哥林多前書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
7:1 Kiat-hun á-.sī To̍k-sin
Koan-hē lín tī phoe lāi-bīn thê-khí ê būn-tê, lâng bô kiat-hun khah hó.
7:2 Chóng-.sī, in-ūi lín ū chi̍t-kóa îm-loān ê tāichì, só͘-í, ta̍k-ê chapo͘ lâng tio̍h ū kakī ê bó͘, ta̍k-ê chabó͘ lâng mā tio̍h ū kakī ê ang.
7:3 Cha-po͘ lâng tùi bó͘ tio̍h chīn chò ang ê gī-bū; chabó͘ lâng tùi ang mā tio̍h chīn chò bó͘ ê gī-bū.
7:4 Bó͘ tùi kakī ê seng-khu bô chú-koân, i ê chú-koân chāi tī in ang; siâng-khoán, ang tùi kakī ê seng-khu mā bô chú-koân, i ê chú-koân chāi tī in bó͘.
7:5 M̄-thang hut-lio̍k tùi-hong ê su-iàu, nā-sī ūi tio̍h beh choan-sim kî-tó, hō͘-siong tông-ì chiū thang chiām-sî hun-khui; āu-lâi iû-goân tio̍h chò-hóe tòa, chiah bián-tit in-ūi bē tàng khòng-chè kakī ê chêng-io̍k, tì-sú siū Sa-tán ê iú-he̍k.
7:6 Góa kóng ang-bó͘ thang chiām-sî hun-khui, sī ín-chún, m̄-sī bēng-lēng.
7:7 Góa ài ta̍k lâng lóng chhin-chhiūⁿ góa bô kiat-hun; chóng-.sī, ta̍k lâng tùi Siōng-tè niá-siū ê un-sù bô kāng-khoán, ū ê chit khoán, ū ê hit khoán.
7:8 Tùi hiahê bī-hun-chiá kah kóaⁿ-hū, góa khǹg in nā ē-tàng chhin-chhiūⁿ góa siú to̍k-sin sī hó.
7:9 Nā bē tàng khòng-chè kakī, chiū tio̍h kiat-hun; lêng-khó kiat-hun, pí hō͘ io̍k-hóe sio khah hó.
7:10 Í-keng kiat-hun ê lâng, góa bēng-lēng lín; kî-si̍t m̄-sī góa, sī Chú ê bēng-lēng, Cha-bó͘ lâng m̄ thang lī-khui in ang.
7:11 Nā lī-khui, chiū tio̍h siú to̍k-sin, nā bô, tio̍h koh kah in ang hô-hó; chapo͘ lâng mā m̄ thang pàng-sak in bó͘.
7:12 Tùi kî-tha ê lâng góa kóng （ m̄-sī Chú kóng ê）, nā lâm-sìn-tô͘ chhōa bô sìn Chú ê lâng chò bó͘, in bó͘ hoaⁿ-hí chò-hóe tòa, chiū m̄ thang kā i pàng-sak.
7:13 Nā lú sìn-tô͘ kah bô sìn Chú ê lâng kiat-hun, ang hoaⁿ-hí kah i chò-hóe tòa, mā m̄ thang kā in ang pàng-sak.
7:14 Bô sìn Chú ê chapo͘ lâng in-ūi chhōa sìn Chú ê lâng chò bó͘, ē tit tio̍h Siōng-tè ê chiap-la̍p. Kāng-khoán ánne, bô sìn Chú ê chabó͘ lâng in-ūi kè sìn Chú ê ang, ē tit tio̍h Siōng-tè ê chiap-la̍p. Nā m̄-sī ánne, lín ê kiáⁿ-jî chiū bô sio̍k Siōng-tè, kî-si̍t in sī kui-sio̍k Siōng-tè ê.
7:15 Bô sìn Chú ê lâng nā beh lī-khui, chiū chhut-chāi i lī-khui. Tī chit khoán ê chêng-hêng, sìn Chú ê ang á-.sī bó͘ chiū bô siū hun-in ê iok-sok; Siōng-tè ho͘-tiàu lán, sī ài lán pêng-an kòe ji̍t-chí.
7:16 Lín tio̍h chai, sìn Chú ê chabó͘ lâng kiámchhái ē kiù kakī ê ang; lín mā tio̍h chai, sìn Chú ê chapo͘ lâng kiámchhái mā ē kiù kakī ê bó͘.
7:17 Tio̍h Pó-chhî Siū-tiàu Hit sî ê Sin-hūn
Ta̍k lâng tio̍h chiàu Chú siúⁿ-sù ê un-sù, chiàu Siōng-tè kéng-tiàu ta̍k lâng ê bo̍k-tek lâi seng-oa̍h. Che sī góa kàu-tō kok kàu-hōe ê chún-chek.
7:18 Siū kat-lé liáu-āu chiah chiap-siū ho͘-tiàu ê lâng, m̄-bián am-khàm kat-lé ê kì-hō; siū ho͘-tiàu ê sî iáu-bōe siū kat-lé ê lâng, mā m̄-bián khì siū kat-lé.
7:19 In-ūi ū siū á-.sī bô siū kat-lé lóng bô iàu-kín, siōng iàu-kín ê sī chun-siú Siōng-tè ê kài-bēng.
7:20 Ta̍k lâng tio̍h pó-chhî siū-tiàu hit sî ê sin-hūn.
