約翰福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
20:1 空墓
(太28：1-10；可16：1-8；路24：1-12)
七日ê頭一日透早，天iáu未光，抹大拉ê馬利亞來到墓地，看tio̍h墓口ê石已經徙開。
20:2 她to̍h走去chhōe西門彼得kah hitê耶穌所疼ê門徒，kā in講：「有人kā主tùi墓裡徙走，阮m̄知in kā祂hē tī tó位。」
20:3 彼得kah hitê門徒to̍h去墓地。
20:4 兩人做伙走，hitê門徒走khah緊，先到墓地。
20:5 伊àⁿ落去看墓內，看tio̍h幼苧布hē tī hia，獨獨伊無入去。
20:6 西門彼得tòe後到，入去墓內，看tio̍h幼苧布hē tī hia。
20:7 伊koh看tio̍h包耶穌頭殼ê巾，無kah幼苧布hē做伙，捲teh另外hē。
20:8 Hit時，hitê chìn前到墓地ê門徒mā入去，看了就相信。
20:9 因為in iáu未了解經典ê話，講耶穌一定tio̍h tùi死人中koh活。
20:10 然後，in兩人to̍h tńg去in tau。
20:11 耶穌對抹大拉ê馬利亞顯現
(可16：9-11)
馬利亞khiā tī墓外teh啼哭，她ná哭ná àⁿ落去看墓內。
20:12 她看tio̍h兩 个穿白衫ê天使，坐tī原來hē耶穌身屍ê所在，一个tī頭chit pêng，一个tī腳hit-pêng。
20:13 天使kā她講：「婦人人，你ná ē teh哭？」她應講：「有人kā我ê主徙走，我m̄知in kā祂hē tī啥物所在。」
20:14 Chiahê話講soah，馬利亞oa̍t-tńg身，看tio̍h耶穌khiā tī hia，mā認bē出祂是耶穌。
20:15 耶穌kā她講：「婦人人，你ná ē teh哭？你teh chhōe啥人？」馬利亞想講祂是顧園ê人，to̍h應講：「頭家ah，你若有kā祂徙走，請kā我講你kā祂hē tī啥物所在，我thang來去kā祂收tńg來。」
20:16 耶穌叫一聲「馬利亞ah。」她to̍h oa̍t-tńg身，用希伯來話講：「Lia̍p-pho-nî！」意思to̍h是「老師」。
20:17 耶穌kā她講：「M̄-thang摸我，因為我iáu未上天去天父hia。你tio̍h去chhōe我ê兄弟，kā in講：我上天去我ê天父hia，mā是lín ê天父hia；去我ê上帝hia，mā是lín ê上帝hia。」
20:18 抹大拉ê馬利亞to̍h去kā門徒講：「我已經看tio̍h主à。」，koh kā in講主有kā她講ê hiahê話。
20:19 耶穌對門徒顯現
(太28：16-20；可16：14-18；路24：36-49)
仝hit日，to̍h是七日ê頭一日ê暗時，門徒因為驚偤太人，to̍h tī in tòa ê所在kā門關teh。耶穌來到in中間，kā in講：「願lín平安！」
20:20 Chiahê話講了，耶穌就比手kah胸坎邊hō͘ in看。門徒看tio̍h主，真歡喜。
20:21 耶穌koh kā in講：「願lín平安！親像天父有差派我，我mā beh差派lín。」
20:22 耶穌講soah，to̍h對in pûn氣，講：「Lín領受聖神。
20:23 Lín赦免啥人ê罪，in to̍h得tio̍h赦免；lín若無赦免人ê罪，hiahê人ê罪to̍h bē tàng赦免。」
20:24 耶穌對多馬顯現
多馬，mā叫做Ti-tu-mô͘(雙生á ê意思)，是十二門徒ê一个，耶穌到ê時，伊無做伙tī hia。
20:25 其他ê門徒to̍h kā伊講：「阮已經有看tio̍h主à。」M̄ koh，多馬kā in講：「我若無看tio̍h祂手中ê釘跡，無用指頭á摸hitê釘跡，無用手摸祂ê胸坎邊，我絕對m̄相信。」
20:26 過了七工，門徒koh再聚集tī厝內，多馬mā做伙tī hia。門關起來，耶穌to̍h到，khiā tī in中央，講：「願lín平安！」
20:27 耶穌kā多馬講：「伸指頭á來摸我ê手，伸手來摸我ê胸坎邊。M̄-thang憢疑，tio̍h相信。」
20:28 多馬應講：「我ê主ah，我ê上帝ah。」
20:29 耶穌kā伊講：「你看tio̍h我chiah相信，hiahê無看tio̍h都來信ê人，真有福氣。」
20:30 Chit本冊ê目的
耶穌tī門徒ê面前有koh行真chē神跡，無記tī chit本冊。
20:31 記載chiahê tāichì，是beh hō͘ lín信耶穌是基督，是上帝ê Kiáⁿ，koh hō͘ lín通過信，靠祂ê名來得tio̍h活命。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。