約翰福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
13:1 耶穌kā門徒洗腳
Pôaⁿ過節前，耶穌知祂離開chit世間tńg去天父hia ê時已經到。祂有一直teh疼世間屬祂ê人，taⁿ祂beh表示祂疼in到底。
13:2 耶穌kah使徒食暗頓ê時，魔鬼kā出賣耶穌ê意思hē tī加略人西門ê kiáⁿ偤大ê心。
13:3 耶穌知天父已經kā 一切交tī祂ê手，koh知祂tùi上帝hia來，mā beh tńg去上帝hia。
13:4 祂to̍h離開桌，thǹg外衫，the̍h一條巾á縖tī腰裡，
13:5 然後倒水tī盆裡，kā門徒洗腳，koh用縖tī腰裡ê巾á kā in chhit。
13:6 洗到西門彼得ê時，彼得kā祂講：「主ah，祢beh kā我洗腳，是無？」
13:7 耶穌應講：「我所做ê，你chitmá m̄知，後來，to̍h ē明白。」
13:8 彼得講：「祢千萬m̄ thang kā我洗腳。」耶穌應講：「我若無kā你洗腳，你kah我to̍h無關係。」
13:9 西門彼得講：「主ah，m̄ nā腳，連手kah頭殼mā kā我洗。」
13:10 耶穌講：「人洗身軀了後，kui身軀lóng清氣，kantaⁿ洗腳to̍h好。Lín已經清氣，m̄ koh，無ta̍k个 lóng ánne。」
13:11 因為耶穌知影啥人beh kā祂出賣，所以chiah講：「Lín無ta̍k个清氣。」
13:12 耶穌kā in洗腳了後，穿外衫，koh tńg來坐桌，問in講：「我對lín所做chiahê tāichì，lín kám有明白？
13:13 Lín稱呼我『老師』，mā稱呼我『主』，lín ánne稱呼無m̄ tio̍h，因為我to̍h是。
13:14 我做『主』，做『老師』，都teh kā lín洗腳，lín mā tio̍h互相洗腳。
13:15 我有留好模樣hō͘ lín，是beh hō͘ lín thang照我對lín所做ê去做。
13:16 我實在kā lín講，奴僕bē比主人khah大，奉差派ê mā bē比差派祂ê hit位khah大。
13:17 Lín既然明白chiahê tāichì，若照ánne去做，to̍h真有福氣。
13:18 「我m̄是講lín大家lóng ánne；我知我所揀選ê。獨獨這是beh應驗經典所講：kah我做伙食飯ê人ē悖逆我。(註：詩41：9)
13:19 Taⁿ tāichì iáu未發生，我先kā lín講，到tāichì發生ê時，thang hō͘ lín相信我to̍h是hit位。
13:20 我實在kā lín講，接納我所差派ê人，to̍h是接納我；接納我，to̍h是接納差派我來ê hit位。」
13:21 耶穌預言受出賣
(太26：20-25；可14：17-21；路22：21-23)
耶穌講chiahê話了後，心內真艱苦，就明講：「我實在kā lín講，lín中間有一个人ē出賣我。」
13:22 使徒互相看來看去，m̄知耶穌是teh講啥人。
13:23 使徒中間有一个是耶穌所疼ê，伊坐tī耶穌ê身邊。
13:24 西門彼得ǹg hitê使徒tìm頭，講：「請你問耶穌，看祂是teh講啥人。」
13:25 Hitê使徒就靠óa耶穌ê胸坎，問講：「主ah，是啥人？」
13:26 耶穌應講：「我beh ùn餅the̍h hō͘伊，hitê人to̍h是。」祂就ùn一塊餅，the̍h hō͘加略人西門ê kiáⁿ偤大。
13:27 偤大一下接tio̍h hit塊餅，撒旦to̍h入去伊ê心。耶穌to̍h kā偤大講：「你想beh做ê，趕緊去做。」
13:28 同坐桌ê人無一个知影耶穌ná ē對伊講chit句話。
13:29 因為偤大是teh管錢項，所以，有人想講做是耶穌teh叫伊去買守節所需要ê物件，á是叫伊去賑濟sànchhiah人。
13:30 偤大接tio̍h hit塊餅，隨時出去。Hit時，是暗時。
13:31 新ê誡命
偤大出去了後，耶穌講：「Taⁿ人子得tio̍h榮光，上帝mā通過人子得tio̍h榮光。
13:32 既然上帝通過人子得tio̍h榮光，上帝kakī mā beh榮光人子，koh是beh隨時hō͘祂得tio̍h榮光。
13:33 細kiáⁿ，我kah lín做伙chhun無gōa久à，lín會beh chhōe我。照我bat kā偤太人講ê，taⁿ我kā lín講，『我beh去ê所在，lín bē tàng去。』
13:34 我hō͘ lín一條新ê誡命：Lín tio̍h相疼，親像我bat疼lín。Lín mā tio̍h照ánne相疼。
13:35 Lín若相疼，眾人ē就ánne來知lín是我ê門徒。」
13:36 耶穌預言彼得M̄認祂
(太26：31-35；可14：27-31；路22：31-34)
西門彼得問耶穌講：「主ah，祢beh去tó位？」耶穌應講：「我beh去ê所在，你chitmá bē tàng tòe我去，後來，你ētòe我去。」
13:37 彼得講：「主ah，我chitmá ná ē bē tàng tòe祢去？我甘願為tio̍h祢來放sak性命。」
13:38 耶穌應講：「祢beh為tio̍h我來放sak性命，是無？我實在kā你講，雞iáu未啼以前，你ē三pái m̄認我。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。