7:21 Lí sī chò lô͘-lē ê sî lâi siū-tiàu, sī-.bô? M̄-bián khòa-ì; chóng-.sī, nā ū 機 ē tit tio̍h chū-iû, tio̍h pá-ak ki-hōe.
7:22 In-ūi siū Chú kéng-tiàu ê lô͘-lē sī hō͘ Chú tháu-pàng ê chū-iû lâng; siâng-khoán, siū Chú kéng-tiàu ê chū-iû lâng sī Ki-tok ê lô͘-po̍k.
7:23 Lín sī Siōng-tè ēng tāi-kè bé-.lâi ê, m̄ thang chiâⁿ-chò lâng ê lô͘-lē.
7:24 Hiaⁿ-tī chí-mōe, ta̍k lâng tio̍h tī Siōng-tè ê bīn-chêng, pó-chhî lín goân-lâi ê sin-hūn.
7:25 To̍k-sin kah Kóaⁿ-hū ê Būn-tê
Koan-hē to̍k-sin ê būn-tê, góa bô siū Chú ê bēng-lēng, chóng-.sī, góa í-keng tit tio̍h Chú ê liân-bín, lâi chiâⁿ-chò chīn-tiong ê lô͘-po̍k, góa chiū thê-chhut kakī ê ì-kiàn.
7:26 Khó-lū bo̍k-chêng kan-lân ê chhù-kéng, góa siūⁿ lâng iáu-sī pó-chhî hiān-chōng khah hó.
7:27 Nā í-keng chhōa bó͘ ê, chiū m̄ thang siūⁿ beh chū-iû; nā iáu-bōe chhōa bó͘ ê, chiū m̄ thang siūⁿ beh chhōa.
7:28 Chóng-.sī, lí nā chhōa, m̄-sī hoān chōe; chāi-sek-lí nā kè, mā m̄-sī hoān chōe. Chóng-.sī, kiat-hun ê lâng ē tú tio̍h seng-oa̍h-siōng ê thoa-lūi; góa sī teh ūi lín siat-sióng.
7:29 Hiaⁿ-tī chí-mōe, góa kā lín kóng, sî-ji̍t teh beh kàu à, só͘-í, tùi taⁿ í-āu, ū bó͘ ê tio̍h chhin-chhiūⁿ bô bó͘;
7:30 Teh thî-khàu ê chhin-chhiūⁿ bô teh thî-khàu; hoaⁿ-hí ê chhin-chhiūⁿ bô teh hoaⁿ-hí; bé mi̍h-kiāⁿ ê chhin-chhiūⁿ bô tit tio̍h siáⁿ-mi̍h;
7:31 Teh ēng sè-kan ê mi̍h ê chhin-chhiūⁿ bô ēng kah chīn-pōng, in-ūi chit sè-kan ê hiān-chōng teh beh kòe-khì à.
7:32 Góa ài lín lóng bô-hoân bô-ló. Bô chhōa bó͘ ê lâng koan-sim Chú ê tāichì, bo̍k-tek sī beh hō͘ Chú hoaⁿ-hí.
7:33 M̄ koh, ū bó͘ ê lâng chhau-hoân sè-kan ê tāichì, bo̍k-tek sī beh hō͘ bó͘ hoaⁿ-hí, soah tì-kàu hun-sim.
7:34 Bô-kè-ê chabó͘ lâng kah siàu-lí koan-sim Chú ê tāichì, sī beh hō͘ i ê seng-khu kah sim-sîn lóng sèng-kiat. M̄ koh, kè-ang ê chabó͘ lâng chhau-hoân sè-kan ê tāichì, bo̍k-tek sī beh hō͘ in ang hoaⁿ-hí.
7:35 Góa ánne tùi lín kóng sī ūi tio̍h lín ê lī-ek, m̄-sī beh kā lín sok-pa̍k. Góa sī ài lín chò ha̍p-gî ê tāichì, thang choan-sim ho̍k-sāi Chú, bô siū sè-kan-sū ê kiáu-jiáu.
7:36 M̄ koh, nā ū lâng siūⁿ kóng kakī tùi-thāi bōe chhut-kè ê chabó͘ kiáⁿ bô eng-kai, chabó͘ kiáⁿ nā í-keng chhiau-kòe kiat-hun ê nî-lêng, eng-kai tio̍h chiàu i ê ì-sù hō͘ i kiat-hun. I ánne chò m̄-sī hoān chōe.
7:37 I nā bô put-tek-í ê tāichì, sī chhut tī kakī ê koat-sim, koh ē-tàng khòng-chè kakī ê ì-chì, koat-tēng bô beh hō͘ chabó͘ kiáⁿ kiat-hun, ánne chò sī hó.
7:38 Chóng-kóng chi̍t kù, hō͘ kakī ê chabó͘ kiáⁿ kiat-hun sī hó, bô hō͘ i chhut-kè koh khah hó.
7:39 Tiōng-hu iáu oa̍h-.leh ê sî, hit-ê chabó͘ lâng tio̍h siū sok-pa̍k; tiōng-hu nā sí-.khì, i thang chū-iû kè i só͘ ì-ài ê lâng, to̍k-to̍k tio̍h kè hō͘ sìn Chú ê lâng chiah thang.
7:40 I nā bô koh kè sī koh khah ū hok-khì. Che sī góa ê siūⁿ-hoat; chóng-.sī, góa siūⁿ góa mā ū siū Siōng-tè ê Sèng Sîn khé-sī.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。