使徒行傳 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
2:1 Gō͘-sûn-cheh Sèng Sîn Kàng-lîm
Gō͘-sûn-cheh kàu, sìn-tô͘ lóng chū-chi̍p tī chi̍t-ê só͘-chāi.
2:2 Hut-jiân-kan ū siaⁿ tùi thiⁿ-téng lâi, chhin-chhiūⁿ teh thàu tōa hong, chhiong-móa in teh chē ê kui keng chhù.
2:3 Koh ū chhin-chhiūⁿ hun-khui ê hóe-chi̍h tùi in chhut-hiān, hioh tī ta̍k lâng ê téng-bīn.
2:4 In lóng siū Sèng Sîn chhiong-móa, chiàu Sèng Sîn siúⁿ-sù hō͘ in ê un-sù, khui chhùi kóng bô kāng ê gí-giân.
2:5 Hit sî, ū chi̍t-kóa khiân-sêng ê Iô-tá-iah lâng, tùi sè-kài ta̍k kok tńg-.lâi, tòa tī Ê-lú-sa-lèm.
2:6 Kûn-chiòng thiaⁿ tio̍h chit-ê siaⁿ chiū lóng chū-chi̍p óa-.lâi, in-ūi ta̍k lâng thiaⁿ tio̍h sìn-tô͘ chiàu in kakī pún-tē ê ōe lâi tùi in kóng ōe, soah khí tio̍h-kiaⁿ.
2:7 In tio̍h-kiaⁿ kah gāng-.khì, kóng, " Lí khòaⁿ, chiahê teh kóng ōe ê lâng kám m̄-sī lóng sī Ga-lí-la-iah lâng?
2:8 Lán ná ē lóng thiaⁿ tio̍h in chiàu lán tāi-ke chhut-sì to̍h teh kóng ê gí-giân teh kóng ōe?
2:9 Lán tiong-kan ū Pa-thò͘-suh lâng, Mê-toh lâng, Ê-lám lâng kah tiàm tī Mê-só͘-po-ta-miah, Iô-tá-iah kah Ge-bah-to-kiah, Pong-to͘ kah A-si-a,
2:10 Hu-lú-gia̍h kah Pam-hu-lí-ah, Ai-gi̍p kah kīn-óa Kó͘-lī-nāi ê Li-bí-a chiahê só͘-chāi ê lâng, í-ki̍p tùi Lô-má lâi ê chhut-gōa lâng,
2:11 Kî-tiong ū ê sī Iô-tá-iah lâng, ū ê sī kái-chong ji̍p Iô-tá-iah-kàu ê lâng, mā ū Ku-lé-té lâng, A-la-puh lâng. Lán lóng thiaⁿ tio̍h in ēng lán ê gí-giân teh kóng Siōng-tè só͘ chò úi-tāi ê tāichì. "
2:12 Tāi-ke tio̍h-kiaⁿ koh khí giâu-gî, mn̄g-lâi mn̄g-khì, kóng, " Che sī siáⁿ-mi̍h tāichì? "
2:13 Mā ū lâng thí-chhiò in kóng, " In sī lim sin chiú teh chùi. "
2:14 Piat-tò͘ ê Gō͘-sûn-cheh káng-tō
Chóng-.sī, Piat-tò͘ kah cha̍p-it-ê sù-tô͘ khiā khí-.lâi, tōa-siaⁿ tùi in kóng, " Iô-tá-iah lâng kah só͘-ū tòa tī Ê-lú-sa-lèm ê lâng, lín tio̍h chai chit-ê tāichì, mā tio̍h chù-ì thiaⁿ góa ê ōe.
2:15 Chiahê lâng m̄-sī lín só͘ kóng teh chiú-chùi, in-ūi chitmá chiah chá-khí sî káu tiám.
