使徒行傳 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
9:1 掃羅Tú tio̍h Koh活ê耶穌
(徒22：6-16；26：12-18)
掃羅iáu koh繼續恐嚇behthâi主ê門徒。伊去見大祭司，
9:2 要求伊寫phoe hō͘大馬士革hia-ê會堂，准伊若tú tio̍h信chitê道理ê人，無論男女，lóng thang kā in縛起來，押去耶路撒冷。
9:3 掃羅行beh到大馬士革ê時，忽然tùi天有光照射tī伊ê四箍圍。
9:4 伊to̍h跋倒tī土腳，聽tio̍h有聲對伊講：「掃羅，掃羅，你ná ē beh迫害我？」
9:5 伊問講：「主ah，祢是啥人？」Hitê聲講：「我to̍h是你所迫害ê耶穌。
9:6 總是，你tio̍h起來，入去城內，有人ē kā你指示你tio̍h án怎做。」
9:7 伊ê同伴to̍h擋tiām，gāng-gāng khiā-teh bē講話；in有聽tio̍h聲，mā無看tio̍h影。
9:8 掃羅tùi土腳peh起來，目chiu thí開，啥物都看無。In就牽伊ê手，chhōa伊入去大馬士革。
9:9 掃羅tī hia三日，目chiu 失明，無食mā無lim。
9:10 Tī大馬士革有一个門徒名叫做亞拿尼亞，上帝tī異象中kā伊講：「亞拿尼亞。」伊應講：「主ah，我tī chia。」
9:11 主對伊講：「起來，去hit條叫做『直』ê街路，tī偤大ê厝chhōe一个名叫做掃羅ê大數人，你ē看tio̍h伊tī hia teh祈禱。
9:12 掃羅tī異象中有看tio̍h一个名叫做亞拿尼亞ê人，入來kā伊hōaⁿ手，hō͘伊ē tàng koh看見。」
9:13 亞拿尼亞應講：「主ah，我有聽tio̍h真chē人講起，chitê人tī耶路撒冷對祢ê信徒做真chē惡毒ê tāichì。
9:14 伊koh有祭司長ê授權，thang tī chia掠所有求叫祢ê名ê人。」
9:15 獨獨主kā伊講：「你去，伊是我揀選ê器具，beh對外邦人、國王kah以色列人宣揚我ê名。
9:16 我mā beh hō͘伊知，為tio̍h我ê名，伊一定tio̍h受真chē艱苦。」
9:17 亞拿尼亞to̍h去，入去hit間厝，kā掃羅hōaⁿ手，講：「掃羅兄弟，主，to̍h是你來ê時，tī路中出現hō͘你看ê耶穌，差我來hō͘你ēkoh看見，koh得tio̍h聖神充滿。」
9:18 話講soah，隨時tùi伊ê目chiu 有親像魚鱗ê物lak落來，伊to̍hkoh有看見，起來領受洗禮。
9:19 掃羅tī大馬士革傳道
掃羅食飽了後to̍h勇健起來。伊kah大馬士革ê門徒做伙tòa幾nā日。
9:20 伊隨時tī chiahê ē堂宣揚耶穌，講：「祂是上帝ê Kiáⁿ。」
9:21 聽tio̍h ê人lóng tio̍h驚kah gāng去，講：「Chitê人kám m̄是hitê tī耶路撒冷迫害所有求叫chitê名ê人？伊koh來chia beh掠信徒，拖in去交hō͘祭司長。」
9:22 M̄ koh掃羅ná講ná有力，伊證明耶穌是基督，hō͘ tòa tī大馬士革ê偤太人lóng無辯駁ê餘地。
9:23 掃羅脫離偤太人ê手
過真chē日了後，偤太人做伙計謀behthâi掃羅。
9:24 掃羅有聽tio̍h in ê計謀。Hiahê人暝日tī城門teh當等，beh kā伊thâi。
9:25 M̄ koh，掃羅ê門徒透暝用一个籃á，tùi城牆kā伊lūi落去。
9:26 掃羅tī耶路撒冷
掃羅來到耶路撒冷，beh kah門徒交陪。眾人lóng驚伊，無相信伊是門徒。
9:27 只有巴拿巴chhōa掃羅來見使徒，kā in說明伊tī路中án怎看tio̍h主，主án怎kah伊講話，以及伊tòa大馬士革án怎好膽奉主ê名來傳福音。
9:28 掃羅tī耶路撒冷kah使徒有出入來往，奉主ê名好膽傳福音。
9:29 伊mā kah講希臘話ê偤太人講話辯論；hiahê人iáu koh不時計謀beh kā伊thâi。
9:30 信徒知影chitê tāichì，to̍h chhōa伊落去該撒利亞，送伊tńg去大數。
9:31 Hit時，全偤太、加利利省kah撒馬利亞ê教lóng ē有平安，ná來ná堅固發展。In所行所做lóng敬畏主，得tio̍h聖神ê鼓舞，信徒人數一直加添。
9:32 彼得醫治Ai-né-iah
彼得去ta̍k所在訪問，mā有訪問tòa tī呂大ê信徒。
9:33 伊tī hia tú tio̍h一个人，名叫做Ai-né-iah；chitê人患tio̍h半遂，已經倒tī眠床八年。
9:34 彼得kā伊講：「Ai-né-iah，耶穌基督kā你醫好à，起來，整頓你kakī ê舖á。」Ai-né-iah隨時起來行。
9:35 所有tòa tī呂大kah Sat-lûn ê人lóng有看tio̍h ánne，to̍h來歸主。
9:36 Tol-ka恢復活命
Tī約帕有一个女信徒，名叫做Ta-bí-thah，希臘話叫做「Tol-ka」，to̍h是鹿á ê意思。她做真chē好tāichì，koh賑濟sànchhiah人。
9:37 她破病死去，人洗她ê身屍，kā她hē tī樓頂ê房間。
9:38 因為呂大離約帕無遠，門徒聽tio̍h彼得tī hia，to̍h差兩 个人去chhōe伊，求講：「請來阮hia，m̄ thang延chhiân。」
9:39 彼得to̍h隨時kah in去，去到位to̍h有人chhōa伊去樓頂ê房間。眾寡婦khiā tī彼得ê身邊teh哮，kā Tol-ka kah in做伙ê時所做ê衫褲hō͘伊看。
9:40 彼得to̍h叫in lóng出去，跪落去，祈禱，然後oa̍t-tńg身對身屍講：「Ta-bí-thah，起來。」Tol-ka ê目chiu thí開，看tio̍h彼得，to̍h起來坐。
9:41 彼得伸手kā她扶起來，叫hiahê信徒kah寡婦入來，kā koh活ê Tol-ka交hō͘ in。
9:42 全約帕ê人lóng知chit項tāichì，to̍h有真chē人信主。
9:43 彼得tī約帕kah一个製皮師傅西門做伙tòa真chē日。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。