使徒行傳 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
10:1 彼得、哥尼流kah外邦人
Tī該撒利亞有一个人，名叫做哥尼流，是意大利營ê連長。
10:2 伊是敬虔ê人，kah全家lóng敬畏上帝，賑濟真chē sànchhiah ê偤太人，koh tiāⁿ-tiāⁿ 對上帝祈禱。
10:3 有一日，差不多下晡三點，伊tī異象中明明看tio̍h上帝ê天使入來，對伊講：「哥尼流。」
10:4 伊掠天使金金看，非常驚惶，講：「主ah，啥物tāichì？」天使kā伊講：「你ê祈禱，你ê賑濟，已經lóng得tio̍h上帝歡喜接納。
10:5 Taⁿ你tio̍h差人去約帕，請hitê叫做彼得ê西門來。
10:6 伊tòa tī製皮師傅西門in tau，伊ê厝tī海邊。」
10:7 kah伊講話ê天使離開了後，哥尼流to̍h叫兩 个奴僕，kah一个平常侍候伊koh是敬虔ê兵來，
10:8 kā chiahê tāichì lóng kā in吩咐，to̍h差in去約帕。
10:9 隔tńg工，差不多中晝時，chit三个人行beh到約帕ê時，彼得peh起lí厝頂祈禱。
10:10 伊腹肚真iau，想beh食物件；人tútú teh準備中晝頓ê時，彼得soah入神去。
10:11 伊看tio̍h天開，有一个親像四角頭縛teh ê大幅布降落來，墜tī土腳，
10:12 hit內面有地面ta̍k種ê走獸、蟲thōa kah空中ê飛鳥。
10:13 Koh有聲對伊講：「彼得，起來，thâi來食。」
10:14 M̄ koh，彼得講：「主ah，千萬m̄ thang，因為我m̄ bat食lahsap無清氣ê物。」
10:15 Hitê聲第二pái對伊講：「上帝所hō͘它清氣ê，你m̄ thang掠做lahsap。」
10:16 Án-ne ê對話連續三pái，然後hitê四角頭吊teh ê大幅布隨時koh收tńg去天頂。
10:17 彼得感覺奇怪，心內tú-teh想chitê異象是啥物意思ê時，哥尼流所差來ê人已經chhōe tio̍h西門ê厝，來khiā tī門口，
10:18 大聲問講：「有一个叫做彼得ê西門tòa tī chia á無？」
10:19 彼得iáu teh想chitê異象ê時，聖神kā伊講：「有三个人來beh chhōe你。
10:20 Taⁿ tio̍h趕緊落去kah in做伙去，m̄ thang躊躇，是我差派in來ê。」
10:21 彼得to̍h落去見hiahê人，講：「我to̍h是lín teh chhōe ê人，lín來有啥物貴事？」
10:22 In應講：「連長哥尼流差派阮來。伊是義人koh敬畏上帝，受全部ê偤太人尊敬。伊得tio̍h聖天使指示，來請你到in tau，thang聽你ê講道。」
10:23 彼得to̍h請in入去厝內，留in tòa hia過暝。隔tńg工，彼得kah in去，koh有幾nā个約帕ê信徒mā tòe伊去。
10:24 Koh隔tńg工，in來到該撒利亞。哥尼流已經聚集伊ê親人kah好朋友，teh thèng候in。
10:25 彼得入去ê時，哥尼流kā伊迎接，仆tī伊ê腳前kā伊拜。
10:26 總是，彼得牽伊起來，講：「起來，我kah你仝款，平平mā是人。」
10:27 彼得kah伊ná行ná講話，入去厝內，看tio̍h真chē人已經聚集tī hia。
10:28 彼得對in講：「Lín知偤太人ê律法禁止in kah別族ê人交陪來往，m̄ koh，上帝已經指示我，無論啥人lóng m̄ thang講人是lahsap無清氣。
10:29 所以，lín請我來，我無推辭to̍h來。Taⁿ請問lín chit pái請我來，有啥物貴事？」
10:30 哥尼流講：「四日前，差不多chitê時下晡三點，我tī厝內teh祈禱，忽然有一个人，衫褲光iàⁿiàⁿ，khiā tī我ê面前，
10:31 講：『哥尼流，上帝已經聽tio̍h你ê祈禱，mā ē記得你ê賑濟。
10:32 Taⁿ你tio̍h差人去約帕，請hitê叫做彼得ê西門來。伊tòa tī製皮師傅西門in tau，伊ê厝tī海邊。』
10:33 我to̍h隨時差人到你hia，taⁿ你來實在真好。Chit-má阮lóng tī上帝ê面前，ài beh聽主命令你beh kā阮講ê話。」
10:34 彼得tī哥尼流ê厝傳道
彼得開嘴，講：「Taⁿ我確實知，上帝無用外貌取人。
10:35 無論tó一个民族，敬畏上帝來行義ê人，祂lóng歡喜接納。
10:36 Lín知：上帝有通過萬民ê主耶穌基督，來對以色列人傳和平ê福音。
10:37 Lín mā知：約翰傳洗禮ê道理以後，chitê福音有tùi加利利省開始，傳到偤太全地。
10:38 Chitê福音to̍h是拿撒勒人耶穌，上帝有kā聖神kah才能賞賜hō͘祂，祂to̍h去ta̍k所在做好事，醫好所有hō͘魔鬼壓制ê人，因為上帝kah祂同在。
10:39 阮是祂tī偤太人ê所在kah耶路撒冷所做ê tāichì ê見證人。In kā祂釘死tī十字架，
10:40 到第三日，上帝hō͘祂koh活，koh hō͘祂顯現；
10:41 m̄是對所有ê人顯現，kantaⁿ對阮chiahê hō͘上帝揀選來做見證ê人顯現。阮chiahê人tī祂tùi死人中koh活了後，kah祂做伙lim食。
10:42 耶穌命令阮傳福音hō͘所有ê人，證實祂是上帝所任命來做活人kah死人ê審判官。
10:43 眾先知mā為祂做見證，to̍h是所有信祂ê人lóng ē tàng óa靠祂ê名得tio̍h赦罪。」
10:44 外邦人領受聖神
彼得iáu teh講話ê時，聖神降臨tī所有聽道理ê人中間。
10:45 kah彼得做伙來ê hiahê受割禮ê信徒大tio̍h驚，因為聖神ê賞賜mā有降臨tī外邦人。
10:46 因為in有聽tio̍h hiahê人用捲舌話teh oló上帝ê偉大。
10:47 彼得to̍h應講：「Hiahê人已經kah咱仝款有領受聖神，啥人ē tàng禁止in領受水ê洗禮？」
10:48 彼得to̍h命令in奉耶穌基督ê名領受洗禮。後來，in請彼得kah in koh tòa幾nā日。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。