使徒行傳 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
25:1 保羅向羅馬皇帝上訴
非斯都上任三日，to̍h tùi該撒利亞tńg去耶路撒冷。
25:2 大祭司kah偤太人ê頭人對伊控告保羅。
25:3 In請求非斯都kā保羅送來耶路撒冷，in計謀tī路中埋伏，beh kā伊thâi死。
25:4 M̄ koh，非斯都應講：「保羅關tī該撒利亞，我liâmpiⁿ mā beh tńg去hia。
25:5 Lín中間做頭ê人thang kah我做伙落去。Hitê人若有啥物m̄ tio̍h，lín thang tī hia kā伊告。」
25:6 非斯都tòa hia chiâⁿ十工，to̍h tńg去該撒利亞。隔tńg工開庭，伊命令人去tòa保羅來。
25:7 保羅一下到位，tùi耶路撒冷落來ê偤太人圍óa來，khiā tī伊ê四箍圍，用真chē嚴重ê罪名kā伊告，m̄ koh，lóng the̍h bē出證據。
25:8 保羅為kakī 辯護講：「我對偤太人ê律法kah聖殿，á是對羅馬皇帝，lóng m̄ bat犯tio̍h啥物罪。」
25:9 非斯都為tio̍h beh hō͘偤太人歡喜，應保羅講：「你願意上耶路撒冷，tī hia為tio̍h chiahê告訴，來接受我ê審判無？」
25:10 保羅講：「我chitmá khiā tī羅馬皇帝ê法庭，當然tio̍h tī chia受審判。你明明知影我對偤太人並無做啥物m̄ tio̍h ê tāichì。
25:11 我若有做m̄ tio̍h á是犯tio̍h該死ê罪，我絕對bē逃避，m̄ koh，in對我ê控告lóng無一項是事實，無人ē tàng kā我交hō͘ in。我beh對羅馬皇帝上訴。」
25:12 非斯都kah議會做伙參詳了後，to̍h應講：「你既然已經對羅馬皇帝上訴，to̍h tio̍h去皇帝hia。」
25:13 保羅Hông押到亞基帕王kah百尼基面前
過幾nā日後，亞基帕王kah百尼基來到該撒利亞，kā非斯都請安。
25:14 In tī hia tòa幾nā日了後，非斯都kā保羅ê tāichì對亞基帕王報告，講：「Tī chia有一个腓力斯留tī監裡ê人。
25:15 我去耶路撒冷ê時，hiahê祭司長kah偤太人ê長老有kā伊控告，要求我kā伊定罪。
25:16 我kā in講：『照羅馬ê慣例，被告iáu未kah原告對指，iáu未有機ē為kakī 辯護以前，bē tàng kā伊定罪。』
25:17 所以，in lóng聚集到位，我隨時tī隔tńg工開庭，命令押hitê人來。
25:18 原告lóng khiā起來控告，所告ê m̄是我所想ê hiah pháiⁿ。
25:19 原告kah伊爭論ê只不過是in kakī ê宗教問題，以及一个叫做耶穌ê人ê tāichì；祂已經死，保羅講祂iáu活leh。
25:20 Chiahê tāichì我m̄知tio̍h án怎查問，所以，我問保羅kám願意去耶路撒冷，tī hia受審問。
25:21 M̄ koh保羅已經向皇帝上訴，ài我kā伊留tī chia thèng候皇帝裁決，所以，我命令kā伊扣留到交hō͘皇帝。」
25:22 亞基帕kā非斯都講：「我kakī mā ài聽chitê人講話。」非斯都講：「明á載你ē tàng聽伊講。」
25:23 隔tńg工，亞基帕kah百尼基威風凜凜，帶領營長kah城內尊貴ê人入來公會堂。非斯都下令，保羅to̍h hō͘人押出來。
25:24 非斯都講：「亞基帕王kah在座ê各位，lín看chitê人，伊to̍h是tī耶路撒冷kah tī chia所有ê偤太人對我請求，大聲hoah講tio̍h hō͘伊死ê hitê人。
25:25 M̄ koh，我查無伊有犯tio̍h啥物該死ê罪。伊既然已經對皇帝上訴，我裁決kā伊送去羅馬。
25:26 關係chitê人，我無確實ê案情thang奏皇帝，所以，我chhōa伊出來tī lín ê面前，koh khah要緊ê是tī亞基帕王你ê面前，若查明了後，chiah有案情thang奏。
25:27 因為照我看，押送犯人，若無指明伊ê案情，是無合理。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。