使徒行傳 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
5:1 Hun-hióng Châi-bu̍t ê Khi-phiàn
Ū chi̍t-ê lâng, miâ kiò-chò A-ná-ni-a, i kah i ê bó͘ Sap-hui-la bē in ê sán-gia̍p.
5:2 In ang-á-bó͘ chham-siông liáu-āu, koat-tēng kā só͘ tit tio̍h ê chîⁿ lâu chi̍t-kóa khí-.lâi, chhun-ê chiah tòa-lâi kau hō͘ sù-tô͘.
5:3 Piat-tò͘ kóng, " A-ná-ni-a, lí án-chóaⁿ hō͘ Sa-tán chhiong-móa lí ê sim lâi khi-phiàn Sèng Sîn, kā bē hn̂g ê chîⁿ thau-thau-á lâu chi̍t-pō͘-hūn khí-.lâi?
5:4 Chhân-hn̂g iáu-bōe bē sī lí ê, bē liáu só͘ tit tio̍h ê chîⁿ, lí mā ū koân thang chhù-lí, lí ná ē chò chit khoán tāichì? Lí m̄-sī khi-phiàn lâng, sī khi-phiàn Siōng-tè! "
5:5 A-ná-ni-a thiaⁿ tio̍h chiahê ōe, chiū lek lo̍h-.khì, soah tn̄g-khùi. Thiaⁿ-.tio̍h ê lâng lóng tōa tio̍h-kiaⁿ.
5:6 Ū chi̍t-kóa siàu-liân lâng lâi kā i ê sin-si pau khí-.lâi, kng chhut-khì bâi-chòng.
5:7 Chha-put-to kòe saⁿ-tiám-cheng āu, i ê bó͘ mā ji̍p-.lâi, iáu m̄-chai só͘ hoat-seng ê tāichì.
5:8 Piat-tò͘ mn̄g i kóng, " Lí kā góa kóng, lín bē chhân-hn̂g só͘ tit tio̍h ê chîⁿ kantaⁿ chiahê, sī-.bô? " I ìn kóng, " Tio̍h, sī chiahê niā-niā. "
5:9 Piat-tò͘ tùi i kóng, " Lín ná ē tâng-sim lâi chhì-thàm Chú ê Sèng Sîn? Lí khòaⁿ, bâi-chòng lín ang ê lâng, í-keng tńg-lâi-kàu mn̂g-kháu, mā beh kā lí kng chhut-.khì. "
5:10 Sap-hui-la sûi-sî lek lo̍h-khì tī Piat-tò͘ ê kha chêng, chiū tn̄g-khùi. Hiahê siàu-liân lâng ji̍p-.lâi, khòaⁿ tio̍h i í-keng sí, chiū kā i kng chhut-.khì, bâi-chòng tī in ang ê sin piⁿ.
5:11 Choân kàu-hōe kah thiaⁿ tio̍h chiahê tāichì ê lâng, lóng tōa tio̍h-kiaⁿ.
5:12 Kàu-hōe ê Hôe-èng
Sù-tô͘ tī bîn-kan ū kiâⁿ chin chē sîn-jiah kah kî-sū; sìn-tô͘ lóng tâng-sim ha̍p-ì tī Só͘-lô-móng ê mn̂g-lông chū-hōe.
5:13 Chèng lâng lóng chin chun-tiōng chiahê sù-tô͘, m̄ koh, chin chē lâng m̄-káⁿ kah in chiap-kīn.
5:14 Sìn Chú ê lâng ná lâi ná ke-thiⁿ, lâm-.ê lí-.ê lóng chin chē;
5:15 Sīm-chì ū lâng kā pēⁿ-lâng khǹg tī pho͘-á, kng lâi hē tī ke-lō͘ piⁿ, ǹg-bāng Piat-tò͘ keng-kòe ê sî, ū kúi-ê-á lâng thang hō͘ i ê iáⁿ ìm tio̍h.
5:16 Koh ū chin chē lâng tùi Ê-lú-sa-lèm sì-kho͘-ûi ê siâⁿ, chhōa pēⁿ-lâng kah hō͘ siâ-sîn tîⁿ-sin ê lâng lâi Piat-tò͘ hia, in lóng ū tit tio̍h i hó.
5:17 Sù-tô͘ siū Pek-hāi
To̍k-to̍k tōa-chè-si í-ki̍p kah in kâng tóng ê lâng, to̍h-sī Sat-to-kai tóng ê lâng, lóng hui-siông oàn-tò͘ chiahê sù-tô͘,
5:18 Chiū hē chhiú lia̍h sù-tô͘, kā in koaiⁿ lo̍h kaⁿ.
5:19 M̄ koh, hit àm Chú ê thiⁿ-sài phah khui kaⁿ-mn̂g, kā in chhōa chhut-.lâi, tùi in kóng,
5:20 " Lín tio̍h khì khiā tī sèng-tiān, kā chit-ê sù oa̍h-miā ê sìn-sit lóng tùi chèng lâng soan-káng. "
5:21 Sù-tô͘ thiaⁿ thiⁿ-sài ê ōe, thiⁿ-phú-kng chiū ji̍p-khì sèng-tiān kà-sī lâng. Tōa-chè-si kah kâng tóng ê lâng lâi-kàu-ūi, chio-chi̍p gī-hōe kah I-su-la-el lâng ê thâu-lâng, koh chhe lâng khì kaⁿ-.ni̍h chhōa sù-tô͘ lâi.
