使徒行傳 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
7:1 司提反ê答辯
大祭司to̍h講：「Chiahê tāichì kám是ánne？」
7:2 司提反講：「各位父老兄弟，請聽，咱ê祖先亞伯拉罕iáu未徙去哈蘭以前，iáu tòa tī米所波大米ê時，榮光ê上帝對伊顯現，
7:3 kā伊講：『離開你ê故鄉kah親族，去我beh kā你指示ê所在。』(註：創12：1)
7:4 亞伯拉罕to̍h離開迦勒底人ê所在，去tòa tī哈蘭。伊ê老父死了後，上帝hō͘伊tùi hia徙到lín chitmá teh tòa ê所在。
7:5 Tī chia，上帝並無hō͘伊產業，連khiā腳ê所在都無。雖然hit時伊iáu未有kiáⁿ，上帝應允beh賜hō͘伊chitê土地，thang做伊kah kiáⁿ孫ê產業。
7:6 上帝有ánne kā伊講：『你ê kiáⁿ孫ē出外去tī外國，做人ê奴隸受pháiⁿ款待四百年。』(註：創15：13)
7:7 上帝koh講：『我beh審判hitê hō͘ in做奴隸ê國家。後來，我ē hō͘ in出來，tī chitê所在敬拜我。』(註：創15：14)
7:8 然後上帝kah伊立約，用割禮做記號。因為ánne，伊生以撒了後第八日，to̍h kā伊行割禮。後來，以撒生雅各，雅各生咱十二個族長。
7:9 「Chiahê族長怨妒約瑟，kā伊賣去埃及；m̄ koh，上帝kah伊同在，
7:10 救伊脫離一切ê苦難，hō͘伊tī埃及王法老ê面前得tio̍h恩典kah智慧，hō͘法老kā伊設立做埃及ê宰相kah王宮ê總管。
7:11 後來，埃及kah迦南全地發生飢荒，引起大災難；咱ê祖先無米糧thang食。
7:12 雅各聽講埃及有糧食，to̍h差咱ê祖先去hia。這是頭一pái。
7:13 第二pái koh去ê時，約瑟hō͘兄弟認出伊ê身分；因為ánne，法老bat約瑟ê家族。
7:14 約瑟差人去請伊ê老父雅各kah全家族，總共七十五人去埃及。
7:15 雅各to̍h落去埃及，後來，伊kah咱ê祖先lóng死tī hia。
7:16 In ê屍體後來，運tńg來示劍，埋葬tī亞伯拉罕用錢tùi 哈抹ê kiáⁿ孫買來ê hit塊墓地。
7:17 上帝對亞伯拉罕應允ê hitê期ná近，以色列人tī埃及生湠ná興旺。
7:18 後來，另外一个m̄ bat約瑟ê王起來統治埃及。(註：出1：8)
7:19 伊用詭計來對付咱ê民族，虐待咱ê祖先，命令in tio̍h kā in ê嬰á tàn tòa外面，hō͘ in死。
7:20 Hit時，摩西tú出世，是一个非常清秀ê嬰á，tī老父ê厝養飼三个月。
7:21 伊受棄sak ê時，法老ê chabó͘ kiáⁿ kā伊拾去當做kakī ê kiáⁿ養飼。
7:22 摩西學習埃及人所有ê學問，講話kah做tāichì lóng有才能。
7:23 「摩西四十歲ê時，想beh去看kakī ê兄弟—以色列ê同胞。
7:24 伊看tio̍h一个兄弟hō͘埃及人欺負，to̍h kā伊保護，phah死hitê埃及人，替受委屈ê人報仇。
7:25 伊想講kakī ê兄弟ē了解這是上帝用伊ê手來救in；m̄ koh，in無了解。
7:26 隔tńg工，伊看tio̍h兩 个以色列人teh相phah，想beh kā in調解，講：「Lín是兄弟，ná ē teh互相傷害？」
7:27 Hitê teh欺負ê人kā摩西sak開，講：「啥人設立你做阮ê頭人，做阮ê判官？
7:28 你ài beh親像昨hngthâi死hitê埃及人ánne，來kā我thâi死，是無？」(註：出2：14)
7:29 摩西一下聽tio̍h chit句話to̍h逃走，去tòa米甸人ê所在，tī hia生兩 个kiáⁿ。
7:30 「四十年後，tī西奈山ê曠野，有天使tī刺phè ê火焰中，對摩西顯現。
7:31 摩西看tio̍h chitê景象，感覺真稀奇，行óa去想beh看khah詳細ê時，to̍h聽tio̍h主ê聲講：
7:32 『我是lín祖先ê上帝，to̍h是亞伯拉罕、以撒、雅各ê上帝。』(註：出3：6)摩西驚kah phi̍h-phi̍h chhoah，m̄敢看。