2:16 Kî-si̍t che sī sian-ti Iô-el só͘ kóng ê,
2:17 Siōng-tè kóng, Tī chiong-boa̍t ê sî-ji̍t, góa beh ēng góa ê Sèng Sîn kàng lo̍h-khì hō͘ sè-kan lâng. Lín ê hāu-seⁿ, lín ê chabó͘ kiáⁿ ē kóng ī-giân, lín ê siàu-liân lâng ē khòaⁿ tio̍h ī-siōng, lín ê lāu lâng ē tit tio̍h thok-bāng.
2:18 Koh tī hiahê ji̍t, góa mā beh kā góa ê Sèng Sîn kàng lo̍h-khì hō͘ góa ê lô͘-po̍k kah lú-pī; in mā ē kóng ī-giân.
2:19 Góa tī thiⁿ-téng hián-chhut kî-sū, tī tē-chiūⁿ góa beh hián-sī sîn-jiah, ū hoeh, hóe kah ian-bū.
2:20 Tī Chú tōa koh êng-iāu ê ji̍t kàng-lîm chìn-chêng, ji̍t-thâu ē piàn-chò àm, goe̍h ē piàn-chò ná hoeh hiahni̍h âng.
2:21 Hit sî, só͘-ū kiû-kiò Chú ê miâ ê lâng lóng ē tit kiù. " (chù, IES 2:28-32)
2:22 " I-su-la-el lâng, lín tio̍h thiaⁿ góa ê ōe, chiàu lín só͘ chai, Siōng-tè thong-kòe Na-cha-lia̍t lâng I-é-su, tī lín tiong-kan hián-sī I ê koân-lêng, kî-sū kah sîn-jiah, lâi tùi lín chèng-bêng I sī Siōng-tè só͘ siat-li̍p ê.
2:23 Siōng-tè chiàu I tiāⁿ tio̍h ê chí-ì kah ī-tēng ê kè-ōe, kā I kau hō͘ lín. Lín chioh-ēng put-hoat ê lâng ê chhiú, kā I tèng si̍p-jī-kè, kā I hāi-sí.
2:24 Chóng-.sī, Siōng-tè tháu-pàng I sí-bông ê thòng-khó͘, hō͘ I koh-oa̍h, in-ūi sí-bông bē tàng kā I khòng-chè.
2:25 Koan-hē I-é-su ê tāichì, Ta-bi̍t ū kóng, góa khòaⁿ-kìⁿ Chú tiāⁿtiāⁿ tī góa ê bīn-chêng; I tiàm tī góa ê chiàⁿ pêng, hō͘ góa bē iô-tāng.
2:26 Só͘-í, góa ê sim hoaⁿ-hí, góa ê chi̍h khoài-lo̍k, koh góa ê jio̍k-thé mā ē tī ǹg-bāng tiong an-jiân kòe-ji̍t.
2:27 In-ūi Lí bē kā góa ê lêng-hûn pàng-sak tī im-kan, mā bē hō͘ Lí sîn-sèng ê lô͘-po̍k hiú-nōa.
2:28 Lí í-keng chí-sī góa oa̍h-miā ê lō͘. Hō͘ góa tī Lí ê bīn-chêng móa-sim khoài-lo̍k. " (chù, SPh 16:8-11)
2:29 " Hiaⁿ-tī chí-mōe, koan-hē sian-chó͘ Ta-bi̍t ê tāichì, góa ē-tàng hó-táⁿ tùi lín kóng, i í-keng sí koh bâi-chòng, i ê bōng kàu kin-á-ji̍t iáu tī lán chia.
2:30 I sī sian-ti, koh chai Siōng-tè bat kah i chiùchōa, èng-ín beh tī i ê kiáⁿ-sun tiong siat-li̍p chi̍t-ê lâng chò ông, lâi chē I ê pó-chō.
2:31 Ta-bi̍t ū seng khòaⁿ-chhut chit-ê tāichì, só͘-í, koan-hē Ki-tok ê koh-oa̍h, i ū kóng, I bô siū pàng-sak tī im-kan, I ê jio̍k-thé mā bô hiú-nōa khì. (chù, SPh 16:10)
2:32 Chit-ê I-é-su, Siōng-tè ū hō͘ I koh-oa̍h, goán chiahê lâng lóng chò I ê kiàn-chèng-jîn.
