哥林多前書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
1:1 請安kah感謝
我是保羅，奉上帝ê旨意受召，做耶穌基督ê使徒。我kah兄弟Só͘-su-siánneh，
1:2 寫phoe hō͘ tī哥林多上帝ê教會，to̍h是hiahê tī基督耶穌內成聖，受召成做信徒，以及tī ta̍k所在teh求叫咱ê主耶穌基督ê名ê人。基督是in ê主，mā是咱ê主。
1:3 願lín tùi咱ê天父上帝kah主耶穌基督，得tio̍h恩典kah平安。
1:4 Tī基督裡ê祝福
我tiāⁿ-tiāⁿ 替lín感謝我ê上帝，因為上帝ê恩典有通過耶穌基督賞賜hō͘ lín。
1:5 通過基督，lín ta̍k項得tio̍h富足，充滿ta̍k款ê口才kah智識。
1:6 基督ê信息已經tī lín中間建立堅固ê基礎，
1:7 hō͘ lín teh thèng候咱ê主耶穌基督ê顯現ê時，lóng無欠啥物恩賜。
1:8 祂mā ē hō͘ lín堅固，一直到咱ê主耶穌基督再臨ê日子，lóng無thang hō͘人嫌。
1:9 上帝是信實ê，祂呼召lín來kah祂ê Kiáⁿ，咱ê主耶穌基督結聯。
1:10 教會ê紛爭
兄弟姊妹，taⁿ我奉咱ê主耶穌基督ê名勸lín，講話tio̍h一致，m̄ thang有紛爭，tio̍h一心一意抱仝款ê目標來團結。
1:11 親愛ê兄弟姊妹，Khu-ló-eh厝內ê人bat kā我講，lín中間有紛爭。
1:12 我ê意思是講lín ta̍k人有無仝款ê講法；有ê講：「我屬保羅」；有ê講：「我屬亞波羅」；有ê講：「我屬彼得」，koh有ê講：「我屬基督。」
1:13 基督kám有hō͘人分開？保羅kám有替lín釘十字架？Lín kám有奉保羅ê名領受洗禮？
1:14 感謝上帝，Ku-lí-su-pò͘ kah該猶以外，我m̄ bat kā lín中間任何人洗禮，
1:15 所以，無人ē tàng講，lín有奉我ê名領受洗禮。
1:16 Tio̍h lah，我mā有kā Su-tê-hoa-nah一家人洗禮，其他有kā別人洗禮á無，我卻bē記得à。
1:17 基督無差派我來kā人洗禮，是beh來傳福音。我無用智慧ê言詞傳，chiah免hō͘基督ê十字架失去意義。
1:18 人ê智慧kah十字架
十字架ê道理，hiahê沉淪ê人kā它看做是愚戇ê；咱chiahê得救ê人，kā它看做是上帝ê大能。
1:19 因為經典有記載：我beh消滅智慧ê人ê智慧， Mā beh棄sak聰明ê人ê聰明。(註：賽29：14)
1:20 Án-ne，智慧ê人tī tó位？經學教師tī tó位？Chit世間好辯論ê人tī tó位？上帝kám m̄是已經hō͘世間ê智慧變做愚戇？
1:21 既然世間人bē tàng用in ê智慧來認bat上帝，上帝to̍h用祂kakī ê智慧，歡喜用阮所傳ê愚戇ê信息，來拯救hiahê信ê人。
1:22 偤太人求神跡，希臘人chhōe智慧；
1:23 m̄ koh，阮是teh宣揚釘十字架ê基督。Chitê信息對偤太人來講是阻礙，對外邦人來講是愚戇；
1:24 m̄ koh，對上帝揀召ê人來講，無論是偤太人á是希臘人，基督to̍h是上帝ê權能，是上帝ê智慧。
1:25 因為上帝ê愚戇比人khah有智慧，上帝ê軟弱比人khah勇壯。
1:26 兄弟姊妹，tio̍h ē記得lín受召ê時，照世間一般ê標準，lín無幾個人有智慧，無幾個人有能力，無幾個人屬上流階級。
1:27 M̄ koh，上帝用世間人看做戇ê，來hō͘智慧ê人見笑，mā用世間人看做軟弱ê，來hō͘勇壯ê人見笑；
1:28 祂koh用世間人所輕視，所hō͘人看bē起á是無路用ê，來廢無人所看重ê。
1:29 Án-ne，世間to̍h無人ē tàng tī上帝ê面前誇口。
1:30 上帝hō͘ lín kah基督耶穌結聯，hō͘基督成做咱tùi上帝來ê智慧，koh hō͘咱kah上帝和好，成做上帝聖潔ê子民，又koh hō͘咱得tio̍h救贖。
1:31 所以，照經典所記載：Ài-beh誇口ê人，tio̍h用主來做誇口。(註：耶9：24)
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。