利未記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
6:1 Siōng-chú hoan-hù Mô͘-se kóng,
6:2 " Nā ū lâng hoān chōe pōe-ge̍k Siōng-chú, tùi i ê chhù-piⁿ kiâⁿ kúi-chà, á-.sī só͘ kau-tài i mi̍h-kiāⁿ, á-.sī kau-koan bé-bē, á-.sī chhiúⁿ lâng ê châi-bu̍t,
6:3 á-.sī khi-ap chhù-piⁿ, á-.sī khioh tio̍h sit-lo̍h ê mi̍h, kiâⁿ kúi-chà, pe̍h-chha̍t lâi chiùchōa, i tī lâng só͘ kiâⁿ it-chhè ê tāichì ê tiong-kan, hoān tio̍h chi̍t hāng lâi sǹg-chò ū chōe;
6:4 i nā hoān tio̍h tì-sú ū kòe-sit, chiū tio̍h hêng só͘ chhiúⁿ ê, á-.sī in-ūi khi-ap só͘ tit tio̍h ê, á-.sī só͘ kau-tài i ê mi̍h, á-.sī lâng sit-lo̍h hō͘ i khioh tio̍h ê mi̍h,
6:5 á-.sī i in-ūi siáⁿ-mi̍h pe̍h-chha̍t chiùchōa, chiū tio̍h chiàu siàu-gia̍h lâi hêng, lēng-gōa ke gō͘-hūn chi-it; tī chhâ-chhut i ū kòe-sit ê ji̍t, tio̍h hêng pún-lâi ê chú-lâng.
6:6 Mā tio̍h chiàu lí só͘ kó͘ ê, ēng i pó͘ kòe-si̍t ê chè, to̍h-sī iûⁿ-kûn tiong chi̍t chiah bô khoat-tiám ê mî-iûⁿ-káng, khan kàu Siōng-chú ê bīn-chêng, kau hō͘ chè-si chò pó͘ kòe-si̍t ê chè.
6:7 Chè-si tio̍h tī Siōng-chú ê bīn-chêng, thè i sio̍k-chōe, i bô-lūn chò siáⁿ-mi̍h sū hō͘ i ū chōe, lóng ē tit tio̍h sià-bián. "
6:8 Sio-hòa-chè ê Kui-tēng
Siōng-chú hoan-hù Mô͘-se kóng,
6:9 " Lí tio̍h bēng-lēng A-lông kah i ê kiáⁿ-sun kóng, sio-chè ê lē sī ánne: Sio-chè tio̍h hē tī tôaⁿ ê chhâ téng, chi̍t mê kàu thiⁿ-kng, tôaⁿ téng ê hóe tio̍h tiāⁿtiāⁿ to̍h.
6:10 Chè-si tio̍h chhēng iù-tē pò͘ ê saⁿ-khò͘, ē-sin mā tio̍h chhēng iù-tē pò͘ ê khò͘, kā tôaⁿ téng ê hóe só͘ sio chò sio-chè ê hu siu khí-.lâi, piàⁿ tī tôaⁿ piⁿ.
6:11 Jiân-āu tio̍h thǹg-khì chit niá saⁿ-khò͘, chhēng pa̍t chióng ê saⁿ-khò͘, kā hóe-hu tòa-chhut iâⁿ gōa, kàu chheng-khì ê só͘-chāi.
6:12 Tôaⁿ téng ê hóe tio̍h tī téng-bīn tiāⁿtiāⁿ to̍h, m̄ thang hoa. Chè-si tio̍h ta̍k chá-khí tī hit téng-bīn sio chhâ, koh kā sio-chè pâi tī tôaⁿ téng, tī hit téng-bīn sio siā-un-chè ê iû.
6:13 Tī tôaⁿ téng ê hóe tio̍h tiāⁿtiāⁿ to̍h, m̄ thang hoa. "
6:14 Sò͘-chè ê Kui-tēng
" Sò͘-chè ê lē sī ánne: A-lông ê kiáⁿ-sun tio̍h tī tôaⁿ chêng, kā che hiàn tī Siōng-chú ê bīn-chêng.
6:15 I tio̍h tùi hit tiong-kan the̍h-chhut sò͘-chè ê mī-hún chi̍t pé, kah iû, kah sò͘-chè tiong só͘-ū ê jú-hiuⁿ, tī tôaⁿ téng sio lâi chò kì-liām, hiàn hō͘ Siōng-chú chò phang-bī.
