傳hō͘ lín，to̍h是照經典所記載，基督為tio̍h咱ê罪死，
15:4 埋葬，koh照經典所記載，第三日koh活。
15:5 祂有對彼得顯現，koh對十二個使徒顯現。
15:6 後來，祂koh一pái對五百gōa個兄弟姊妹顯現；hiahê人有ê已經死去，m̄ koh，大部分ê人iáu活leh。
15:7 後來，祂對雅各顯現，又koh一pái對所有ê使徒顯現。
15:8 最後祂mā對我chitê kahná iáu未夠月to̍h出世ê人顯現。
15:9 我是使徒中間siōng微細ê，bē堪得叫做使徒，因為我bat迫害上帝ê教會。
15:10 總是，有上帝ê恩典chiah有今á日ê我；祂賞賜hō͘我ê恩典並無枉費。M̄ koh我顛倒比其他ê使徒koh khah phah拚；這其實m̄是我ê本領，是有上帝ê恩典kah我同在。
15:11 無論是我á是其他ê使徒，阮ánne teh傳，lín mā ánne teh信。
15:12 信徒ê Koh活
阮所傳ê信息是基督tùi死人中koh活，lín中間ná ē有人講無死人koh活ê tāichì？
15:13 若無死人koh活，ánne，基督to̍h無koh活。
15:14 基督若無koh活，阮所傳ê是空虛無實，lín ê信mā是空空。
15:15 若是ánne，阮to̍h是teh為上帝做假見證，因為阮見證上帝已經hō͘基督koh活。若真正無死人koh活ê tāichì，上帝to̍h無hō͘基督koh活。
15:16 死人若無koh活，基督to̍h無koh活。
15:17 基督若無koh活，lín ê信仰to̍h無路用，lín to̍hiáu koh tī罪惡中。
15:18 Án-ne，hiahê已經死去ê基督徒mā lóng算是滅亡ā。
15:19 咱做基督徒ê ǹg望若kantaⁿ tī現世，咱to̍h是世間人中間siōng可憐ê。
15:20 總是，taⁿ上帝已經hō͘基督tùi死人中koh活，這是beh做已經死去ê人koh活ê保證。
15:21 因為死亡通過（亞當）一个人來，死人ê koh活mā是通過（耶穌）一个人來。
15:22 Tú親像人類為tio̍h亞當ê犯罪lóng tio̍h死，in mā因為基督lóng ēkoh活。
15:23 M̄ koh，ta̍k人lóng tio̍h照kakī ê順序koh活：頭一个是基督，續落來是基督再臨ê時歸屬祂ê人。
15:24 然後末日chiah到，hit時基督ē消滅全部ê執政者、掌權者kah權能者，kā統治權交hō͘天父上帝。
15:25 因為基督一定tio̍h統治，一直到上帝所有ê對敵lóng屈服tī祂ê腳下。(註：詩110：1)
15:26 最後tio̍h毀滅ê對敵to̍h是死亡。
15:27 因為經典有講：「祂hō͘萬物lóng屈服tī祂ê腳下。」真明顯，chia所講ê「萬物」並無包含hō͘萬物屈服tī基督腳下ê上帝。
15:28 到萬物屈服tī基督ê時，Kiáⁿ mā ē屈服tī hō͘萬物lóng屈服ê上帝，thang hō͘上帝完全管轄萬物。
15:29 若m̄是ánne，人kā死人洗禮beh chhòng啥？若無死人koh活ê tāichì，人ná tio̍h kā死人洗禮？
15:30 Koh再講，阮ná tio̍h時時刻刻來冒險？
15:31 兄弟姊妹，我ta̍k日teh拚命，因為咱平平是kah主基督耶穌結聯，我為tio̍h lín感覺真光榮，所以，我敢ánne講。
