約翰福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
12:1 婦人人倒油tī耶穌ê腳
(太26：6-13；可14：3-9)
Pôaⁿ過節六日前，耶穌去到伯大尼，to̍h是耶穌hō͘伊tùi死人中koh活hitê拉撒路tòa ê所在。
12:2 Into̍h tī hia為tio̍h耶穌準備暗頓。馬大teh侍候，拉撒路kah耶穌坐仝桌。
12:3 馬利亞the̍h一罐純koh高貴ê芳油來抹耶穌ê腳，koh用kakī ê頭毛kā祂拭，kui厝內充滿芳油ê芳味。
12:4 耶穌ê一个門徒，to̍h是hitê後來，出賣耶穌ê加略人偤大，講：
12:5 「Ná m̄ kā chitê芳油the̍h去賣三百個銀á，來賑濟sànchhiah人？」
12:6 伊ánne講，m̄是因為伊關心sànchhiah人，是因為伊是賊，koh tiāⁿ-tiāⁿ 偷the̍h伊所管理ê公款。
12:7 耶穌to̍h講：「Chhut-chāi chitê婦人人去做！Hō͘她kā chiahê芳油留到我埋葬ê日thang用。
12:8 Lín不時都有sànchhiah人kah lín做伙，m̄ koh，我無tiāⁿ-tiāⁿ kah lín做伙。」
12:9 害死拉撒路ê計謀
真chē偤太人聽tio̍h耶穌tī伯大尼，to̍h去hia。In m̄ nā是beh看耶穌，mā ài beh看耶穌hō͘伊tùi死人中koh活ê拉撒路。
12:10 所以，chiahê祭司長計謀，連拉撒路mā beh kā伊殺害，
12:11 因為有真chē偤太人為tio̍h拉撒路ê緣故去信耶穌。
12:12 耶穌光榮進入耶路撒冷
(太21：1-11；可11：1-11；路19：28-40)
隔tńg工，真chē來過節ê人聽tio̍h耶穌beh來耶路撒冷，
12:13 就gia̍h棕樹枝去迎接耶穌，大聲hoah：「和散那，奉主ê名來ê hit位應該得tio̍h oló！(註：詩118：26)以色列ê王應該得tio̍h oló！」
12:14 耶穌看tio̍h一隻驢á-kiáⁿ，就牽來騎。照經典所記載：
12:15 錫安ê chabó͘ kiáⁿ，m̄免驚！看！Lín ê王騎驢á-kiáⁿ teh來ā。」(註：亞9：9)
12:16 Hit當時，門徒bē了解chiahê tāichì。到耶穌得tio̍h榮光ê時，in chiah想起經典有記載chiahê tāichì是teh指耶穌，mā果然tī耶穌ê身上實現chiahê tāichì。
12:17 當耶穌叫拉撒路出墓，hō͘伊tùi死人中koh活ê時，kah耶穌做伙tī hia ê群眾有繼續teh做見證。
12:18 群眾出去迎接耶穌，因為in聽tio̍h祂有行chitê神跡。
12:19 法利賽派ê人做伙講：「咱khah án怎做，mā無chhái工。你看，全世間lóng tòe祂去à！」
12:20 希臘人來Chhōe耶穌
節期中tńg去耶路撒冷朝拜ê人中間有幾nā个希臘人。
12:21 Chiahê人來見加利利省ê伯賽大人腓力，求伊講：「先生，阮ài beh見耶穌。」
12:22 腓力來kā安得烈講，安得烈kah腓力to̍h來kā耶穌講。
12:23 耶穌應講：「人子得tio̍h榮光ê時到à。
12:24 我實在kā lín講，一粒麥á種籽若無種落地來死，猶原是一粒niā-niā。若死，to̍h ē結真chē粒麥á。
12:25 疼惜kakī 性命ê人，會喪失性命；tī chit世間無貪戀kakī 性命ê人一定ē保守性命來得tio̍h永遠ê活命。
12:26 人若beh服事我tio̍h tòe我；我tī啥物所在，服事我ê人mā tio̍h tī hia。人若服事我，我ê天父mā ē kā伊尊重。」
12:27 人子Tio̍h受舉起
「Chit chūn我ê心肝真艱苦。(註：詩6：2)我beh án怎講chiah好？Kám tio̍h講：『父ah，救我脫出hitê時刻』？總是，我是為tio̍h chitê時刻chiah來ê。
12:28 父ah，願祢榮光祢ê名。」然後有聲tùi天頂來，講：「我已經有榮光我ê名，taⁿ beh koh再榮光一pái。」
12:29 Khiā tī邊á ê群眾聽tio̍h，to̍h講：「是雷teh tân。」Mā有人講：「是天使teh對祂講話。」
12:30 耶穌應講：「Chitê聲m̄是為tio̍h我，是為tio̍h lín來ê。
12:31 Chit-má是chit世間受審判ê時。Chit世間ê統治者ē受推翻。
12:32 我若受接上天，離開世間ê時，會吸引萬民來歸óa我。」
12:33 耶穌講chiahê話是表明祂beh án怎來死。
12:34 眾人應祂講：「阮聽tio̍h律法有講：『基督永遠存在。』祢án怎講：『人子tio̍h受舉起』？Chitê人子是啥人？」
12:35 耶穌應講：「光iáuē tī lín中間一時á久，lín tio̍h趁有光ê時緊行，chiah bē hō͘烏暗kā lín遮蓋。Tī烏暗中teh行ê人，m̄知ē行去tó位。
12:36 趁有光ê時，lín tio̍h信光，thang hō͘ lín成做光明ê人。」偤太人M̄信耶穌
耶穌chiahê話講soah，to̍h離開in，kakī bih起來。
12:37 耶穌雖然tī in ê面前行hiah chē神跡，in iáu koh m̄信祂。
12:38 這是beh應驗以賽亞先知ê話：主ah，啥人有teh信阮所傳ê信息？主會對啥人顯明祂ê權能？(註：賽53：1)
12:39 In bē tàng相信ê原因，以賽亞mā有ánne講：
12:40 上帝hō͘ in ê目chiu chheⁿmê，koh心硬。若m̄是 ánne，in用目chiu 看見，koh用心曉悟來歸向我，我to̍hē kā in醫好。(註：賽6：10)
12:41 以賽亞ánne講是因為伊有看tio̍h耶穌ê榮光，chiah講關係祂ê tāichì。
12:42 雖然ánne，偤太人ê頭人有真chē信耶穌，in驚法利賽派ê人，chiah無公開承認祂，免得hông趕出會堂。
12:43 Chiahê法利賽派ê人ài人ê oló，超過tùi上帝來ê oló。
12:44 耶穌ê話Beh審判人
耶穌大聲hoah：「信我ê人m̄是teh信我，是信差派我來ê hit位。
12:45 看見我ê人to̍h是看 tio̍h差派我來ê hit位。
12:46 我做光來到chit世間，是beh hō͘信我ê人脫離烏暗。
12:47 聽我ê話無去遵守ê人，我無beh kā伊審判，因為我來m̄是beh審判世間，是beh拯救世間。
12:48 拒絕我koh m̄接納我ê話ê人，有一个審判者ē kā伊審判。Tī末日ê時，我所講ê道理ē kā伊審判。
12:49 因為我m̄是照kakī ê意思講，是照差派我來ê天父命令我啥物，我to̍h傳啥物，講啥物。
12:50 我知上帝ê誡命是永遠ê活命，所以，我所講ê lóng是照天父kā我講ê。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。