2:33 I í-keng siū ko-seng kàu Siōng-tè ê chiàⁿ pêng, koh tùi Thiⁿ-pē niá-siū só͘ èng-ín ê Sèng Sîn. I chitmá kā chit-ê Sèng Sîn piàⁿ lo̍h-lâi hō͘ goán, to̍h-sī lín chitmá só͘ khòaⁿ-.tio̍h, só͘ thiaⁿ-.tio̍h ê.
2:34 Ta-bi̍t m̄ bat chiūⁿ thiⁿ, m̄ koh i kóng, Siōng-tè tùi góa ê Chú kóng, Lí chē góa ê tōa-pêng,
2:35 Kàu góa hō͘ Lí ê tùi-te̍k chò Lí ê kha-ta̍h. (chù, SPh 110:1)
2:36 " Só͘-í, I-su-la-el choân ke lóng tio̍h khak-si̍t chai, chit-ê léng kā I tèng si̍p-jī-kè ê I-é-su, Siōng-tè í-keng siat-li̍p I chò chú, chò Ki-tok à. "
2:37 Chèng lâng thiaⁿ tio̍h chiahê ōe, lóng chin kám-tōng, tùi Piat-tò͘ kah kî-tha ê sù-tô͘ kóng, " Hiaⁿ-tī, goán tio̍h án-chóaⁿ chò? "
2:38 Piat-tò͘ kā in kóng, " Lín tio̍h hóe-kái, ta̍k lâng lóng tio̍h hōng I-é-su Ki-tok ê miâ niá siū sé-lé, hō͘ lín ê chōe tit tio̍h sià-bián, lín chiū ē-tàng niá-siū Siōng-tè siúⁿ-sù ê Sèng Sîn.
2:39 In-ūi chit-ê èng-ín sī beh hō͘ lín kah lín ê kiáⁿ-sun, í-ki̍p só͘-ū tī hn̄g-hn̄g ê lâng, to̍h-sī lán ê Siōng-tè ho͘-tiàu lâi kui-ǹg I ê lâng. "
2:40 Piat-tò͘ koh lēng-gōa ēng chin chē ōe chhut-la̍t kiàn-chèng, lâi khó͘-khǹg in kóng, " Lín tio̍h kiù kakī thoat-lī chit-ê siâ-ok ê sè-tāi. "
2:41 Chiū ánne, chiap-la̍p i ê ōe ê lâng lóng niá siū sé-lé, hit ji̍t sìn-tô͘ tāi-iok ke-thiⁿ saⁿ chheng lâng.
2:42 Sìn-tô͘ ê Thoân-khè Seng-oa̍h
In choan-sim niá-siū sù-tô͘ ê kà-sī, chham-ú sìn-tô͘ thoân-khè seng-oa̍h, niá-siū Sèng-chhan, kî-tó.
2:43 Sù-tô͘ koh kiâⁿ chin chē kî-sū sîn-jiah, ín-khí chèng lâng khí kèng-ùi ê sim.
2:44 Sìn-tô͘ lóng chū-chi̍p tī chi̍t-ê só͘-chāi, só͘-ū ê mi̍h lóng kong-ke ēng.
2:45 In koh bē ka-sán kah ka-gia̍p, chiàu ta̍k lâng só͘ su-iàu ê pun hō͘ in.
2:46 In ta̍k ji̍t tī sèng-tiān lāi tâng-sim ha̍p-ì chū-hōe, mā khì ke-ke hō͘-hō͘ kí-hêng Sèng-chhan peh piáⁿ, ēng hoaⁿ-hí sêng-si̍t ê sim chò-hóe lim-chia̍h, oló Siōng-tè,
2:47 Koh tit tio̍h chèng lâng hoaⁿ-hí chiap-la̍p. Chú hō͘ tit-kiù ê lâng ji̍t-ji̍t ke-thiⁿ.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。