6:16 A-lông kah i ê kiáⁿ-sun tio̍h chia̍h só͘ chhun lo̍h-.lâi ê, tio̍h tī sèng ê só͘-chāi, m̄ thang chham kàⁿ lâi chia̍h, tio̍h tī hōe-bō͘ ê īⁿ lāi chia̍h.
6:17 M̄-thang chham kàⁿ lâi kā i piak, che sī Góa tùi Góa ê hóe-chè tiong, siúⁿ-sù hō͘ in ê hūn-gia̍h, sī chì-sèng ê, kah sio̍k-chōe-chè í-ki̍p pó͘ kòe-si̍t ê chè sio-siâng.
6:18 Kiàn-nā A-lông kiáⁿ-sun tiong chapo͘-.ê, lóng tio̍h chia̍h chiahê mi̍h, tùi Siōng-chú ê hóe-chè tiong chò éng-oán ê hūn-gia̍h, it-ti̍t kàu lín ê bān-sè-tāi. Bong chiahê chè-mi̍h ê lâng lóng ē chiâⁿ-chò sèng. "
6:19 Siōng-chú hoan-hù Mô͘-se kóng,
6:20 " A-lông kah i ê kiáⁿ-sun tī i siū boah-iû ê ji̍t, só͘ tio̍h hiàn hō͘ Siōng-chú ê lé-mi̍h, to̍h-sī iù ê mī-hún cha̍p-hūn chi-it e-hoat, chò tiāⁿtiāⁿ hiàn ê sò͘-chè, chá-khí sî chi̍t-pòaⁿ, ê-hng sî chi̍t-pòaⁿ.
6:21 Tio̍h tī chian-pôaⁿ ēng iû lâi chò, tiâu-hô liáu-āu, lí chiū tio̍h the̍h ji̍p-.lâi; piak hó chi̍t tè chi̍t tè, chò sò͘-chè, hiàn hō͘ Siōng-chú chò phang-bī.
6:22 I ê kiáⁿ-sun tiong sòa-chiap i siū boah iû chò chè-si, tio̍h ánne hiàn, tio̍h choân-pō͘ sio hō͘ Siōng-chú, che sī éng-oán ê lē.
6:23 Chè-si ê sò͘-chè tio̍h choân-pō͘ sio, m̄ thang the̍h-lâi chia̍h. "
6:24 Sio̍k-chōe-chè ê Kui-tēng
Siōng-chú hoan-hù Mô͘-se kóng,
6:25 " Lí tio̍h hoan-hù A-lông kah i ê kiáⁿ-sun kóng, sio̍k-chōe-chè ê lē to̍h-sī ánne: Tio̍h tī Siōng-chú ê bīn-chêng thâi sio-chè ê chengseⁿ ê só͘-chāi, lâi thâi sio̍k-chōe-chè ê chengseⁿ, che sī chì-sèng ê mi̍h.
6:26 Ūi sio̍k-chōe hiàn chit-ê chè ê chè-si tio̍h chia̍h chit-ê chè-mi̍h, tio̍h tī sèng ê só͘-chāi, to̍h-sī tī hōe-bō͘ ê īⁿ lāi chia̍h.
6:27 Kiàn-nā bong i ê bah ê lâng ē chiâⁿ-chò sèng, i ê hoeh nā hiù tī siáⁿ-mi̍h saⁿ-khò͘ ê téng-bīn, só͘ hiù tio̍h hit niá, lí tio̍h tī sèng ê só͘-chāi sé.
6:28 Nā tī hûi ê khì-kū chú, tio̍h kā i kòng-phòa; nā tī tâng ê khì-kū chú, chit-ê khì-kū tio̍h kòe-bôa chiah ēng chúi sé.
6:29 Kiàn-nā chè-si tiong ê chapo͘ teng, lóng tio̍h chia̍h chiahê, che sī chì-sèng ê mi̍h.
6:30 Kiàn-nā sio̍k-chōe-chè, i ê hoeh nā tòa-ji̍p hōe-bō͘ tī sèng-só͘ sio̍k-chōe, lóng m̄ thang the̍h-lâi chia̍h, tio̍h ēng hóe sio-tiāu.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。