7:33 主kā伊講：『你ê鞋tio̍h thǹg起來，因為你khiā ê所在是聖地。
7:34 我確實有看tio̍h我ê子民tī埃及teh受苦，mā有聽tio̍h in teh叫苦ê聲。我降臨來beh kā in拯救。Taⁿ你來，我beh差你去埃及。』(註：出3：5，7)
7:35 「Chitê摩西to̍h是以色列人bat kā伊拒絕，問伊講：『啥人設立你做阮ê頭人，做阮ê判官？』ê hit位，上帝卻通過tī刺phè中對伊顯現ê天使，差派伊做領袖，做拯救者。
7:36 摩西chhōa in出埃及，tòa tī埃及、紅海kah曠野四十年，行真chē奇事神跡。
7:37 Chitê摩西bat對以色列ê kiáⁿ孫講：『上帝beh tùi lín兄弟中間，為lín興起一个親像我chit款ê先知。』(註：申18：15)
7:38 摩西mā bat kah tī西奈山對伊講話ê天使以及咱ê祖先，tī曠野做伙見面，伊mā有得tio̍h活活ê信息來傳hō͘咱。
7:39 咱ê祖先m̄肯聽伊ê話，顛倒kā伊拒絕，想beh倒tńg去埃及。
7:40 In kā亞倫講：『你tio̍h kā阮造神明來做頭chhōa阮，因為chitê chhōa阮出埃及ê摩西m̄知tú tio̍h啥物tāichì。』(註：出32：1)
7:41 Hit時，in to̍h造牛á-kiáⁿ ê像，對hitê偶像獻祭，歡喜in kakī ê手所做ê偶像。
7:42 上帝oa̍t頭無ài chhap，chhut-chāi in去敬拜天象。Tú親像先知ê冊所記載：以色列ê子民，lín tī曠野四十年，kám bat獻牲禮á是祭物hō͘我？
7:43 Lín扛摩洛 ê布棚， kah Lāi-hán神ê星， to̍h是lín造來拜ê偶像； 我 beh kā lín遷徙去巴比倫hit-pêng！(註：摩 5：25-27)
7:44 「咱祖先tī曠野有thang做見證ê會幕，to̍h是上帝對摩西ê指示，照伊所看tio̍h ê款式來起造ê。
7:45 後來，咱ê祖先既然承接chitê ē幕，上帝to̍h tùi in ê面前kā外族趕走。In佔領hitê土地了後，to̍h kah約書亞kā會幕徙去hia，一直到大衛ê時代。
7:46 大衛有得tio̍h上帝ê恩典，求上帝允准in kā雅各ê上帝chhōe一个tòa ê所在。
7:47 M̄ koh，後來，為上帝起聖殿ê是所羅門。
7:48 「其實至koân上帝並無tòa tī人ê手所起ê厝，親像先知所講：
7:49 』主講：天是我ê寶座， 地是我ê腳踏。 Lín beh kā我起啥物款ê厝？ 我安息ê所在tī tó位？
7:50 這一切kám m̄是我親手創造ê？」(註：賽66：1-2)
7:51 「Lín ná ē chiahni̍h固執！Lín ê心硬，耳孔m̄聽話，kah lín ê祖先仝款，tiāⁿ-tiāⁿ 悖逆聖神！
7:52 Tó一个先知無受tio̍h lín祖先ê迫害？預言hitê公義ê奴僕teh beh來臨ê人，lóng hō͘ lín害死。Taⁿ lín成做出賣kohthâi死chitê奴僕ê人。
7:53 Lín是tùi天使領受上帝ê律法，竟然無teh遵守！」
7:54 司提反Hông Tìm死
In聽tio̍h司提反chiahê話，心內非常受氣，對伊咬牙切齒。
7:55 獨獨司提反hō͘聖神充滿，gia̍h頭看天，看tio̍h上帝ê榮光，mā看tio̍h耶穌khiā tī上帝ê正pêng。
7:56 伊講：「你看！我看tio̍h天開，人子khiā tī上帝ê正pêng！」
7:57 眾人耳孔掩teh，大聲hoah，做一个chhi̍h óa去，
7:58 kā司提反趕出去城外，用石頭kā伊tìm。做見證ê人kā in ê外衫交hō͘一个名叫做掃羅ê少年人去顧。
7:59 In用石頭tìm司提反ê時，司提反祈求講：「主耶穌ah，求祢接納我ê靈魂！」
7:60 伊跪落去，大聲叫，講：「主ah，m̄ thang用chitê罪歸hō͘ in！」伊講soah to̍h死去。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。