15:32 我tī以弗所kah hiahê ná親像野獸ê人鬥爭，若是出tī人ê動機，對我有啥物利益？死人若無koh活，to̍h ē親像人teh講：「咱明á載to̍h beh死à，做咱lim！做咱食！」(註：賽22：13)
15:33 M̄-thang hō͘人迷惑去。Lām-sám交陪朋友ē敗壞品德。
15:34 Tio̍h覺醒，想hō͘清楚，m̄ thang koh犯罪，因為iáu有人m̄ bat上帝。我ánne講是beh hō͘ lín知thang見笑。
15:35 肉體ê Koh活
Kiám-chhái有人ē問：「死人án怎koh活？Inē有啥物款ê身軀？」
15:36 戇人，lín掖落去ê種籽若無死去，kám ē活起來？
15:37 Koh再講，lín所掖ê無論是麥á，á是別種ê五穀，只不過是一粒種籽，m̄是後來，成長ê形體。
15:38 上帝照祂ê旨意hō͘種籽有形體；ta̍k款種籽有它kakī ê形體。
15:39 Ta̍k款ê肉體mā lóng無仝款；人類ê肉體一款，獸類ê肉體一款，鳥類ê肉體一款，魚類ê肉體koh一款。
15:40 有天頂ê體，mā有地chiūⁿê體；總是，天體ê光kah地chiūⁿê體ê光無仝款。
15:41 日頭有日頭ê光，月有月ê光，星有星ê光，甚至每粒星ê光都lóng無仝款。
15:42 死人koh活mā是ánne。埋葬落土ê肉體ē朽爛，koh活了後to̍h成做bē朽爛。
15:43 掖落去ê是卑賤ê，koh活ê是榮光ê；埋落去ê是軟chiáⁿ ê，koh活ê是勇壯ê；
15:44 埋落去ê是血氣ê肉體，koh活ê是屬靈ê體。既然有血氣ê肉體，mā有屬靈ê體，
15:45 所以，有記載：頭一个人亞當成做有血氣ê人；(註：創2：7) 路尾ê亞當成做賞賜活命ê神。
15:46 Tāi先有ê m̄是屬靈ê體，是血氣ê肉體，然後chiah有屬靈ê體。
15:47 頭一个人是tùi地chiūⁿ出，是土造ê；第二个人是tùi天頂來ê。
15:48 所有地chiūⁿê人，lóng kah hitê頭一个用土造ê人仝款；所有屬天ê人，mā kah路尾來ê hit位屬天ê仝款。
15:49 Tú親像咱有hitê頭一个用土造ê人ê形像，咱mā ē有路尾來ê hit位屬天ê ê形像。
15:50 兄弟姊妹，我kā lín講，血氣ê肉體bē tàng承受上帝國度。to̍h是講，ē朽爛ê bē tàng承受bē朽爛ê。
15:51 Taⁿ我kā lín講一个奧妙ê tāichì：咱m̄是lóngē死。
15:52 末日ê哨角一下tân，一時á久，目瞬一下，咱mā lóng ē改變。最後ê哨角tân ê時，死人to̍h ēkoh活，變做bē朽爛ê；咱lóng ē改變。
15:53 因為chitêē朽爛ê的確to̍h變做bē朽爛ê，chitê ē死ê to̍h變做bē死ê。
15:54 當chitêē朽爛ê變做bē朽爛ê，ē死ê變做bē死ê ê時，經典所記載ê「死亡ē hō͘得勝吞食落去」(註：賽25：8) chit句to̍h ē應驗。
15:55 死亡，你ê勝利tī tó位？死亡，你ê毒刺tī tó位？(註：何13：14)
15:56 死亡ê毒刺是罪，罪ê權勢是律法。
15:57 感謝上帝！祂通過咱ê主耶穌基督hō͘咱得勝。
15:58 所以，親愛ê兄弟姊妹，lín tio̍h khiā hō͘在，m̄ thang搖動。Tio̍h tiāⁿ-tiāⁿ 盡力為主做工，因為lín知為主辛苦做工一定bē空空。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。