使徒行傳 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
6:1 Siat-li̍p Chhit-ê Chip-sū
Hit sî, bûn-tô͘ ke-thiⁿ chin chē, ū kóng Hi-la̍h ōe ê Iô-tá-iah lâng tùi Hi-bú-lâi lâng chhut oàn-giân, in-ūi tī ji̍t-siông seng-oa̍h ê phòe-kip, bô kò͘ tio̍h in ê kóaⁿ-hū.
6:2 Cha̍p-jī sù-tô͘ tiàu-chi̍p chèng bûn-tô͘ lâi, tùi in kóng, " Goán kā Siōng-tè ê tō-lí pàng hē-.leh., lâi pān-lí ji̍t-siông seng-oa̍h ê phòe-kip, pēng bô sek-ha̍p.
6:3 Só͘-í, hiaⁿ-tī chí-mōe, tio̍h tùi lín tiong-kan kéng-soán chhit-ê ū hó miâ-siaⁿ, siū Sèng Sîn chhiong-móa koh ū tì-hūi ê lâng, goán thang siat-li̍p in lâi koán-lí chit-ê tāichì.
6:4 Goán beh choan-sim tī kî-tó kah thoân hok-im ê kang-chok. "
6:5 Chèng lâng hoaⁿ-hí sù-tô͘ ê thê-gī, chiū kéng-soán Su-tê-hoa-no͘h, i sī chhiong-móa sìn-sim kah Sèng Sîn ê lâng, koh kéng-soán Hui-li̍p-pò͘, Pu-lô-kho-lô, nî-ka-no͘l, Tî-móng, Pa-mé-ná kah bat ji̍p Iô-tá-iah-kàu ê An-ti-o-khè lâng Nî-ko-láu.
6:6 In hō͘ chit chhit-ê lâng khiā tī sù-tô͘ ê bīn-chêng, sù-tô͘ chiū ūi tio̍h in kî-tó, kā in hōaⁿ-chhiú, lâi siat-li̍p in chò chip-sū.
6:7 Siōng-tè ê tō-lí ná lâi ná heng-ōng. Tī Ê-lú-sa-lèm, bûn-tô͘ ê jîn-sò͘ ke-thiⁿ chin chē, koh ū chin chē chè-si lâi sìn hok-im ê tō-lí.
6:8 Su-tê-hoa-no͘h siū Lia̍h
Su-tê-hoa-no͘h chhiong-móa un-tián kah châi-lêng, tī bîn-chiòng ê tiong-kan kiâⁿ tōa ê kî-sū kah sîn-jiah.
6:9 Hit sî, ū chi̍t-kóa lâng khí-lâi kah Su-tê-hoa-no͘h piān-lūn, in sī tùi Kó͘-lī-nāi kah A-le̍k-san-toh lâi ê Iô-tá-iah lâng, in sī sio̍k " Chū-iû lâng " Hōe-tn̂g ê hōe-oân; í-ki̍p tùi Ki-lí-kiah kah A-si-a séng lâi ê lâng.
6:10 Sèng Sîn sù Su-tê-hoa-no͘h tì-hūi lâi kóng-ōe, hō͘ in bô hoat-tō͘ piān-pok.
6:11 In chiū sái-lōng lâng chhut-lâi kóng, " Goán bat thiaⁿ tio̍h i kóng húi-pòng Mô͘-se kah siat-to̍k Siōng-tè ê ōe. "
6:12 In koh siàn-tōng bîn-chiòng, tiúⁿ-ló kah keng-ha̍k kàu-su, chhiong-khì lia̍h Su-tê-hoa-no͘h, kā i kau hō͘ gī-hōe.
6:13 In kiò chi̍t-kóa ké chèng-jîn lâi, kóng, " Chit-ê lâng kóng-ōe put-sî teh kong-kek chit-ê sèng-tiān kah Mô͘-se ê lu̍t-hoat.
6:14 In-ūi goán bat thiaⁿ tio̍h i kóng, ' Chit-ê Na-cha-lia̍t lâng I-é-su beh húi-hoāi chit-ê sèng-tiān, koh beh kái-piàn Mô͘-se thoân hō͘ lán ê kui-lē. '"
6:15 Hit sî, chē tī gī-hōe tiong ê lâng lóng lia̍h Su-tê-hoa-no͘h kim-kim khòaⁿ, khòaⁿ tio̍h i ê bīn ná chhin-chhiūⁿ thiⁿ-sài ê bīn.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。