使徒行傳 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
23:1 保羅注目看議會ê人，講：「各位兄弟，我平時tī上帝ê面前完全照清白ê良心teh行踏，一直到今á日。」
23:2 大祭司亞拿尼亞命令身邊teh khiā ê人siàn伊ê嘴phóe。
23:3 保羅to̍h對伊講：「你chitê漆kah白siaksiak ê牆，上帝ē kā你phah。你開庭tio̍h照律法來kā我審判，你竟然違背律法，命令人kā我phah！」
23:4 Khiā tī保羅身邊ê人講：「你敢罵上帝ê大祭司？」
23:5 保羅講：「各位兄弟，我m̄ bat伊是大祭司，因為經典有記載：M̄-thang罵治理人民ê長官。」(註：出22：28)
23:6 M̄ koh，保羅知影in一pêng是撒都該派ê人，一pêng是法利賽派ê人，to̍h tī議會中大聲hoah：「各位兄弟，我是法利賽派ê人，mā是法利賽派ê人ê kiáⁿ。我tī chia受審判，to̍h是因為我ǹg望死人ēkoh活！」
23:7 保羅ánne講soah，法利賽派ê人kah撒都該派ê人to̍h起爭論，議會mā分裂。
23:8 因為撒都該派ê人講人死了無koh活，mā無天使，mā無靈魂；法利賽派ê人主張chit三項lóng有。
23:9 喧嚷ê聲ná來ná大，有幾nā个法利賽派hit-pêng ê經學教師起來爭辯講：「阮看chitê人lóng無做pháiⁿ，kám講真正有聖神á是天使對伊講話？」
23:10 爭論ná來ná劇烈，營長驚保羅去hō͘ in拆碎，to̍h命令兵á落去，tùi in中間kā保羅搶出來，kā伊chhōa入去營房。
23:11 Hit暝，主khiā tī保羅ê身邊，講：「Tio̍h勇敢！你bat tī耶路撒冷為我做見證，mā一定tio̍h tī羅馬為我做見證。」
23:12 害死保羅ê計謀
隔tńg早起，偤太人結黨chiùchōa講：「若無thâi死保羅，m̄食m̄-lim。」
23:13 做伙ánne計謀ê人有四十個以上。
23:14 In去見祭司長kah長老，講：「阮已經chiù重chōa，若無thâi死保羅，半項物都m̄食。
23:15 Taⁿ lín kah議ē tio̍h kā營長要求，請伊chhōa保羅來lín ê面前，假做lín beh koh詳細查問伊ê案情。阮已經準備好à，tī伊來到chia ê時，to̍h beh kā伊thâi死。」
23:16 保羅ê外甥聽tio̍h chitê陰謀，to̍h入去營內kā保羅講。
23:17 保羅叫一个連長來，講：「請chhōa chitê少年人去見營長，因為伊有tāichì beh報伊知。」
23:18 連長to̍h chhōa少年人去見營長，講：「Hitê受關ê保羅叫我去，求我chhōa chitê少年人來見你。伊有tāichì beh kā你報告。」
23:19 營長牽伊ê手去邊á，問講：「Beh報告我知啥物tāichì？」
23:20 伊講：「偤太人已經講好勢，假做beh koh詳細查問保羅ê案情，會求你明á載chhōa保羅去議會。
23:21 求你m̄ thang聽in ê話，因為in有四十gōa人埋伏teh等伊。In bat chiùchōa講：若無thâi死保羅，m̄-lim m̄食。Taⁿ in lóng準備好勢，teh thèng候你ê允准。」
23:22 營長叫少年人tńg去，koh吩咐伊講：「M̄-thang對人講，你有kā chiahê tāichì通知我。」
23:23 護送保羅去hō͘腓力斯總督
營長吩咐兩 个連長，講：「Eng暗九點以前，tio̍h準備步兵兩百，馬兵七十，gia̍h鎗ê兵兩百，出發去該撒利亞。
23:24 Koh準備馬hō͘保羅騎，護送伊安全去到總督腓力斯hia。」
23:25 營長to̍h寫一張phoe，phoe內ánne講：
23:26 「Ku-láu-tio Lū-si-a kā總督腓力斯大人請安。
23:27 Chitê人hō͘偤太人掠去，beh kā伊thâi死ê時，我一下知影伊是羅馬公民，to̍h chhōa兵去kā伊救。
23:28 我想beh明白in告伊ê理由，to̍h送伊去in ê議會。
23:29 我查出伊hō͘人告是為tio̍h in ê律法辯論，並無犯tio̍h該死á是tio̍h kā伊關監ê罪。
23:30 後來，有人來kā我報告，講偤太人teh計謀陷害chitê人，我隨時kā伊送去你hia，koh命令hiahê告伊ê人mā tio̍h tī你ê面前kā伊控告。」
23:31 步兵執行命令，透暝kā保羅押去交hō͘ An-tî-phà-tí。
23:32 隔tńg工，步兵tńg去營房，hō͘馬兵繼續護送保羅。
23:33 In來到該撒利亞，to̍h kā hit張phoe交hō͘總督，mā kā保羅交hō͘伊。
23:34 總督讀hit張phoe了後，問保羅是tó一省ê人，知影伊是基利家省ê人，
23:35 to̍h講：「等告你ê人到位，我ē詳細處理你ê案件。」總督to̍h吩咐kā保羅拘留tī希律ê衙門。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。