哥林多前書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
10:1 警戒拜偶像
兄弟姊妹，我ài lín ē記得咱ê祖先lóng跟tòe摩西，tī雲ê保護之下過紅海。
10:2 In tī雲中kah海裡，領受洗禮歸tī摩西。
10:3 In lóng食仝款屬靈ê食物，lóng lim仝款屬靈ê泉水。
10:4 Chitê泉水是tùi kah in同行ê hit塊石磐流出；hit塊石磐to̍h是基督。
10:5 M̄ koh，in中間真chē人hō͘上帝無歡喜，所以lóng受毀滅，身屍倒kah kui曠野。
10:6 Taⁿ chiahê tāichì hō͘咱做鑑戒，警戒咱m̄ thang親像in ánne ài做pháiⁿ tāichì。
10:7 Lín m̄ thang親像in中間一kóa人去拜偶像。照記載：眾人坐落去to̍h大lim大食，khiā起來to̍h顛狂跳舞。(註：出32：6)
10:8 咱mā m̄ thang親像in中間有一kóa人犯姦淫，soah一日死二萬三千人。
10:9 咱mā m̄ thang親像in中間一kóa人試探主，soah hō͘蛇咬死。
10:10 Lín mā m̄ thang親像in中間一kóa人nga̍uh-nga̍uh念，soah hō͘執行毀滅ê天使kā in剿滅。
10:11 In所tú ·tio̍h ê chiahê tāichì thang做人ê鑑戒，koh有記載落來，thang警戒咱chiahê活tī末世ê人。
10:12 所以，kakī 想講khiā在ê人tio̍h謹慎，chiah bē跋倒。
10:13 Lín所tú ·tio̍h ê試探，lóng是人tiāⁿ-tiāⁿ 會tú ·tio̍h ê。上帝是信實，祂bē hō͘ lín tú tio̍h擔當bē起ê試煉；lín tī受試煉ê時，祂ē kā lín開一條路，hō͘ lín忍受ē tiâu。
10:14 避免拜偶像來榮光上帝
所以，親愛ê兄弟姊妹，tio̍h閃避拜偶像ê tāichì。
10:15 我kā lín當做bat情理ê人teh kā lín講。我所講ê話，lín tio̍h kakī 判斷。
10:16 咱teh lim hitê祝謝ê杯，kám m̄是teh分享基督ê血？咱teh食hitê peh開ê餅，kám m̄是teh分享基督ê身軀？
10:17 因為餅kantaⁿ一塊，咱雖然真chē人，iáu koh是一體，因為咱做伙食仝一塊餅。
10:18 用照肉體ê以色列人做例，hiahê食祭物ê人kám m̄是kah祭壇有關係？
10:19 Án-ne，我是teh講啥物？Kám是teh講偶像kah祭物有啥物要緊？
10:20 M̄是，我是teh講外邦人所祭ê是teh祭鬼，m̄是teh祭上帝；我無ài lín kah鬼交chhap。
10:21 Lín bē tàng lim主ê杯mā lim鬼ê杯；bē tàng參加主ê宴席koh參加鬼ê宴席。
10:22 咱是beh激主受氣，是無？咱kám ē比主khah強？
10:23 有人講：「Ta̍k項tāichì lóng thang做」，總是，m̄是ta̍k項lóng有利益。雖然講ta̍k項tāichì lóng thang做，總是，無lóng對人有幫贊。
10:24 M̄-thang求kakī ê利益，tio̍h求別人ê利益。
10:25 市場teh賣ê物lóng thang食，m̄免為tio̍h良心ê緣故問東問西。
10:26 因為經典有講：地kah地chiūⁿê萬物lóng是主ê。(註：詩24：1)
10:27 若有未信者請lín食飯，lín若去，排tī lín面前ê物lóng thang食。m̄免為tio̍h良心ê緣故來問東問西。
10:28 若有人kā lín講：「Chiahê食物有祭過偶像。」Án-ne，為tio̍h hitê kā lín講ê人kah良心ê緣故，lín to̍hm̄ thang食。
10:29 我所講ê是指hitê人ê良心，m̄是lín ê良心。Lín無定tio̍h ē問講：「我ê自由是án怎tio̍h hō͘別人ê良心來支配？
10:30 我若用感恩ê心來食hitê祭過偶像ê物，ná tio̍h hō͘人指責？」
10:31 所以，lín無論是食是lim á是做啥物，lóng應該為tio̍h榮光上帝來做。
10:32 無論是對偤太人、希臘人á是上帝ê教會，lín lóng m̄ thang成做in ê阻礙。
10:33 Lín tio̍h照我ê模樣去做。為tio̍h beh hō͘眾人歡喜，我m̄ bat求kakī ê利益，lóng是求眾人ê利益，thang hō͘ in得救。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。