5:22 Kéng-ōe kàu-ūi, tī kaⁿ-.ni̍h chhōe bô sù-tô͘, chiū tńg-lâi pò-kò, kóng,
5:23 " Goán khòaⁿ tio̍h kaⁿ-mn̂g koaiⁿ kah chin tiâu, kò͘-siú ê lâng khiā tī mn̂g-kháu; kaⁿ mn̂g khui ê sî, lāi-bīn chhōe bô lâng. "
5:24 Sèng-tiān ê siú-ōe-tiúⁿ kah chè-si-tiúⁿ thiaⁿ tio̍h chiahê ōe, m̄-chai chit-ê tāichì ē án-chóaⁿ ián-piàn, chiū chin tio̍h-kip.
5:25 Hit sî, ū chi̍t-ê lâng lâi pò-kò kóng, " Lín kā in koaiⁿ tī kaⁿ-.ni̍h ê lâng, chitmá khiā tī sèng-tiān teh kà-sī lâng. "
5:26 Hitê siú-ōe-tiúⁿ kah kéng-ōe chiū khì kā sù-tô͘ chhōa-.lâi, in m̄-káⁿ ēng kiông-le̍k, in-ūi kiaⁿ chèng lâng ēng chio̍h-thâu kā in tìm.
5:27 Chhōa sù-tô͘ ji̍p-lâi liáu-āu, chiū hō͘ in khiā tī gī-hōe ê bīn-chêng, tōa-chè-si mn̄g in kóng,
5:28 " Goán bat giâm-giâm bēng-lēng lín m̄ thang hōng chit-ê lâng ê miâ kà-sī lâng, lín hoán-tńg kā lín ê kà-sī thoân kàu Ê-lú-sa-lèm ê ta̍k só͘-chāi, siūⁿ beh kā lâu chit-ê lâng ê hoeh ê chek-jīm kui hō͘ goán. "
5:29 Piat-tò͘ kah kî-tha ê sù-tô͘ ìn kóng, " Goán tio̍h sūn-ho̍k Siōng-tè, m̄-sī sūn-ho̍k lâng.
5:30 Lín kā I tèng tī si̍p-jī-kè téng ê I-é-su, lán chó͘-sian ê Siōng-tè í-keng ū hō͘ I koh-oa̍h.
5:31 Chit-ê I-é-su, Siōng-tè kā I thê-seng tòa kakī ê chiàⁿ pêng, hō͘ I chò kun-ông, chò Kiù-chú, thang hō͘ I-su-la-el lâng hóe-kái, chōe tit tio̍h sià-bián.
5:32 Goán sī chiahê tāichì ê kiàn-chèng-jîn, Siōng-tè siúⁿ-sù hō͘ sūn-ho̍k I ê lâng ê Sèng Sîn mā ūi tio̍h chit-ê tāichì chò chèng-jîn. "
5:33 Gī-hōe ê lâng thiaⁿ-liáu hui-siông siū-khì, ài beh kā in hāi-sí.
5:34 To̍k-to̍k in tiong-kan ū chi̍t-ê Hoa-lí-sái phài ê lâng, miâ kiò-chò Gâ-má-li-el, sī chèng lâng chun-kèng ê lu̍t-hoat kàu-su. I tī gī-hōe tiong khiā khí-.lâi, hoan-hù hō͘ sù-tô͘ chiām-sî chhut-.khì,
5:35 Jiân-āu chiū tùi tāi-ke kóng, " I-su-la-el lâng, lín beh pān chiahê lâng tio̍h chin kín-sīn!
5:36 Í-chêng ū chi̍t-ê kiò-chò Siú-tah ê lâng chhut-thâu, kakī khoa-kháu chin úi-tāi, chha-put-to ū sì-pah lâng kin-tòe i. Āu-lâi, i hō͘ lâng thâi-sí, kin-tòe ê lâng sì-sòaⁿ, i ê kè-bô͘ chiū ánne lóng bô-.khì.
5:37 Āu-lâi, tī teng-kì hō͘-kháu ê sî, koh ū Ga-lí-la-iah séng ê Iô-tah chhut-thâu, ín-iú jîn-bîn kin-tòe i; i mā hō͘ lâng thâi-sí, kin-tòe ê lâng lóng sì-sòaⁿ.
5:38 Taⁿ góa kā lín kóng, m̄ thang chhap chiahê lâng, chhut-chāi in khì, in-ūi in só͘ kè-bô͘ kah só͘ chò ê nā-sī chhut tī lâng, it-tēng ē sit-pāi;
5:39 Nā-sī chhut tī Siōng-tè, lín chiū bē tàng kā in siau-bia̍t, koh khióng-kiaⁿ lín soah kah Siōng-tè chò tùi-thâu. " Gī-hōe chiap-la̍p i ê ì-kiàn.
5:40 In tiàu sù-tô͘ lâi, kā in piⁿ-phah, bēng-lēng in m̄ thang koh hōng I-é-su ê miâ lâi káng tō-lí, jiân-āu pàng in chhut-.khì.
5:41 Sù-tô͘ lī-khui gī-hōe, móa-sim hoaⁿ-hí, che sī in-ūi in hō͘ lâng khòaⁿ-chò ē kham-tit ūi tio̍h Chú ê miâ siū lêng-jio̍k.
5:42 In chiū ta̍k ji̍t tī sèng-tiān á-.sī tī jîn-ke kà-sī lâng, thoân I-é-su Ki-tok ê hok-im.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。